ឯកឧត្តម ស្វាយ សំអ៊ាង អំពាវនាវឲ្យអង្គបោះឆ្នោត របស់បក្សប្រជាជន និងអង្គបោះឆ្នោតផ្សេងៗ បោះឆ្នោតជូនបក្សប្រជាជន ដើម្បីរួមគ្នាអភិវឌ្ឍជាតិ ឱ្យកាន់តែមានការរីកចម្រើនរុងរឿងបន្ថែមទៀត
ភ្នំពេញ៖ ឯកឧត្តម ស្វាយ សំអ៊ាង សមាជិកគណៈកម្មាធិការកណ្តាល ប្រធានគណៈកម្មាធិការគណបក្សខេត្តស្ទឹងត្រែង និងជាប្រធានគណៈពង្រឹងចុះជួយស្រុកសេសាន នៅព្រឹកថ្ងៃទី២២ ខែឧសភា ឆ្នាំ២០២៤ បានអញ្ជើញដឹកនាំយុទ្ធនាការឃោសនាបោះឆ្នោតជ្រើសរើសក្រុមប្រឹក្សាខេត្ត ក្រុង ស្រុក ខណ្ឌ ក្នុងស្រុកសេសាន ខេត្តស្ទឹងត្រែង។ ដោយមានការអញ្ជើញចូលរួមពី ឯកឧត្តមប្រធានប្រចាំគណៈការកម្មាធិការគណបក្សខេត្ត, ប្រធានគណៈកម្មាធិការគណបក្សស្រុក និងសមាជិក សមាជិការគណបក្សប្រជាជនកម្ពុជាស្រុក សរុបចំនួន ៨២នាក់។
ជាកិច្ចចាប់ផ្តើម លោក សុវណ្ណ ពិសេដ្ឋ សមាជិកគណៈកម្មាធិការបក្សខេត្ត និងជាប្រធានគណៈកម្មាធិការគណបក្សស្រុកសេសាន បានឡើងមានមតិស្វាគមន៍ ជូនគណៈអធិបតី បន្ទាប់មក ឯកឧត្តម ហាក វិមាន សមាជិកអចិន្ត្រៃយ៍គណៈកម្មាធិការគណបក្សខេត្ត និងប្រធានគណៈចាត់តាំងគណបក្សខេត្តស្ទឹងត្រែង បានឡើងឧទ្ទេសនាមបេក្ខភាពក្រុមប្រឹក្សាខេត្ត និងឯកឧត្តម ឈាង ឡាក់ សមាជិកគណៈកម្មាធិការកណ្តាលគណបក្ស និងជាប្រធានប្រចាំការនៃគណៈកម្មាធិការគណបក្សខេត្តស្ទឹងត្រែង បានមានមតិចំណាប់អារម្មណ៍ រួចមក ឯកឧត្តម ស្វាយ សំអ៊ាង បានលើកឡើងថា៖ គណបក្សប្រជាជនកម្ពុជាតែងតែគិតគូរពីផលប្រយោជន៍ជាតិ និងប្រជាជនជានិច្ច ហើយរាជរដ្ឋាភិបាលដឹកនាំដោយគណបក្សប្រជាជនកម្ពុជាបានដាក់ចុះនូវគោលនយោបាយ និងយុទ្ធសាស្ត្រនយោបាយដែលមានភាពប្រាកដនិយម ជាក់ស្តែង និងឈរលើតម្រូវការរបស់ប្រជាពលរដ្ឋពិតប្រាកដ ។
ឯកឧត្តម ស្វាយ សំអ៊ាង បានឱ្យដឹងថា អង្គបោះឆ្នោតដែលជាសមាជិកសមាជិកាក្រុមប្រឹក្សាឃុំសង្កាត់ក្នុងតំណែងជាតួអង្គយ៉ាងសំខាន់ក្នុងដំណើរការបោះឆ្នោតក្រុមប្រឹក្សាខេត្ត និងក្រុមប្រឹក្សាក្រុងស្រុក, ជាសំឡេងដែលតំណាងឱ្យប្រជាពលរដ្ឋនៅក្នុងឃុំរបស់ខ្លួនដើម្បីបោះឆ្នោតជ្រើសរើសសមាជិកក្រុមប្រឹក្សាខេត្ត និងក្រុមប្រឹក្សាស្រុកដើម្បីចូលរួមបំពេញតួនាទីដឹកនាំនិងអភិវឌ្ឍមូលដ្ឋានខេត្ត ស្រុក ក្រុងរបស់ខ្លួនឱ្យរីកចម្រើនស្របតាមយុទ្ធសាស្ត្រនយោបាយរបស់រាជរដ្ឋាភិបាល ។
