អគ្គនាយកពន្ធនាគារ អញ្ជើញជួបពិភាក្សាការងារជាមួយតំណាងការិយាល័យឧត្តមស្នងការសិទ្ធិមនុស្ស (OHCHR)

ភ្នំពេញ៖ នាព្រឹកថ្ងៃទី១៥ ខែឧសភា ឆ្នាំ២០២៤ នៅបន្ទប់ប្រជុំលេខ “៤២០” ទីស្តីការក្រសួងមហាផ្ទៃ ឯកឧត្តម ឧត្តមអគ្គានុរក្ស.១ ឈន សាណាត អគ្គនាយក នៃអគ្គនាយកដ្ឋានពន្ធនាគារ បានអញ្ជើញជួបពិភាក្សាការងារជាមួយ លោកស្រី Ms. Roueida El Hage, Country Representative ការិយាល័យឧត្តមស្នងការសិទ្ធិមនុស្ស ប្រចាំនៅកម្ពុជា (OHCHR) និងសហការី ដើម្បីស្វែងយល់អំពីបញ្ហាប្រឈមនានានៅក្នុងពន្ធនាគារ។ លោកស្រី បានចែករំលែកបទពិសោធន៍ ដើម្បីរួមចំណែកធ្វើអោយប្រសើរឡើងលក្ខខណ្ឌការឃុំឃាំងជនជាប់ឃុំ។

កិច្ចជំនួបប្រជុំនេះបានពិភាក្សាលើ៦ចំណុចរួមមាន៖
១.ការដោះស្រាយភាពចង្អៀតណែននៅក្នុងពន្ធនាគារ
២.ការផ្ដល់ និងទទួលសេវាសុខភាពក្នុងពន្ធនាគារ
៣.ការផ្ទេរជនជាប់ឃុំទៅឃុំនៅជិតតំបន់ក្រុមគ្រួសាររបស់ពួកគាត់
៤.ការបែងចែករបបអាហារសម្រាប់ជនជាប់ឃុំដែលកាន់សាសនាម៉ូស្លីម និងទីកន្លែងសំរាប់គោរពសាសនា
៥.ការផ្ដល់សេវាផ្លូវច្បាប់នៅក្នុងពន្ធនាគារ
៦.ការកសាងប្រព័ន្ធទិន្នន័យគ្រប់គ្រងជនជាប់ឃុំ។

ក្រោមការដឹកនាំប្រកបដោយភាពឈ្លាសវៃ គុណធម៌ និងមនុស្សធម៌ របស់ ឯកឧត្តម អគ្គនាយក អគ្គនាយកដ្ឋានពន្ធនាគារបាន និងកំពុងយកចិត្តទុកដាក់ខ្ពស់ចំពោះសុខមាលភាពរបស់មន្រ្តី និងជនជាប់ឃុំ និងមានកិច្ចសហការល្អជាមួយការិយាល័យឧត្តមស្នងការសិទ្ធិមនុស្ស និងអង្គភាពពាក់ព័ន្ធនានា ទាំងអង្គភាពរដ្ឋនិងដៃគូសង្គមសុីវិលជាច្រើន ដើម្បីធានាអោយបានការគ្រប់គ្រងពន្ធនាគារប្រកបដោយសុវត្ថិភាព មនុស្សធម៍ និងស្របតាមគោលការណ៍សិទ្ធិមនុស្ស ៕