គណៈប្រតិភូសភាកម្ពុជា អញ្ជើញចូលរួមពិធីបើកកិច្ចប្រជុំសភាក្នុងឱកាសនៃ “វេទិកាទឹកពិភពលោកលើកទី១០”

ភ្នំពេញ៖ នាថ្ងៃទី២០-២១ ខែឧសភា ឆ្នាំ២០២៤ នៅកោះបាលី សាធារណរដ្ឋឥណ្ឌូនេស៊ី គណៈប្រតិភូសភាកម្ពុជា ដឹកនាំដោយ​ ឯកឧត្តមបណ្ឌិត ម៉ុង ឫទ្ធី ប្រធានគណៈកម្មការទី៣ ព្រឹទ្ធសភា (ប្រធានគណៈប្រតិភូ) និងឯកឧត្តម ឃុត ចាន់ដារ៉ា សមាជិកគណៈកម្មការទី៩ រដ្ឋសភា បានចូលរួម “កិច្ចប្រជុំសភាក្នុងឱកាសវេទិកាទឹកពិភពលោកលើកទី១០” (Parliamentary Meeting on the Occasion of the 10th World Water Forum) របស់សហភាពអន្តរសភា (IPU) ដែលមានការអញ្ជើញចូលរួមពីឥស្សរជនសំខាន់ៗនាពិធីបើក និងបិទវេទិកាដូចជា៖

-លោកជំទាវ Puan Maharani ប្រធានសភាសាធារណរដ្ឋឥណ្ឌូនេស៊ី
-ឯកឧត្តម Fadli Zon សមាជិកសភានៃសភាតំណាងសាធារណរដ្ឋឥណ្ឌូនេស៊ី និងជាសមាជិកគណៈកម្មាធិការប្រតិបតិ្ត IPU
-ឯកឧត្តម Loïc Fauchon ប្រធានក្រុមប្រឹក្សាទឹកពិភពលោក និងប្រតិភូមកពី ៤៩ប្រទេស និងអង្គការធំៗចំនួន៧ ដូចជាAAWC, AIPA, IPU, United Nation UN Water,​ FAO and Solar Chapter organization ។

បន្ទាប់ពិធីបើកនៃកិច្ចប្រជុំ គណៈប្រតិភូសភាកម្ពុជាបានអញ្ជើញចូលរួមកិច្ចពិភាក្សាអំពី៖
១.ការទទួលបានទឹកស្អាត និងអនាម័យ៖ ឧបសគ្គនៃការសម្រេចបានការអភិវឌ្ឍប្រកបដោយចីរភាព
២.ការអនុវត្តប្រកបដោយនវានុវត្តន៍
៣.ទឹកគឺជាបេះដូងនៃវិធានការលើអាកាសធាតុ
៤.ការទូតទឹក, កិច្ចសហប្រតិបត្តិការ, និងវិទ្យាសាស្រ្ត ដើម្បីសន្តិភាព ដែលជារួមផ្តោតលើសកម្មភាពដែលស្ថាប័នសភាអាចចូលរួមក្នុងកម្រិតមូលដ្ឋាន កម្រិតស្ថាប័ន កម្រិតជាតិ និងកម្រិតអន្តរជាតិ ដើម្បីជំរុញការសម្រេចការទទួលបានទឹកស្អាត ប្រកបដោយបរិយាប័ន្ន និងសមភាព ៕