ឯកឧត្តម ស្វាយ សំអ៊ាង បានអំពាវនាវដល់អង្គបោះឆ្នោតទាំងអស់របស់គណបក្ស
ប្រជាជនកម្ពុជា និងអង្គបោះឆ្នោតផ្សេងៗបោះឆ្នោតជូនគណបក្សប្រជាជនកម្ពុជាដើម្បីរួមគ្នាអភិវឌ្ឍជាតិឱ្យកាន់តែមានការរីកចម្រើនរុងរឿងបន្ថែមទៀត ។
ឯកឧត្តមបានលើកឡើងថា គណបក្ស
ប្រជាជនកម្ពុជាតែងតែគិតគូរពីផល
ប្រយោជន៍ជាតិនិងប្រជាជនជានិច្ច ហើយរាជរដ្ឋាភិបាលដឹកនាំដោយគណបក្សប្រជាជនកម្ពុជាបានដាក់ចុះនូវគោលនយោបាយ និងយុទ្ធសាស្ត្រនយោបាយដែលមានភាពប្រាកដនិយម ជាក់ស្តែងនិងឈរលើតម្រូវការរបស់ប្រជាពលរដ្ឋពិតប្រាកដ ។
ឯកឧត្តមបានថ្លែងអំណរគុណដល់អង្គបោះ
ឆ្នោតទាំងអស់ដែលបានបោះឆ្នោតគាំទ្រគណបក្សប្រជាជនកម្ពុជាក្នុងការបោះឆ្នោតព្រឹទ្ធសភាកាលពីខែកុម្ភៈ ឆ្នាំ២០២៤ កន្លងទៅ ។
ឯកឧត្ត ស្វាយ សំអ៊ាង បានគូសបញ្ជាក់ថា គណបក្សប្រជាជនកម្ពុជាឈ្នះការបោះឆ្នោតដឹកនាំប្រទេស, បានដឹកនាំអភិវឌ្ឍកម្ពុជាឱ្យរីកចម្រើនជាមួយកំណើនសេដ្ឋកិច្ចស្ទុះខ្លាំងប្រមាណជាង ៧% ក្នុងមួយឆ្នាំ រយៈពេលជាង២០ឆ្នាំក្រោយពីកម្ពុជាមានសុខសន្តិភាពពេញលេញនៅខែធ្នូ ឆ្នាំ១៩៩៨។ គណបក្សប្រជាជនកម្ពុជាឈ្នះការបោះឆ្នោត បានអនុញ្ញាតឱ្យរដ្ឋាភិបាលគណបក្សប្រជាជនកម្ពុជាអភិវឌ្ឍប្រទេសលើគ្រប់វិស័យ និងពង្រឹងឯករាជភាពជាតិ និងការពារបូរណភាពដែនដី និងអធិបតេយ្យភាពជាតិ និងធ្វើឱ្យជីវភាពពលរដ្ឋមានការរីកចម្រើន ថែរក្សាបានសុខសន្តិភាពពេញលេញ។ ជាមួយសន្តិភាព និងការដឹកនាំរបស់គណបក្សប្រជាជនកម្ពុជា, កម្ពុជាមានលទ្ធភាពនិងសមត្ថភាពគ្រប់គ្រាន់ក្នុងការអភិវឌ្ឍប្រទេស។ ក្នុងនាមសមាជិកសមាជិកាគណបក្សប្រជាជនកម្ពុជាសូមប្រកាសគាំទ្រពេញទំហឹងគម្រោងព្រែកជីកហ្វូណនតេជោ ដែលជាគម្រោង ផ្តួចផ្តើមឡើងដោយសម្តេចតេជោ ហ៊ុន សែន និងបន្តអនុវត្តដោយសម្តេចធិបតី ហ៊ុន ម៉ាណែត ហើយគម្រោងនេះបានផ្តល់ផលប្រយោជន៍យ៉ាងច្រើនដល់សេដ្ឋកិច្ចជាតិ និងផ្តល់នូវឯលរាជភាពផ្នែកនយោបាយដឹកជញ្ជូនរបស់កម្ពុជា។
ឯកឧត្តម ស្វាយ សំអ៊ាង ក៏បានស្នើឱ្យអង្គបោះឆ្នោតថែរក្សាសុខភាព និងត្រៀមឯកសារពាក់ព័ន្ធដើម្បីត្រៀមចូលរួមការបោះឆ្នោត និងសូមបោះឆ្នោតជូនគណបក្សប្រជាជនកម្ពុជានៅក្នុងថ្ងៃបោះឆ្នោតក្រុមប្រឹក្សាខេត្ត ក្រុមប្រឹក្សាក្រុងស្រុកនៅថ្ងៃទី២៦ ខែឧសភា ឆ្នាំ២០២៤ ខាងមុខ ៕
