ឯកឧត្តមរដ្ឋមន្ត្រី ថោ ជេដ្ឋា អញ្ជើញចូលរួមវេទិកាទឹកពិភពលោកលើកទី១០ នៅកោះបាលី ប្រទេសឥណ្ឌូនេស៊ី នៅថ្ងៃទី២០-២១ ខែឧសភា
ភ្នំពេញ៖ នាព្រឹកថ្ងៃទី១៩ ខែឧសភា ឆ្នាំ២០២៤ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានដឹកនាំគណៈប្រតិភូជាន់ខ្ពស់ក្រសួង អញ្ជើញចូលរួមវេទិកាទឹកពិភពលោកលើកទី១០ នៅកោះបាលី ប្រទេសឥណ្ឌូនេស៊ី ដែលប្រព្រឹត្តិទៅនៅថ្ងៃទី២០-២១ ខែឧសភា ឆ្នាំ២០២៤៕ បើយោងតាមសេចក្តីប្រកាសព័ត៌មានរបស់ក្រសួងធនធានទឹក និងឧតុនិយម បានឲ្យដឹងថា តបតាមកំណត់ទូតនៃស្ថានទូតឥណ្ឌូនេស៊ីប្រចាំព្រះរាជាណាចក្រកម្ពុជា ចុះថ្ងៃទី២៦ ខែមីនា ឆ្នាំ២០២៤ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម នឹងដឹកនាំគណៈប្រតិភូជាន់ខ្ពស់ក្រសួង អញ្ជើញចូលរួមក្នុងវេទិកាទឹកពិភពលោកលើកទី១០ ដែលនឹងប្រព្រឹត្តទៅនៅថ្ងៃទី២០-២១ ខែឧសភា ឆ្នាំ២០២៤ នៅកោះបាលី ប្រទេសឥណ្ឌូនេស៊ី។ ក្រោមមូលបទ «ទឹកដើម្បីភាពចម្រុងចម្រើនរួមគ្នា» វេទិកាទឹកពិភពលោកលើកទី១០ ឆ្នាំ២០២៤ គឺ ជាព្រឹត្តិការណ៍ដ៏សំខាន់មួយនៅក្នុងកិច្ចខិតខំប្រឹងប្រែងជាសាកល ដើម្បីសម្រេចបាននូវការគ្រប់គ្រងទឹកប្រកប ដោយនិរន្តរភាព និងវិបុលភាពរួមគ្នា ដោយការលើកកម្ពស់កិច្ចសហការ ការច្នៃប្រឌិត និងការប្តេជ្ញាចិត្តពី ភាគីពាក់ព័ន្ធចម្រុះនៅទូទាំងពិភពលោក។ ចាប់តាំងពីឆ្នាំ១៩៩៧មក វេទិកាទឹកពិភពលោក ដែលបង្កើត ឡើងដោយក្រុមប្រឹក្សាទឹកពិភពលោក បានប្រារព្ធធ្វើឡើងរៀងរាល់៣ឆ្នាំម្តង និងបានក្លាយជាវេទិកាអន្តរជាតិ ដ៏ធំបំផុតរបស់ពិភពលោកក្នុងវិស័យទឹកដែលមានការចូលរួមពីគ្រប់ភាគីពាក់ព័ន្ធនានា។ វេទិកាទឹកពិភពលោក លើកទី១០ ឆ្នាំ២០២៤ នៅប្រទេសឥណ្ឌូនេស៊ីនាពេលនេះ បានផ្តោតលើប្រធានបទរងចំនួនប្រាំមួយដូចជា៖ ទី១).សុវត្ថិភាពទឹក និងវិបុលភាព, ទី២).ទឹកសម្រាប់មនុស្ស និងធម្មជាតិ, ទី៣).ការគ្រប់គ្រង និងកាត់បន្ថយ ហានិភ័យគ្រោះមហន្តរាយ, ទី៤).កិច្ចសហប្រតិបត្តិការ និងការទូតជលសាស្ត្រ, ទី៥).នវានុវត្តន៍ហិរញ្ញវត្ថុសម្រាប់ទឹក និងទី៦).ចំណេះដឹង និងការច្នៃប្រឌិត។ ក្នុងឱកាសនោះដែរ ឯកឧត្តមរដ្ឋមន្ត្រី ក៏នឹងទទួលជួបពិភាក្សាទ្វេភាគីជាមួយដៃគូទឹកមួយចំនួន ដើម្បី ពង្រឹងនិងពង្រីកកិច្ចសហប្រតិបត្តិការនានា ព្រមទាំងស្វែងរកការគាំទ្រលើការអភិវឌ្ឍវិស័យធានធានទឹក និង ឧតុនិយមនៅកម្ពុជា រួមមាន អនុប្រធានធនាគារពិភពលោក ជំនួយការរដ្ឋមន្ត្រីការបរទេសនៃប្រទេសអូស្ត្រាលី និងទីភ្នាក់ងារទឹកបារាំង ៕
