ឯកឧត្តមបណ្ឌិតសភាចារ្យ ហង់ជួន ណារ៉ុន ចុះទស្សនកិច្ចពិនិត្យវឌ្ឍនភាពការងារអប់រំ នៅសាលាបឋមសិក្សាក្តាំងងា ស្រុកឯកភ្នំ ខេត្តបាត់ដំបង

ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នាថ្ងៃទី២០ ខែឧសភា ឆ្នាំ២០២៤ បានដឹកនាំប្រតិភូទស្សនកិច្ចពិនិត្យវឌ្ឍនភាព ការងារអប់រំនៅសាលាបឋមសិក្សាក្តាំងងា ស្រុកឯកភ្នំ ខេត្តបាត់ដំបង ដោយមានការចូលរួមអមដំណើរដោយ ឯកឧត្តម លោកជំទាវ ថ្នាក់ដឹកនាំក្រសួង លោក លោកស្រី មន្ត្រីពាក់ព័ន្ធក្រោមឱវាទក្រសួង គណៈគ្រប់គ្រងសាលា លោកគ្រូ អ្នកគ្រូ តំណាងសហគមន៍ និងអាជ្ញាធរដែនដី។

ក្រោមការជួយគាំទ្រពីគម្រាង GEIP គណៈគ្រប់គ្រងសាលាបឋមសិក្សាក្តាំងងា បានទទួលការបណ្ដុះបណ្ដាលទៅលើវិធីសាស្រ្ដបង្រៀនផ្សេងៗ ដើម្បីជួយដល់ការបង្រៀនឱ្យមានប្រសិទ្ធិភាព និងផ្ដល់យុទ្ធសាស្រ្ដផ្សេងៗដែលអាចជួយឱ្យលទ្ធផលសិក្សាសិស្សកាន់តែល្អប្រសើរបន្ថែមទៀត។

ឆ្លៀតក្នុងឱកាសនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និងវាយតម្លៃខ្ពស់ចំពោះគណៈគ្រប់គ្រងលោកគ្រូ អ្នកគ្រូ ដែលបានផ្ដួចផ្ដើមគំនិតបង្រៀនពេញមួយថ្ងៃនៅសាលាបឋមសិក្សា ក្ដាំងងា ដែលអនុញ្ញតឱ្យសិស្សនុសិស្សអាចបង្កើនចំណេះដឹង និងរៀនសូត្របន្ថែមនូវអ្វីដែលខ្វះខាត។

ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានបន្ថែមទៀតថា ការយល់ដឹងពីសារៈសំខាន់នៃការសិក្សារៀនសូត្រពីថ្នាក់មត្តេយ្យសិក្សា របស់អាណាព្យាបាល ក៏ជារឿងដ៏សំខាន់ដែលអាចឱ្យក្មេងទទួលបានបំណិនផ្សេងៗ និងបណ្ដុះគំនិតនៃការស្រលាញ់ការសិក្សា។ មួយវិញទៀត ការយល់ដឹងពីសារៈសំខាន់នៃការសិក្សារបស់ឪពុកម្ដាយ ឬអាណាព្យាបាល និងសហគមន៍ជុំវិញ នឹងបើកឱកាសដល់កុមារគ្រប់រូប អាចរៀនសូត្របានចាប់តាំងពីថ្នាក់មេត្តយ្យសិក្សារហូតដល់ថ្នាក់ឧត្តមសិក្សា ដើម្បីជាកម្លាំងចលនាក្នុងការអភិវឌ្ឍជាតិមាតុភូមិ។

ជាទីបញ្ចប់ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានលើកទឹកចិត្តសាលាឱ្យបន្តខិតខំប្រឹងប្រែង និងបន្ដជួយជំរុញការសិក្សាពេញមួយថ្ងៃ ដើម្បីទទួលបានលទ្ធផលកាន់តែល្អប្រសើរជាងនេះ។ ដោយឃើញអំពីសក្ដានុពលនៃ និងការប្ដេជ្ញាចិត្តពីគណៈគ្រប់គ្រង គណៈកម្មការគ្រប់គ្រងសាលារៀន លោកគ្រូ អ្នកគ្រូ សាលាបឋមសិក្សាក្តាំងងា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី សង្ឃឹមយ៉ាងមុតមាំថាសាលានេះនឹងអាចសម្រេចបានក្លាយជាសាលារៀនគំរូនាពេលអនាគត៕