អភិបាលខេត្ដស្វាយរៀង អញ្ជេីញជាអធិបតីក្នុងពិធីបុណ្យឆ្លងបណ្ណាល័យ សាលាពុទ្ធិកបឋមសិក្សា សម្ពោធសមិទ្ធផលនានា និងបញ្ចុះបឋមសិលាកសាងរបង ខ្លោងទ្វារ នៅវត្តកែវមណីរាម ស្ថិតនៅស្រុករំដួល
ភ្នំពេញ៖ នៅព្រឹកថ្ងៃទី១៤ ខែឧសភា ឆ្នាំ២០២៤ ឯកឧត្តម ប៉េង ពោធិ៍សា អភិបាលខេត្ដស្វាយរៀង និងលោកជំទាវអញ្ជេីញជាអធិបតីក្នុងពិធីបុណ្យឆ្លងបណ្ណាល័យ សាលាពុទ្ធិកបឋមសិក្សា សម្ពោធសមិទ្ធផលនានា និងបញ្ចុះបឋមសិលាកសាងរបង ខ្លោងទ្វារ នៅវត្តកែវមណីរាម ស្ថិតនៅភូមិព្រះអង្គកែវ ឃុំជ្រុងពពេល ស្រុករំដួល។
ពិធីនេះមានការចូលរួមពីអភិបាលរងខេត្តនិងសប្បុរសជន ព្រមទាំងមន្ត្រីរាជការអាជ្ញាធរដែនដីលោកគ្រូ អ្នកគ្រូ សិស្សានុសិស្ស យាយជី តាជីនិងប្រជាពលរដ្ឋសរុបប្រមាណជាង ៥០០ នាក់។
ឯកឧត្តមអភិបាលខេត្តបានថ្លែងពាំនាំនូវការផ្ដាំផ្ញើសាកសួរសុខទុក្ខ និងក្ដីនឹករលឹកពីសម្ដេចមហាបវរធិបតីនាយករដ្ឋមន្ត្រី និងលោកជំទាវ ព្រមទាំងសម្ដេចកិត្តិសង្គហបណ្ឌិត ម៉ែន សំអន ប្រធានក្រុមការងារចុះជួយខេត្តស្វាយរៀង និងលោកជំទាវបណ្ឌិតសភាចារ្យ ភឿង សកុណា ប្រធានក្រុមការងាររាជរដ្ឋាភិបាលចុះមូលដ្ឋានខេត្ត ជូនដល់បងប្អូនប្រជាពលរដ្ឋទាំងអស់នៅឃុំជ្រុងពពេលយើងនេះ ក៏ដូចជានៅទូទាំងស្រុករំដួល។
ឯកឧត្តមអភិបាលខេត្ត បានថ្លែងអំពាវនាវដល់បងប្អូនប្រជាពលរដ្ឋទាំងអស់ សូមមានការប្រុងប្រយ័ត្នចំពោះគ្រោះធម្មជាតិផ្សេងៗ ជាពិសេសខ្យល់កន្ត្រាក់ និងរន្ទះជាដើម និងសូមឲ្យអាជ្ញាធរ ត្រូវត្រៀមជាប់ជានិច្ចនូវវិធានអន្តរាគមន៍ជួយសង្គ្រោះប្រជាពលរដ្ឋឲ្យបាន ទាន់ពេលវេលា ពេលមានគ្រោះធម្មជាតិកើតឡើង ជាមួយនិងការបន្តការយកចិត្តទុកដាក់តាមដានការប្រើប្រាស់ទឹកនៅតាមបណ្ដាមូលដ្ឋាន ទាំងនៅក្នុងការបង្កបង្កើនផល និងការប្រើប្រាស់ប្រចាំថ្ងៃ ។
