ឧបនាយករដ្ឋមន្ត្រី ហង់ជួន ណារ៉ុន ដឹកនាំកិច្ចប្រជុំគណៈកម្មការរួមកម្ពុជា-ថៃ ក្នុងក្របខ័ណ្ឌកិច្ចព្រមព្រៀងគម្រោង ព្រះរាជឧបត្ថម្ភដល់កម្ពុជាលើវិស័យអប់រំ

ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នាថ្ងៃទី២៤ ខែឧសភា ឆ្នាំ២០២៤ បានអញ្ជើញជាអធិបតីដឹកនាំកិច្ចប្រជុំស្ដីពីកិច្ចព្រមព្រៀងគម្រោងព្រះរាជឧបត្ថម្ភ ដល់ព្រះរាជាណាចក្រកម្ពុជាលើវិស័យអប់រំ របស់ព្រះអង្គម្ចាស់ក្សត្រី មហាចក្រី សិរិនថន នៃព្រះរាជាណាចក្រថៃ ដឹកនាំដោយ ឯកឧត្តម ឧត្តមសេនីយ៍ឯក វិឈីត យ៉ាធីប ប្រធានគម្រោងព្រះរាជឧបត្ថម្ភរបស់ព្រះអង្គម្ចាស់ក្សត្រី មហាចក្រី សិរិនថន។

កិច្ចប្រជុំផ្ដោតសំខាន់លើវឌ្ឍនភាពការអនុវត្ត ទិសដៅ និងលទ្ធភាពការបន្តកិច្ចព្រមព្រៀងកិច្ចសហប្រតិបត្តិការលើវិស័យអប់រំ រវាងគម្រោងព្រះរាជឧបត្ថម្ភ ជាមួយក្រសួងអប់រំ យុវជន និងកីឡា។

កិច្ចព្រមព្រៀងបច្ចុប្បន្នត្រូវបានអនុវត្តអស់រយៈពេល ៤ឆ្នាំមកហើយ ដោយផ្តោតលើការអភិវឌ្ឍសមត្ថភាពគ្រូបង្រៀន និងសិស្ស និស្សិត ការសាងសង់ហេដ្ឋារចនាសម្ព័ន្ធ និងការបំពាក់សម្ភារៈ ហើយនឹងផុតសុពលភាពនាថ្ងៃទី៣១ ខែសីហា ឆ្នាំ២០២៥។ ចំណុចសំខាន់ៗ ចំនួន៣ផ្សេងទៀតដែលកិច្ចប្រជុំបានពិភាក្សា រួមមាន៖

(១). ការអភិវឌ្ឍការបង្រៀន រៀន និងការអភិវឌ្ឍបុគ្គលិកអប់រំ នៃវិទ្យាស្ថានបច្ចេកវិទ្យាកំពង់ឈើទាល និងវិទ្យាស្ថានបច្ចេកវិទ្យាកំពង់ស្ពឺ ភាគីគម្រោងនឹងរៀបចំបន្តកម្មវិធីអភិវឌ្ឍន៍គុណភាពការបង្រៀន រៀន (Instructional Quality Development Program – IQDP) នៅវិទ្យាស្ថានបច្ចេកវិទ្យាកំពង់ឈើទាល និងនៅវិទ្យាស្ថានបច្ចេកវិទ្យាកំពង់ស្ពឺ។

(២). អាហារូបករណ៍ក្រោមគម្រោងព្រះរាជឧបត្ថម្ភដល់ព្រះរាជាណាចក្រកម្ពុជាលើវិស័យអប់រំ៖ ភាគីថៃនឹងផ្តល់អាហារូបករណ៍សម្រាប់ឆ្នាំ២០២៥ ជូនដល់ក្រុមគោលដៅចំនួន៣ដូចជា៖
– ក្រុមគោលដៅទី១៖ អាហារូបករណ៍សម្រាប់ការអភិវឌ្ឍបុគ្គលិកអប់រំនៃវិទ្យាស្ថានបច្ចេកវិទ្យាកំពង់ឈើទាល និងវិទ្យាស្ថានបច្ចេកវិទ្យាកំពង់ស្ពឺ។
– ក្រុមគោលដៅទី២៖ អាហារូបករណ៍សម្រាប់ការអភិវឌ្ឍសិស្ស និស្សិតនៃវិទ្យាស្ថានបច្ចេកវិទ្យាកំពង់ឈើទាល និងវិទ្យាស្ថានបច្ចេកវិទ្យាកំពង់ស្ពឺ។
– ក្រុមគោលដៅទី៣៖ អាហារូបករណ៍សម្រាប់ការអភិវឌ្ឍសិស្ស និស្សិត មន្ត្រីរាជការទូទៅ និងគ្រូឧទ្ទេសនៃវិទ្យាស្ថានគរុកោសល្យបាត់ដំបង។

(៣). ការសាងសង់ហេដ្ឋារចនាសម្ព័ន្ធវិទ្យាស្ថានបច្ចេកវិទ្យាកំពង់ឈើទាល និងវិទ្យាស្ថានបច្ចេកវិទ្យាកំពង់ស្ពឺ៖ តាមការគ្រោងទុក ការងារសាងសង់ហេដ្ឋារចនាសម្ព័ន្ធក្នុងក្របខ័ណ្ឌកិច្ចព្រមព្រៀងបច្ចុប្បន្ន នឹងបញ្ចប់នាចុងឆ្នាំ២០២៥។
ជាលទ្ធផល ភាគីទាំងពីរយល់ស្របជាគោលការណ៍ ក្នុងការបន្តកិច្ចព្រមព្រៀងកិច្ចសហប្រតិបត្តិការលើវិស័យអប់រំ រយៈពេល៣ឆ្នាំបន្តទៀត៕