ឯកឧត្ដម ស្វាយ សំអ៊ាង អញ្ជើញបន្តយុទ្ធនាការ ឃោសនាបោះឆ្នោតជ្រើសរើសក្រុមប្រឹក្សាខេត្ត ក្រុមប្រឹក្សាស្រុក អាណត្តិទី៤

ភ្នំពេញ៖ ឯកឧត្ដម ស្វាយ សំអ៊ាង សមាជិកគណៈកម្មាធិការកណ្តាល គណបក្សប្រជាជនកម្ពុជា និងជាប្រធានគណៈកម្មាធិការគណបក្សប្រជាជនកម្ពុជាខេត្តស្ទឹងត្រែង នាថ្ងៃទី២១ ខែឧសភា ឆ្នាំ២០២៤នេះ បានអញ្ជើញបន្តយុទ្ធនាការ ឃោសនាបោះឆ្នោតជ្រើសរើសក្រុមប្រឹក្សាខេត្ត ក្រុមប្រឹក្សាស្រុក អាណត្តិទី៤ ឆ្នាំ២០២៤ ។ ពិធីនេះរៀបចំឡើងនៅទីស្នាក់ការគណបក្សប្រជាជនកម្ពុជា ស្រុកសៀមបូក ។

ពិធីនេះក៏មានការអញ្ជើញចូលរួមពីសំណាក់ឯកឧត្ដម ឈាង ឡាក់ សមាជិកគណៈកម្មាធិការកណ្តាល គណបក្សប្រជាជនកម្ពុជា និងជាអនុប្រធានគណៈកម្មាធិការ គណបក្សប្រជាជនកម្ពុជាខេត្តស្ទឹងត្រែង និងឯកឧត្ដម សេន សុវណ្ណ អនុប្រធានក្រុមការងារគណបក្ស ចុះមូលដ្ឋានខេត្តស្ទឹងត្រែង ព្រមទាំងសមាជិក សមាជិការគណបក្សសរុប ១០២នាក់ (ស្រី២៣នាក់) ។

របៀបវារៈសំខាន់ៗនៃពិធីនេះរួមមាន៖ ១.ប្រកាសហេតុ ប្រកាសសមាសភាពគណៈអធិបតី និងភ្ញៀវចូលរួម , ២.គោរពទង់ជាតិ និងទង់បក្សបើកកម្មវិធី, ៣.មតិស្វាគមន៍ និងអានសារលិខិតរបស់សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា ក្នុងឱកាសបើកយុទ្ធនាការឃោសនាបោះឆ្នោត ជ្រើសរើសក្រុមប្រឹក្សាខេត្ត ក្រុមប្រឹក្សាក្រុង ស្រុក អាណត្តិទី៤ ឆ្នាំ២០២៤ ដោយលោក សួង ហ៊ី ប្រធានគណៈកម្មការធិការគណបក្សស្រុកសៀមបូក, ៤.ប្រកាសបេក្ខជនពេញសិទ្ធិ សមាជិកក្រុមប្រឹក្សាខេត្ត និងក្រុកប្រឹក្សាស្រុក អាណ្តិទី៤ ដោយឯកឧត្ដម ប៉ែន លីណាត សមាជិកគណៈអចិន្ត្រៃគណបក្សខេត្ត និងជាអនុប្រធានក្រុមការងារ ចុះជួយមូលដ្ឋានស្រុកសៀមបូក, ៥.បោះឆ្នោតសាកល្បង, ៦.ចំណាប់អារម្មណ៍របស់អង្គបោះឆ្នោត ដោយលោក អ៊ាង សំអូន មេឃុំស្រែក្រសាំង, ៧.ចំណាប់អារម្មណ៍តំណាងបេក្ខជនឈរឈ្មោះបោះឆ្នោតជ្រើរើស ក្រុមប្រឹក្សាស្រុកអាណត្តិទី៤ ដោយលោក កែវ ប៊ុនរឿន អនុប្រធានគណៈកម្មាធិការគណបក្សស្រុក និងជាបេក្ខភាពពេញសិទ្ធិ ក្រុមប្រឹក្សាស្រុកអាណត្តិទី៤, ៨.ចំណាប់អារម្មណ៍របស់តំណាងអង្គបោះឆ្នោតតាមឃុំទាំង៧ តាមលំដាប់, ៩.ការប្ដេជ្ញាចិត្តរបស់បេក្ខភាពឈរឈ្នោះសម្រាប់ក្រុមប្រឹក្សាខេត្ត ដោយឯកឧត្ដម ឈាង ឡាក់ សមាជិកគណៈកម្មាធិការកណ្ដាល អនុប្រធានគណៈកម្មាធិការគណបក្សខេត្ត និងជាប្រធានគណៈប្រចាំការគណបក្សខេត្ត ។