ឯកឧត្តម បន្តថា សមិទ្ធផលជាច្រើនដែលកើតមានឡើងនៅក្នុងវត្តកែវមណីរាម បើទោះបីជាវត្តទើបតែផ្ដួចផ្ដើមបង្កើតឡើងនៅក្នុងឆ្នាំ២០០៨ និងមានអាយុកាលត្រឹមតែ ១៦ឆ្នាំយ៉ាងណាក្ដី ក្នុងនាមអាជ្ញាធរខេត្ត សូមថ្លែងអំណរព្រះគុណ និងអរគុណចំពោះព្រះតេជគុណ ព្រះចៅអធិការ គណៈកម្មាធិការអាចារ្យវត្ត ក៏ដូចជាពុទ្ធបរិស័ទចំណុះជើងវត្ត ព្រមទាំងសប្បុរសជនទាំងអស់ ជាពិសេសឯកឧត្តម ហែម អាន និងក្រុមគ្រួសារ ដែលបានចូលរួមគាំទ្រ និងកសាងនូវសមិទ្ធផល នៅក្នុងវត្តកែវមណីរាម ដោយបានចំណាយថវិកាសាងសង់យ៉ាងច្រើនសន្ធឹកសន្ធាប់ ហើយនឹងត្រូវដាក់សម្ពោធឲ្យប្រើប្រាស់ជាផ្លូវការនាពេលនេះ ។
ឯកឧត្តមបន្ថែមថា តម្លៃនៃសន្តិភាពដែលយើងរកបាននេះ គឺមានតម្លៃខ្លាំងណាស់ សម្រាប់ការរីកចម្រើននូវជីវភាពប្រជាជន តាមរយៈការអភិវឌ្ឍជាច្រើន ដូច្នេះ ទំនាក់ទំនងរវាងសន្តិភាព និងសង្គ្រាម សន្តិភាព និងការអភិវឌ្ឍ គឺសំខាន់ណាស់ វាទាមទារឲ្យប្រជាពលរដ្ឋរបស់យើងរួមគ្នារក្សាសន្តិភាពឲ្យខានតែបាន ។
ឯកឧត្តម អភិបាលខេត្តបានអំពាវនាវដល់ប្រជាពលរដ្ឋនូវបញ្ហាសំខាន់ៗមួយចំនួនដូចខាងក្រោម៖
១.សូមចូលរួមជួយផ្សព្វផ្សាយផលប៉ះពាល់ និងគ្រោះថ្នាក់នៃការសេពគ្រឿងញៀន ដើម្បីទប់ស្កាត់ការប្រើប្រាស់គ្រឿងញៀន ហើយលុបបំបាត់គ្រឿងញៀននៅមូលដ្ឋាន ដើម្បីអនាគតកូនចៅយើង យុវជន និងកុមាររបស់យើង ។
២.សូមជួយអប់រំ ផ្សព្វផ្សាយ និងចូលរួមការគោរពច្បាប់ចរាចរណ៍ឲ្យបានគ្រប់ៗគ្នាជាពិសេសនៅពេលទេសនាកម្មវិធីបុណ្យទានផ្សេងៗ សូមព្រះតេជគុណ មេត្តាជួយណែនាំឲ្យគោរពច្បាប់ចរាចរណ៍ ព្រមទាំងណែនាំកុំឲ្យប្រើប្រាស់គ្រឿងញៀន ។
៣.សូមបងប្អូន បន្តរួមគ្នាការពារឲ្យបាននូវសុខសន្តិភាពដែលមាននៅក្នុងដៃ ត្រូវមានការជឿជាក់លើការដឹកនាំរបស់រាជរដ្ឋាភិបាល ប្រឆាំងដាច់ខាតនូវរាល់ការប៉ុនប៉ងទាំងឡាយណា ដែលនាំឲ្យប្រទេសជាតិយើងធ្លាក់ទៅក្នុងភាពអន្តរាយ។
៤.សូមចូលរួមជួយថែរក្សាការពារនូវសមិទ្ធផលនានា ដែលមានស្រាប់ ជាពិសេសសមិទ្ធផលដែលមាននៅក្នុងទីវត្តអារាមយើងនេះឲ្យបានគង់វង្សយូរអង្វែង ។
