កាកបាទក្រហមកម្ពុជា នាំយកអំណោយមនុស្សធម៌ផ្តល់ជូនយុវតី បុប្ផា អាយុ ២៥ឆ្នាំ មានពិការភាពដោយសារជំងឺគ្រុនក្តៅតាំងពីតូច និងរងគ្រោះដោយការរំលោភបំពានផ្លូវភេទ រស់នៅស្រុកព្រៃឈរ

ភ្នំពេញ៖ នៅថ្ងៃទី១៩ ខែឧសភា ឆ្នាំ២០២៤ លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា និងសហការី រួមជាមួយអនុសាខាកាកបាទក្រហមកម្ពុជា ស្រុកព្រៃឈរ បានអញ្ជើញចុះសួរសុខទុក្ខ និងនាំយកអំណោយមនុស្សធម៌ផ្តល់ជូនយុវតី បុប្ផា អាយុ ២៥ឆ្នាំ មានពិការភាពដោយសារជំងឺគ្រុនក្តៅតាំងពីតូច និងរងគ្រោះដោយការរំលោភបំពានផ្លូវភេទ រស់នៅភូមិរំដួល ឃុំគរ ស្រុកព្រៃឈរ ខេត្តកំពង់ចាម។

យុវតី បុប្ផា រស់នៅជាមួយម្តាយជាស្ត្រីមេម៉ាយឈ្មោះ គឿន ស្រីនាង អាយុ ៤៨ឆ្នាំ ប្រកបរបរដើរគោះអង្រ្កង បេះត្រកួន និងរកក្តាមខ្យង ដើម្បីបរិភោគ។ ដោយសារតែម្តាយត្រូវចេញពីផ្ទះដូចនេះ យុវតី បុប្ផា រស់នៅពឹងផ្អែកលើម្តាយមីងជាស្ត្រីមេម៉ាយមានកូន ៣នាក់ ដែលរស់នៅក្បែរខាងនោះ ជួយមើលថែទាំយកអាសាផងដែរ។

ស្ថិតក្នុងឱកាសនោះ លោកជំទាវ អគ្គលេខាធិការរងទី១ បានពាំនាំប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំផ្ញើសួរសុខទុក្ខ ក្តីអាណិតអាសូរ និងលើកទឹកចិត្តដល់ក្មួយស្រី ត្រូវមានស្មារតីរឹងប៉ឹង តស៊ូរស់នៅបន្តទៅមុខទៀត។ ទន្ទឹមនឹងនេះ លោកជំទាវ ក៏បានផ្តាំផ្ញើដល់ក្មួយស្រី ត្រូវថែទាំសុខភាពឱ្យបានល្អ រស់នៅមានអនាម័យ ដើម្បីជៀសផុតពីជំងឺផ្សេងៗផងដែរ។

យុវតី បុប្ផា មានក្តីរំភើបរីករាយដោយទទួលបានការលើកទឹកចិត្ត ជួយគាំទ្រស្មារតី និងផ្លូវចិត្ត ក៏ដូចជាការជួយសម្រាលការលំបាកខាងផ្នែកជីវភាព ពីកាកបាទក្រហមកម្ពុជា ជាពិសេសការគិតគូរ យកចិត្តទុកដាក់ពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលតែងតែគិតគូរពីសុខទុក្ខរបស់ប្រជាជនជួបការលំបាកដោយគ្មានការរើសអើងអ្វីឡើយ។

សូមបញ្ជាក់ថា អំណោយកាកបាទក្រហមកម្ពុជា ផ្តល់ជូនគ្រួសារខាងលើរួមមាន៖ អង្ករ មី ត្រីខ ត្រីងៀត សាច់ក្រក ទឹកត្រី ទឹកស៊ីអ៊ីវ ទឹកដោះគោប្រអប់ ស្ករស ទឹកបរិសុទ្ធ មុង ភួយ សារុង ក្រមា និងថវិកា ១លានរៀល៕