កម្ពុជា-រុស្ស៊ី ពង្រឹងចំណងមិត្តភាព និងកិច្ចសហប្រតិបត្តិការ
ភ្នំពេញ៖ ឯកឧត្តម មាស គឹមហេង រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ បានអញ្ជើញចូលរួមពិធីរំលឹកខួបលើកទី៦៨ នៃការបង្កើតទំនាក់ទំនងការទូតរវាងព្រះរាជាណាចក្រកម្ពុជា និងសហព័ន្ធរុស្ស៊ី ដែលរៀបចំដោយឯកឧត្តម Anatoly Borovik ឯកអគ្គរដ្ឋទូតនៃសហព័ន្ធរុស្ស៊ី នៅថ្ងៃទី១៦ ខែឧសភា ឆ្នាំ២០២៤ នៅនិវេសនដ្ឋាន។
ឯកឧត្តមរដ្ឋលេខាធិការ បានសម្តែងនូវការអបអរសាទរយ៉ាងស្មោះស្ម័គ្រ និងជូនពរចំពោះរដ្ឋាភិបាល និងប្រជាជននៃសហព័ន្ធរុស្ស៊ីសូមប្រកបដោយសុខសន្តិភាព សុភមង្គល និងវិបុលភាព។
ឯកឧត្តមក៏បានគូសបញ្ជាក់បន្ថែមអំពីសារៈសំខាន់នៃទំនាក់ទំនងមិត្តភាព និងកិច្ចសហប្រតិបត្តិការរវាងប្រទេសទាំងពីរ ដែលបានកសាងអស់រយៈពេលជិតប្រាំពីរទសវត្សរ៍មកហើយ។
ឯកឧត្តមរដ្ឋលេខាធិការបានសង្កត់ធ្ងន់ថា យន្តការដែលមានស្រាប់ដូចជា គណៈកម្មការអន្តររដ្ឋាភិបាលស្តីពីពាណិជ្ជកម្ម សេដ្ឋកិច្ច សហប្រតិបត្តិការវិទ្យាសាស្ត្រ និងបច្ចេកទេស និងការពិគ្រោះយោបល់ទ្វេភាគី គឺជាវេទិកាដ៏ល្អសម្រាប់ប្រទេសទាំងពីរក្នុងការពង្រឹងសម្ទុះនៃកិច្ចសហប្រតិបត្តិការទ្វេភាគី និងភាពជាដៃគូឱ្យឡើងដល់កម្ពស់ថ្មីមួយទៀត៕