៥.សូមអាជ្ញាធរ និងសមត្ថកិច្ចរបស់យើង ត្រូវបន្តយកចិត្តទុកដាក់អនុវត្តគោលនយោបាយភូមិ ឃុំមានសុវត្ថិភាព ការងារបង្ក្រាបល្បែងស៊ីសងខុសច្បាប់ និងការពារសន្តិសុខ សុវត្ថិភាពឲ្យបានល្អប្រសើរជូនប្រជាពលរដ្ឋនៅគ្រប់មូលដ្ឋាន និងគ្រប់កាលៈទេសៈ ជាពិសេសនៅក្នុងដំណើរការនៃការរៀបចំការបោះឆ្នោតជ្រើសរើសក្រុមប្រឹក្សាខេត្ត ក្រុង ស្រុកនាពេលខាងមុខ។
៦.សូមស្នើដល់អាជ្ញាធរគ្រប់លំដាប់ថ្នាក់ក្នុងស្រុករំដួល ត្រូវខិតខំបំពេញការងារឲ្យកាន់តែសកម្ម និងមានប្រសិទ្ធភាពថែមទៀត ដោយចាត់ទុកបញ្ហារបស់ប្រជាពលរដ្ឋ ជាបញ្ហារបស់ខ្លួន និងជាកិច្ចការចម្បងដែលត្រូវយកចិត្តទុកដាក់ ព្រមទាំងត្រូវបង្កើនសកម្មភាពចុះមូលដ្ឋានជាក់ស្ដែង ក្ដាប់ឲ្យបានច្បាស់លាស់ពីកង្វះខាត សំណូមពរ និងតម្រូវការចាំបាច់របស់ប្រជាពលរដ្ឋ ហើយត្រូវខិតខំរួមគ្នាដោះស្រាយឲ្យបានទាន់ពេលវេលា
និងឆាប់រហ័សស្របតាមកម្មវិធីយោបាយរបស់រាជរដ្ឋាភិបាល និងការដឹកនាំរបស់សម្ដេចធិបតីនាយករដ្ឋមន្ត្រី។
នៅក្នុងឱកាសនោះដែរ ឯកឧត្តម អភិបាលខេត្តនិងលោកជំទាវ បានផ្ដល់ជូនអំណោយដល់យាយជី តាជី ៣០នាក់ ក្នុងម្នាក់ៗ ទទួលបានក្រណាត់ស ១ដុំ និងថវិកា ៤០.០០០រៀល លោកគ្រូ អ្នកគ្រូ ២២នាក់ ក្នុងម្នាក់ៗ ទទួលបានសារ៉ុង ១ ក្រម៉ា ១ និងថវិកា ៤០.
០០០រៀល សិស្សានុសិស្ស ១០០នាក់ ក្នុងម្នាក់ៗទទួលបានសៀវភៅ ៣ក្បាល ប៊ិក២ដើម ខ្មៅដៃ១ និងបន្ទាត់១មុឺនរៀល ប្រជាការពារភូមិ ២០នាក់ ក្នុងម្នាក់ៗ ទទួលបាន សារ៉ុង ១ក្រម៉ា ១ និងថវិកា ២០.០០០រៀល ប្រជាពលរដ្ឋក្រមា១ សារុង១និងថវុកា២មុឺនរៀល សាលាស្រុករំដួល២០មុឺនរៀល សាលាឃុំជ្រុងពពេល២០មុឺនរៀល នគរបាលប៉ុស្តិ៍រដ្ឋបាល២០មុឺនរៀល អធិការដ្ឋាននគរបាលស្រុករំដួល បញ្ជាការដ្ឋានកងរាជវុធហត្ថស្រុក២០មុឺនរៀល សឹករងស្រុក២០មុឺនរៀល ចូលបច្ច័យបុណ្យសពក្មេងប្រុសម្នាក់ដែលលង់ទឹកស្លាប់ កាលពីថ្ងៃទី ១៣ ខែឧសភាឆ្នាំ ២០២៤ ម្សិលមិញចំនួន១លានរៀល ព្រមទាំងចំណាយផ្សេងៗ និងប្រគេនបច្ច័យដល់វត្តកែវមណីរាមសរុបថវិកាចំនួន២៩លានរៀល៕
