រដ្ឋមន្ត្រីក្រសួងអប់រំ ចុះពិនិត្យវឌ្ឍនភាពការសាងសង់អគារសិក្សាថ្មី និងសំណេះសំណាល ជាមួយលោកគ្រូ អ្នកគ្រូ នៅអនុវិទ្យាល័យផ្សារព្រំ ស្រុកសាលាក្រៅ ខេត្តប៉ៃលិន

ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នាថ្ងៃទី២០ ខែឧសភា ឆ្នាំ២០២៤ បានដឹកនាំប្រតិភូទស្សនកិច្ច ចុះពិនិត្យវឌ្ឍនភាពការសាងសង់អគារសិក្សាថ្មី និងសំណេះសំណាល ជាមួយលោកគ្រូ អ្នកគ្រូ នៅអនុវិទ្យាល័យផ្សារព្រំ ស្រុកសាលាក្រៅ ខេត្តប៉ៃលិន ដោយមានការចូលរួមដោយ ឯកឧត្តម លោកជំទាវ ថ្នាក់ដឹកនាំក្រសួង លោកជំទាវ អភិបាលនៃគណៈអភិបាលខេត្ត លោក លោកស្រី មន្ត្រីពាក់ព័ន្ធក្រោមឱវាទក្រសួង គណៈគ្រប់គ្រងសាលា លោកគ្រូ និងអ្នកគ្រូ អាជ្ញាធរដែនដី។

បច្ចុប្បន្ននៅក្នុងអនុវិទ្យាល័យផ្សារព្រំ កំពុងតែដំណើរការសាងសង់អគារសិក្សាថ្មី ចំនួន ០២ ខ្នង ស្មើនឹង ៦០ បន្ទប់ និងទីចាត់ការ ០២ ខ្នង ដែលជាអំណោយដ៏ថ្លៃថ្លាបំផុត របស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភា នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ។

ឆ្លៀតក្នុងឱកាសនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានអបអរសាទរដល់ខេត្តប៉ៃលិន ដែលជាខេត្តមួយទទួលបានសាលាគំរូច្រើន ក្រោមការដឹកនាំរបស់ លោកជំទាវបណ្ឌិត អភិបាលនៃគណៈអភិបាលខេត្ត។ បន្ថែមពីនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានថ្លែងអំណរគុណយ៉ាងជ្រាលជ្រៅចំពោះ គណៈគ្រប់គ្រងសាលា លោកគ្រូ អ្នកគ្រូ និងគ្រប់ភាគីពាក់ព័ន្ធ ដែលបានខិតខំប្រឹងប្រែងចូលរួមចំណែកទាំងកម្លាំងកាយ កម្លាំងចិត្តក្នុងការអភិវឌ្ឍវិស័យអប់រំនៅកម្ពុជា ជាពិសេសក្នុងខេត្តប៉ៃលិនទាំងមូល៕