សាលាភូមិន្ទរដ្ឋបាលនៃក្រសួងមុខងារសាធារណៈ និងក្រសួងអធិការកិច្ច ចុះអនុស្សរណៈនៃការយោគយល់គ្នា លើកិច្ចសហប្រតិបត្តិការបណ្តុះបណ្តាល លើកកម្ពស់សមត្ថភាពថ្នាក់ដឹកនាំ និងមន្ត្រី

ភ្នំពេញ៖ នៅសាលាភូមិន្ទរដ្ឋបាល នារសៀលថ្ងៃទី១៧ ខែឧសភា ឆ្នាំ២០២៤ នេះ ក្រសួងមុខងារសាធារណៈ និងក្រសួងអធិការកិច្ច បានរៀបចំពិធីចុះអនុស្សរណៈនៃការយោគយល់គ្នា ស្តីពី កិច្ចសហប្រតិបត្តិការបណ្តុះបណ្តាល លើកកម្ពស់សមត្ថភាពថ្នាក់ដឹកនាំ និងមន្ត្រី ក្រោមអធិបតីភាព ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានក្រុមប្រឹក្សាសាលាភូមិន្ទរដ្ឋបាល។

ពិធីចុះអនុស្សរណៈនេះក៏មានការអញ្ជើញចូលរួមពីឯកឧត្តម ហួត ហាក់ រដ្ឋមន្ត្រីក្រសួងអធិការកិច្ច និងឯកឧត្តម លោកជំទាវ រដ្ឋលេខាធិការប្រចាំការនៃក្រសួងទាំងពីរ ថ្នាក់ដឹកនាំក្រសួងមុខងារសាធារណៈ ក្រសួងអធិការកិច្ច គណៈគ្រប់គ្រងសាលាភូមិន្ទរដ្ឋបាល និងសិស្សមន្ត្រីជាន់ខ្ពស់ និងសិស្សក្រមការ ដែលបានចាប់ប៉ុស្តិ៍ក្រសួងមុខងារសាធារណៈ និងក្រសួងអធិការកិច្ច ព្រមទាំងអ្នកសារព័តមានជាច្រើនរូប ។

អនុស្សរណៈនៃការយោគយល់គ្នាដែលត្រូវបានចុះហត្ថលេខានៅថ្ងៃនេះ មានគោលបំណងសំខាន់ គឺដើម្បីបង្កើតកិច្ចសហប្រតិបត្តិការ និងលើកកម្ពស់ការគាំទ្រពីគ្នាទៅវិញទៅមករវាងគូភាគីពាក់ព័ន្ធនឹងការអភិវឌ្ឍសមត្ថភាព ការសិក្សាអប់រំ កិច្ចការស្រាវជ្រាវ ព្រមទាំងគម្រោងសហប្រតិបត្តិការផ្សេងៗទៀត ដោយផ្អែកលើគោលការណ៍ពិគ្រោះយោបល់ ឯកភាព សមភាព យុត្តិធម៌ និងផ្ដល់អត្ថប្រយោជន៍ដល់គូភាគីទៅវិញទៅមក។

តាមរយៈសុទ្ទរកថា របស់ថ្នាក់ដឹកនាំនៃភាគីទាំងសងខាង សុទ្ធតែបានបង្ហាញអំពីសារៈសំខាននៃអនុស្សរណៈ ដែលបានចុះនៅថ្ងៃនេះ។ ភាពសំខាន់នៃអនុស្សរណៈនេះ មិនត្រឹមតែផ្សាភ្ជាប់នូវទំនាក់ទំនងរវាងស្ថាប័នទាំងពីរតែប៉ុណ្ណោះទេ តែជាការគិតគូរវែងឆ្ងាយដល់អនាគតនៃការបណ្តុះបណ្តាលធនធានមនុស្សផ្នែករដ្ឋបាលសាធារណៈ របស់រាជរដ្ឋាភិបាលកម្ពុជា។

សូមជម្រាបថា ពិធីចុះអនុស្សរណៈនៃការយោគយល់គ្នារវាងសាលាភូមិន្ទរដ្ឋបាល និងក្រសួងអធិការកិច្ចនេះ សាលាភូមិន្ទរដ្ឋបាលនៃក្រសួងមុខងារសាធារណៈ តំណាងដោយ ឯកឧត្តម យក់ ប៊ុនណា រដ្ឋលេខាធិការប្រចាំការក្រសួងមុខងារសាធារណៈ និងជានាយកសាលាភូមិន្ទរដ្ឋបាល រីឯក្រសួងអធិការកិច្ច តំណាងដោយ លោកជំទាវ សុខ វិឡាយ រដ្ឋលេខាធិការប្រចាំការ នៃក្រសួងក្រសួងអធិការកិច្ច៕