មានមតិសំណេះសំណាលក្នុងឱកាសនោះ ឯកឧត្ដម ស្វាយ សំអ៊ាង បានថ្លែងកោតសរសើរ ចំពោះក្រុមការងារចុះជួយមូលដ្ឋានស្រុកសៀមបូក ដែលបានបំពេញការងារបានយ៉ាងល្អ ក្នុងការជួយប្រជាពលរដ្ឋ ដែលបានធ្វើអោយគណបក្សប្រជាជនកម្ពុជា ទទួលបានជ័យជំនះរហូត ក្នុងការបោះឆ្នោត ហើយនៅពេលបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សា ខណ្ឌ អាណត្តិទី៤ ឆ្នាំ២០២៤ នាថ្ងៃទី២៦ ឧសភា ខាងមុខនេះ សមាជិក សមាជិកា នឹងបោះឆ្នោតជូនគណបក្សប្រជាជនកម្ពុជា ឲ្យទទួលបានជ័យជំនះបន្តទៀត។

ព្រមជាមួយនេះ ឯកឧត្ដម ស្វាយ សំអ៊ាង ក៏បានថ្លែងអំណរគុណ និងវាយតំលៃខ្ពស់ចំពោះសមាជិកក្រុមប្រឹក្សាឃុំ មកពីគណបក្សប្រជាជនកម្ពុជាទូទាំងខេត្តស្ទឹងត្រែង ដែលបាន យកអស់កំលាំងកាយ ប្រាជ្ញាស្មារតីក្នុងការបំពេញភារកិច្ចបម្រើប្រជាជន ប្រកបដោយការទទួលខុស ត្រូវខ្ពស់និងបានចូលរួមយ៉ាងសកម្មក្នុងដំណើរការបោះឆ្នោតព្រឹទ្ធសភា ធ្វើឱ្យគណបក្សប្រជាជនកម្ពុជា ទទួលបានជោគជ័យយ៉ាងត្រជះត្រចង់ ក្នុងការបោះឆ្នោតព្រឹទ្ធសភានីតិកាលទី៥ ដោយបានកាន់ កាប់អសនៈចំនួន៥៥ លើអសនៈ៥៨ ដែលត្រូវបោះឆ្នោត។ តាមរយៈជោគជ័យនេះ សម្តេចតេជោ ហ៊ុន សែន ប្រធានគណបក្សរបស់យើង បានកាន់កាប់មុខតំណែងជាប្រធាន ព្រឹទ្ធសភា ដែលនឹងទទួលតួនាទីជាប្រមុខរដ្ឋស្តីទីក្នុងពេលព្រះមហាក្សត្រទ្រង់អវត្តមាន។ ព្រមជាមួយនេះ ឥស្សរជនមកពីគណបក្សប្រជាជនកម្ពុជា ក៏បានកាន់កាប់មុខតំណែងជាអនុប្រធានទី១ អនុប្រធានទី២ នៃព្រឹទ្ធសភា និងប្រធានគណកម្មការនានានៃព្រឹទ្ធសភានីតិកាលទី៥ ផងដែរ។

ឯកឧត្ដមបានលើកឡើងថា តួនាទីរបស់យើង គឺត្រូវមើលថែគ្នា ដោយគណបក្សប្រជាជនកម្ពុជា ជាមហាគ្រួសារ មានទុក្ខ គឺត្រូវតែជួយគ្នា យើងមានលទ្ធភាពគ្រប់គ្រាន់ ដើម្បីជួយសង្គ្រោះគ្នា។ អ្វីដែលសំខាន់ គឺក្តាប់ព័ត៌មានឲ្យបានច្បាស់ មានបញ្ហាអ្វីយើងអាចជួយគ្នាបានទាន់ពេល។

ឯកឧត្ដមស្វាយ សំអ៊ាង បញ្ជាក់ថា រថយន្តខូចអាចទុកចោលបាន តែមនុស្សឈឺហើយ គឺមិនអាចទុកចោលនោះទេ ត្រូវតែជួយសង្គ្រោះឲ្យបានទាន់ពេលវេលា បើអញ្ចឹងទេ នឹងអាចស្លាប់បាន។ ឯកឧត្ដមបន្តថា បើមានសមាជិក សមាជិកាយើងណាម្នាក់មានទុក្ខ ឈឺស្កាត់ ខ្វះលទ្ធភាពក្នុងការព្យាបាល ទោះយប់ ឬថ្ងៃក៏ដោយ សុំទាក់ទងមកលោកភ្លាមៗ ដើម្បីរិះរកវិធីដោះស្រាយ ឬសង្គ្រោះឲ្យបានទាន់ពេលវេលា។

ឯកឧត្ដមប្រធានគណៈកម្មាធិការគណបក្សប្រជាជនកម្ពុជាខេត្តស្ទឹងត្រែង បានគូសបញ្ជាក់ថា ការបោះឆ្នោតព្រឹទ្ធសភា យើងទទួលបានជោគជ័យ ដោយគណបក្សផ្សេង គេក៏បោះឆ្នោតឲ្យយើងដែរ នោះដោយសារគេគោរពស្រលាញ់ ពីការដឹកនាំប្រទេសជាតិរបស់សម្តេចតេជោ ហ៊ុន សែន ល្អធ្វើឲ្យប្រទេសជាតិ មានការអភិវឌ្ឍរីកចំរើនជឿនលឿន៕