ឯកឧត្ដម ស្វាយ សំអ៊ាង ថ្លែងអំណរគុណក្រុមការងារជំនាញ ដែលខិតខំចាត់តាំងអនុវត្តផែនការសកម្មភាពការងារ តាមគោលការណ៍ដឹកនាំរបស់បក្ស ឆ្ពោះទៅ សម្រេចជោគជ័យក្នុងការបោះឆ្នោតជ្រើសរើសក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សា ស្រុក អាណត្តិទី៤

ភ្នំពេញ៖ ឯកឧត្តម ស្វាយ សំអ៊ាង សមាជិកគណៈកម្មាធិការកណ្ដាលគណបក្សប្រជាជនកម្ពុជា និងជាប្រធានគណៈកម្មាធិការគណបក្សប្រជាជនកម្ពុជាខេត្តស្ទឹងត្រែង បានថ្លែងអំណរគុណដល់ក្រុមការងារជំនាញរបស់គណៈបញ្ជាការ យុទ្ធនាការបោះឆ្នោតខេត្ត និងក្រុមគ្រូឧទ្ទេស-គ្រូជំនួយរបស់គណបក្សខេត្ត ដែលបានខិតខំ ចាត់តាំងអនុវត្តផែនការសកម្មភាពការងារ តាមគោលការណ៍ដឹកនាំរបស់គណបក្ស ឆ្ពោះទៅ សម្រេចបានជោគជ័យក្នុងការបោះឆ្នោតជ្រើសរើសក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សា ស្រុក អាណត្តិទី៤ ដែលនឹងប្រព្រឹត្តទៅនាថ្ងៃទី២៦ ខែឧសភា ឆ្នាំ២០២៤ ដែលនឹងឈានចូល មកដល់នៅថ្ងៃខាងស្អែកនេះ។

ក្នុងកិច្ចប្រជុំស្តីពីការសំណេះសំណាលការងារ និងណែនាំ ផ្តាំផ្ញើអំពីការ អនុវត្តតួនាទី ភារកិច្ចរបស់ភ្នាក់ងារ និងអ្នកសង្កេតការណ៍របស់គណបក្ស ក្នុងការបោះឆ្នោត និងរាប់សន្លឹកឆ្នោត នៃការបោះឆ្នោតក្រុមប្រឹក្សា នាថ្ងៃទី២៤ ខែឧសភា ឆ្នាំ២០២៤ ឯកឧត្ដម ស្វាយ សំអ៊ាង បានមានប្រសាសន៍ថា ថ្ងៃនេះក្នុងនាមថ្នាក់ដឹកនាំគណបក្សខេត្ត ឯកឧត្ដមមានសេចក្តីសោមនស្សរីករាយ ដែលចូលរួម ជាមួយឯកឧត្តម លោកជំទាវ លោក លោកស្រី ជាថ្នាក់ដឹកនាំ និងមន្ត្រីគណបក្សខេត្ត ដើម្បីជួប សំណេះសំណាលការងារ និងណែនាំ ផ្តាំផ្ញើអំពីការអនុវត្តតួនាទី ភារកិច្ចរបស់ភ្នាក់ងារ និងអ្នក សង្កេតការណ៍របស់គណបក្សយើង ក្នុងដំណើរការបោះឆ្នោត និងរាប់សន្លឹកឆ្នោត នៃការបោះ ឆ្នោតក្រុមប្រឹក្សា អាណត្តិទី៤ ឆ្នាំ២០២៤ ដែលបានរៀបចំឡើងដោយក្រុមគ្រូឧទ្ទេសគណបក្ស ខេត្តនាពេលនេះ។

ឯកឧត្ដម ស្វាយ សំអ៊ាង បានលើកឡើងថា បើតាមផែនការរបស់គណបក្សយើងបានដាក់ចេញ មុននឹងឈានមកដល់ការរៀបចំកិច្ច ប្រជុំជាមួយភ្នាក់ងារ និងអ្នកសង្កេតការណ៍របស់គណបក្ស នាថ្ងៃនេះ គឺមានបើកវគ្គបណ្តុះ បណ្តាលស្តីពីបទបញ្ជា នីតិវិធី ដំណើរការបោះឆ្នោតនិងរាប់សន្លឹកឆ្នោត តួនាទី ភារកិច្ចនិងក្រម សីលធម៌របស់ភ្នាក់ងារគណបក្ស និងអ្នកសង្កេតការណ៍បានរួចរាល់ហើយ ក្នុងនោះក្រុមការងារ ដែលបានទទួលការបណ្តុះបណ្តាល បានចូលរួមជួយសម្របសម្រួលក្នុងដំណើរការបោះឆ្នោត សាកល្បងផ្ទៃក្នុងរបស់គណបក្សយើងនៅថ្នាក់ក្រុង ស្រុកនីមួយៗផងដែរ។

ឯកឧត្តម ប្រធានគណៈកម្មាធិការគណបក្សប្រជាជនកម្ពុជាខេត្តស្ទឹងត្រែង បានគូសបញ្ជាក់ថា មុននេះក្រុមគ្រូឧទ្ទេសគណបក្សខេត្តយើង ក៏បានធ្វើសេចក្តីរាយការណ៍ និងបទបង្ហាញ អំពីឯកសារបច្ចេកទេស និងនីតិវិធីសំខាន់ៗសម្រាប់ភ្នាក់ងារគណបក្ស និងអ្នកសង្កេតការណ៍ របស់គណបក្ស ក្នុងការត្រៀមលក្ខណសម្បត្តិ និងការបំពេញតួនាទី ភារកិច្ចជាក់ស្តែងនៅក្នុង ដំណើរការបោះឆ្នោត និងរាប់សន្លឹកឆ្នោតតាមការិយាល័យទាំង៦ នៅក្នុងទូទាំងខេត្ត។

ឯកឧត្ដម ស្វាយ សំអ៊ាង បានថ្លែងបន្ថែមថា ដោយឡែកតាមរយៈការចុះជាប់មូលដ្ឋានរបស់ ថ្នាក់ដឹកនាំគណបក្សខេត្ត បានពិនិត្យ និងធ្វើការកត់សម្គាល់ ដកបទពិសោធន៍លើការងារមួយចំនួនដែលមានពាក់ព័ន្ធនឹង សភាពការណ៍រួម និងកិច្ចការបច្ចេកទេសមួយចំនួនដែលគណបក្សយើង ជាពិសេសគឺភ្នាក់ងារ គណបក្ស និងអ្នកសង្កេតការណ៍របស់យើង ត្រូវយកចិត្តទុកដាក់បន្តអនុវត្តឱ្យបានហ្មត់ចត់មាន ភាពច្បាស់លាស់ ជឿទុកចិត្ត និងធានាដល់ការទទួលបានជោគជ័យតាមការប្តេជ្ញាចិត្តជាយុទ្ធ សាស្ត្ររបស់គណបក្សបានកំណត់ដាក់ចេញជាគោលការណ៍ដឹកនាខាងនយោបាយ ៕