តំណាងរាស្ត្រមណ្ឌលកំពង់ចាម ផ្តាំផ្ញើដល់អង្គបោះឆ្នោតជ្រើសរើសក្រុមប្រឹក្សាស្រុក អាណត្តិទី៤ ឆ្នាំ២០២៤ ត្រូវថែទាំសុខភាព និងត្រៀមឯកសារសម្រាប់បោះឆ្នោត

ភ្នំពេញ៖ ឯកឧត្តម លន់ លឹមថៃ តំណាងរាស្ត្រមណ្ឌលខេត្តកំពង់ចាម នាព្រឹកថ្ងៃទី១៤ ខែឧសភា ឆ្នាំ២០២៤ បានអញ្ជើញជួបសំណេះសំណាលជាមួយអង្គបោះឆ្នោតជ្រើសរើសក្រុមប្រឹក្សាខេត្ត ក្រុង ស្រុក អាណត្តិទី៤ ឆ្នាំ២០២៤ នៅឃុំសំពងជ័យ ស្រុកជើងព្រៃ ខេត្តកំពង់ចាម។

ឯកឧត្តម លន់ លឹមថៃ បានណែនាំឱ្យគ្រប់សមាសភាពពាក់ព័ន្ធទាំងអស់​ ត្រូវបន្តសាមគ្គីភាព ដោយទទួលខុសត្រូវខ្ពស់ បន្តថែរក្សាសុខភាព និងប្រុងប្រយ័ត្នចំពោះឯកសារបោះឆ្នោត បន្តរួមគ្នាអនុវត្តផែនការឆ្ពោះទៅដណ្តើមបាននូវជោគជ័យក្នុងការបោះឆ្នោតជ្រើសរើសក្រុមប្រឹក្សា រាជធានី ខេត្ត ក្រុង ស្រុក ខណ្ឌ អាណត្តិទី៤ នៅថ្ងៃទី២៦ ខែឧសភា ឆ្នាំ២០២៤ ដើម្បីបន្តជំរុញ និងលើកកម្ពស់ដំណើរការ នៃលទ្ធិប្រជាធិបតេយ្យ សេរីពហុបក្សនៅកម្ពុជា និងចូលរួមទាំងអស់គ្នាអនុវត្តនូវយុទ្ធសាស្រ្ត​បញ្ចកោណដំណាក់កាលទី១ និងគោលនយោបាយភូមិ ឃុំ មានសុវត្ថិភាព ដើម្បីបន្តពង្រឹងឱ្យបាននូវសន្តិភាព ស្ថិរភាពនយោបាយ និងការអភិវឌ្ឍប្រទេសជាតិឱ្យសម្រេចបានតាមចក្ខុវិស័យកម្ពុជាឆ្នាំ២០៣០ ជាប្រទេសមានចំណូលសេដ្ឋកិច្ចមធ្យមកម្រិតខ្ពស់ និងឆ្នាំ២០៥០ ជាប្រទេសមានចំណូលសេដ្ឋកិច្ចខ្ពស់​ និងការអភិវឌ្ឍសង្គមលើគ្រប់វិស័យ នាំមកនូវវិបុលសុខ វិបុលភាព​ ជូនប្រជាពលរដ្ឋយើង​។

ក្នុងឱកាសនោះផងដែរ ឯកឧត្តម លន់ លឹមថៃ បានឧបត្ថម្ភថវិកាដល់អង្គបោះឆ្នោតចំនួន៨នាក់ ក្នុងម្នាក់ៗទទួលបាន៥ម៉ឺនរៀល អ្នកចូលរួម២៣នាក់​ ក្នុងម្នាក់ៗ ថវិកា២ម៉ឺនរៀល និងប្រជាការពារ១០នាក់​ ក្នុងម្នាក់ៗទទួលបាន២ម៉ឺនរៀល​ ផងដែរ ៕