សម្តេចតេជោ ហ៊ុន សែន៖ ខ្ញុំពិតជាមិនអាច អនុវត្តវប្បធម៌សន្ទនា ជាមួយអ្នកនយោបាយក្បត់ជាតិ

ភ្នំពេញ៖ សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា បានបញ្ជាក់ថា សម្ដេចមិនអាចអនុវត្តវប្បធម៌សន្ទនា ជាមួយក្រុមអ្នកនយោបាយក្បត់ជាតិ ដែលបានវាយប្រហារលើសម្ដេចនិងគ្រួសាររបស់សម្ដេចនោះទេ ។

ក្នុងឱកាសអញ្ជើញបិទសន្និសីទលើកទី១ ស្តីពីអនាគតកម្ពុជាគ្មានអំពើប្រល័យពូជសាសន៍ នាថ្ងៃទី២២ ខែឧសភា ឆ្នាំ២០២៤ សម្ដេចតេជោ ហ៊ុន សែន បានថ្លែងថា ការបង្កើតវប្បធម៌សន្ទនាគឺមានសង្គតិភាពជាមួយនឹងការបង្កើតលទ្ធិប្រជាធិបតេយ្យ សេរី និងពហបក្ស ដោយគោរពគោលការណ៍នីតិរដ្ឋ ដូចមានចែងក្នុងរដ្ឋធម្មនុញ្ញនៃព្រះរាជាណាចក្រកម្ពុជា។

សម្ដេចតេជោបញ្ជាក់ថា «យ៉ាងណាក្ដី ខ្ញុំពិតជាមិនអាចអនុវត្តវប្បធម៌សន្ទនាជាមួយអ្នកនយោបាយក្បត់ជាតិ ដែលបានវាយប្រហារលើរូបខ្ញុំនិងគ្រួសារខ្ញុំឥតឈប់ឈរនោះទេ ទោះបីជាខ្ញុំធ្លាប់សុខចិត្តទទួលអ្នកនយោបាយជ្រុលនិយមនេះក្នុងមនោសញ្ចេតនាជាមហាគ្រួសារខ្មែរក៏ដោយ។ ជនម្នាក់នេះនៅតែចិញ្ចឹមចិត្តកម្ចាត់រាជរដ្ឋាភិបាលដឹកនាំដោយគណបក្សប្រជាជនកម្ពុជា ពោលគឺនៅតែប្រកាន់ខ្ជាប់នូវមនោគមវិជ្ជានិងវប្បធម៌នយោបាយជ្រុលនិយម និងហិង្សានិយម ដែលគ្មានខុសអ្វីពីមនោគមវិជ្ជាហិង្សបង្ហូរឈាមពីអតីតកាលនោះទេ» ។

សម្ដេចបន្តថា សន្តិភាពនៅកម្ពុជាមិនមែនជាទ្រព្យដែលធ្លាក់ពីលើមេឃនោះទេ សន្តិភាពគឺជាសមិទ្ធផលដែលគ្រប់ភាគីសម្រេចបានដោយលំបាកបំផុត ដោយឆ្លងកាត់ការតស៊ូ ការចរចាដ៏តានតឹងជាច្រើនឆ្នាំប្រកបដោយបញ្ញាញាណ ព្រមទាំងការប្ដេជ្ញាចិត្តមុះមុត ការអត់ធ្មត់ ការទប់ទល់នឹងខ្មែរគ្នាឯងផង និងការទប់ទល់តតាំងនឹងប្រទេសមហាអំណាចតូចធំផង ៕