សម្តេចធិបតី៖ ប្រទេសរីកចម្រើន តម្លៃថ្លៃសេវាសុខាភិបាល ក៏ត្រូវតែឡើងថ្លៃ តាមការធ្វើទំនើបកម្ម ប៉ុន្តែត្រូវរកវិធីទប់កុំឲ្យលុយពលរដ្ឋ ចេញពីហោប៉ៅខ្ពស់ពេក
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា ឲ្យតែប្រទេសរីកចម្រើន តម្លៃថ្លៃសេវាសុខាភិបាល ក៏ត្រូវតែឡើងថ្លៃដែរ ទៅតាមការធ្វើទំនើបកម្មសេវា ប៉ុន្តែត្រូវរកវិធីទប់កុំឲ្យលុយប្រជាពលរដ្ឋ ចេញពីហោប៉ៅខ្ពស់ពេក។
ក្នុងឱកាសអញ្ជើញប្រកាសដាក់ឲ្យអនុវត្ត ជាផ្លូវការផែនទីបង្ហាញ ផ្លូវ ឆ្ពោះទៅ ការគ្របដណ្តប់សុខភាពជាសកលនៅកម្ពុជា ឆ្នាំ២០២៤-២០៣៥ នាថ្ងៃទី២៣ ខែឧសភា ឆ្នាំ២០២៤ សម្តេចធិបតី ហ៊ុន ម៉ាណែត បានបញ្ជាក់ថា «ប្រទេសរីកចម្រើន ជីវភាពក៏ឡើង ហើយតម្លៃថ្លៃនៃសេវាសុខភាពក៏ឡើងដែរ វាត្រូវតែចឹង ថ្លៃនៃការថែទាំសុខភាព និងឡើងជៀសមិនផុត ព្រោះពេទ្យត្រូវវិនិយោគ ទៅលើឧបករណ៍ដែលមានថ្លៃ ហើយថ្នាំក៏កាន់តែថ្លៃ ទៅលើសេវាពេទ្យដែលកាន់តែថ្លៃ បុគ្គលិកក៏កាន់តែថ្លៃ ដើម្បីផ្តល់សេវា»។
សម្តេចធិបតី មានប្រសាសន៍ថា ប្រព័ន្ធគាំពារសង្គម ដែលកម្ពុជាកំពុងតែរៀបចំរាល់ថ្ងៃនេះ គឺដើម្បីព្យាករទៅអនាគត បានន័យថា ពេលដែលតម្លៃការថ្លៃឡើង ទៅរករូបមន្តណា ដើម្បីឲ្យប្រជាជនចេញពីហោប៉ៅយ៉ាងច្រើនបំផុត ត្រឹម៣៥% តាមរយៈការបង្កើតកម្មវិធី និងរូបមន្តផ្សេងៗ ដែលបានដាក់ចេញដូចជា៖ របបសន្តិសុខសង្គម ប.ស.ស បដិភាគ ជាដើម។
សម្តេចធិបតី គូសបញ្ជាក់ថា «យើងមិនអាចហាម មិនឲ្យតម្លៃថ្លៃ ការផ្តល់សេវាសុខាភិបាលកើនទេ ចឹងទាល់តែយើងព្រមទទួលថា មិនឲ្យគុណភាពកើន តែយើងត្រូវធ្វើយ៉ាងម៉េចធានាថា ការចំណាយចេញពីហោប៉ៅរបស់ប្រជាពលរដ្ឋ ត្រូវមានអ្វីជួយប៉ះប៉ូវគាត់ ឲ្យគាត់បានទទួលលទ្ធភាព ទទួលសេវាថ្លៃ តែបង់ថោក នេះគឺជាអ្វីដែលយើង ដាក់ចេញផែនទីបង្ហាញផ្លូវថ្ងៃនេះ គឺសម្រាប់អនុវត្ត» ៕
