ឯកឧត្តម ហ៊ុន ម៉ានី ដឹកនាំកិច្ចប្រជុំជាមួយថ្នាក់ដឹកនាំ នៃក្រុមការងារសមាជិកនីតិបុគ្គល ដែលជាអង្គការ សមាគមចំណុះគណៈកម្មាធិការកណ្តាល ស.ស.យ.ក.
ភ្នំពេញ៖ កាលពីរសៀលថ្ងៃទី២៤ ខែឧសភា ឆ្នាំ ២០២៤ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានអញ្ជើញដឹកនាំកិច្ចប្រជុំជាមួយថ្នាក់ដឹកនាំ នៃក្រុមការងារសមាជិកនីតិបុគ្គល ដែលជា អង្គការ សមាគមចំណុះគណៈកម្មាធិការកណ្តាល ស.ស.យ.ក. នៅមជ្ឃមណ្ឌលម៉ានី។
ជាកិច្ចចាប់ផ្តើម ឯកឧត្តម ហ៊ុន ម៉ានី បានសម្តែងនូវសេចក្តីសោមនស្សរីករាយចំពោះសមាជិក សមាជិកាដែលបានមកចូលរួមកិច្ចប្រជុំនាឱកាសនោះ។
ឯកឧត្តមបានមានប្រសាសន៍ថា របបប្រជុំបែបនេះ នឹងបន្តនៅថ្ងៃអនាគតបន្ថែមទៀត ដើម្បីតាមដានវឌ្ឍនភាពការងារ ស្តាប់របាយការណ៍ បញ្ហាប្រឈម ក៏ដូចជាស្វែងរកដំណោះស្រាយរួមគ្នា របស់ក្រុមការងារសមាជិកនីតិបុគ្គល ដែលជាអង្គការ សមាគម។
ឯកឧត្តមក៏បានគូសបញ្ជក់ផងដែរថា បើទោះបីសមាជិក សមាជិកាដែលចូលរួមទាំងអស់គ្នានាឱកាសនោះ មានភារកិច្ចផ្សេងគ្នា តួនាទីខុសគ្នាក្តី ការងារមហាញឹកយ៉ាងណា ក៏សមាជិក សមាជិកនៅតែបន្ថែមពេលវេលាពីការងារស្នូល ចូលរួមចំណែកជាមួយសង្គមជាតិ ក្រោមឆ័ត្រតែមួយរបស់ស.ស.យ.ក. ដែរ។
ក្រោយពីស្តាប់របាយការណ៍របស់ សមាជិក សមាជិកា អង្គប្រជុំ ឯកឧត្តមបានកោតសរសើរ និងវាយតម្លៃខ្ពស់ចំពោះសមិទ្ធផលនានា ដែលសមាជិក សមាជិកា និង ថ្នាក់ដឹកនាំតាមបណ្តាស្ថាប័ន-អង្គការ សមាគមទាំងអស់ សម្រេចបាននាពេលកន្លងមក ជាពិសេស ថ្លែងអំណរគុណចំពោះការចូលរួមចំណែកជាសកម្មភាព ក៏ដូចជាបេសកកម្មនានា ស្របជាមួយសហភាពសហព័ន្ធយុវជនកម្ពុជា នាពេលកន្លងមក។
ទន្ទឹមនឹងនោះ ឯកឧត្តមបានគូសបញ្ជាក់ផងដែរថា សមាជិកនីតិបុគ្គលនីមួយៗ សុទ្ធតែមានបទពិសោធន៍ ប្រវត្តិ និងភាគជោគជ័យរៀងៗខ្លួន ដែលនេះជាធាតុចូល និងមេរៀន សម្រាប់ក្រុមការងារក្នុងការពិចារណយកទៅប្រើប្រាស់ស្របតាមទិសដៅក្នុងការរៀបចំកម្មវិធីស.ស.យ.ក.។
សូមបញ្ជាក់ថា យោងលក្ខន្តិកៈសហភាពសហព័ន្ធយុវជនកម្ពុជា សមាជិកភាពរបស់ស.ស.យ.ក. រួមញ្ចូលផងដែរនូវ សមាជិកជានីតិបុគ្គល ដែលធ្វើសកម្មភាពពាក់ព័ន្ធនឹងយុវជន។ គិតមកដល់បច្ចុប្បន្ន សសយក មានសមាជិកជានីតិបុគ្គល ចំនួន១៦ ដែលគឺជាអង្គការ សមាគម ក្នុងព្រះរាជាណាចក្រកម្ពុជាដែលមានបេសកកម្ម និងទស្សនវិស័យស្រដៀងនឹង សសយក គឺការចូលរួមសកម្មភាពក្នុងបុព្វហេតុសង្គមជាតិ និងប្រជាជន៕
