ឯកឧត្តមបណ្ឌិត ពេជ សាភ័ន៖ រាជរដ្ឋាភិបាលកម្ពុជា ចាត់ទុកលោគ្រូអ្នកគ្រូ សាស្ត្រាចារ្យ ជាវិស្វករកែច្នៃ លើកិច្ចការបណ្តុះបណ្តាលធនធានមនុស្ស
ភ្នំពេញ៖ ឯកឧត្តមបណ្ឌិត ពេជ សោភ័ន ទេសរដ្ឋមន្រ្តីទទួលបន្ទុកបេសកម្មពិសេស និងជាប្រធានលេខាធិការដ្ឋាន (គ.វ.អ) បានលើកឡើងថា ក្នុងគោលបំណងលើកកម្ពស់គុណភាពអប់រំ តាមរយៈការពង្រឹង គុណភាពសាលារដ្ឋចាប់ពីថ្នាក់មត្តេយ្យដល់មធ្យមសិក្សា, រាជរដ្ឋាភិបាលកម្ពុជា នីតិកាលទី៧ បានសម្រេចបង្កើតគណៈកម្មាធិការជាតិជំរុញការអនុវត្តវិធានការគន្លឹះ ក្នុងវិស័យអប់រំ (គ.វ.អ) និងបានចាត់ទុកលោកគ្រូអ្នកគ្រូ សាស្ត្រាចារ្យ ជាវិស្វករកែច្នៃលើកិច្ចការបណ្តុះបណ្តាលធនធានមនុស្ស។
នៅក្នុងកិច្ចប្រជុំផ្សព្វផ្សាយចាប់ផ្តើមដំណើរការវគ្គគាំទ្រសាលារៀន ក្រោមការអនុវត្តវិធានការគន្លឹះ ក្នុងវិស័យអប់រំរបស់រាជរដ្ឋាភិបាល នីតិកាលទី៧ នៃរដ្ឋសភា នាព្រឹកថ្ងៃចន្ទ ទី២៧ ខែឧសភា ឆ្នាំ២០២៤ ឯកឧត្តម បណ្ឌិត ពេជ សាភ័ន បានលើកឡើងថា គណៈកម្មាធិការជាតិជំរុញការអនុវត្តវិធានការគន្លឹះក្នុងវិស័យអប់រំ ត្រូវបានបង្កើតឡើងក្នុងគោលបំណងលើកកម្ពស់គុណភាពអប់រំ តាមរយៈការពង្រឹង គុណភាពសាលារដ្ឋចាប់ពីថ្នាក់មត្តេយ្យដល់មធ្យមសិក្សា ដើម្បីផលិតមូលធនមនុស្សប្រកបដោយចំណេះដឹង និងជំនាញ សីលធម៌ល្អ ឥរិយាបថល្អ និងសមត្ថភាពបំពេញការងារខ្ពស់ ព្រមទាំងឆ្លើយតបទៅនឹងតម្រូវការជាក់ស្តែងរបស់សង្គម សេដ្ឋកិច្ច និង ទីផ្សារ ការងារ ។
ឯកឧត្តមបណ្ឌិតបានបន្តថា ជាមួយគ្នានេះយុទ្ធនាការផ្សព្វផ្សាយ បញ្ជ្រាបការយល់ដឹងអំពីសកម្ម ភាពនៃការអនុវត្តវិធានការគន្លឹះ ពិសេស សកម្មភាពនៃវគ្គចុះគាំទ្រសាលារៀនគោលដៅ ដែលបានចាប់ផ្តើមដំបូងគេនៅ រាជធានីភ្នំពេញកាលពីពេលថ្មីៗនេះ នឹងអនុវត្តបន្តនៅតាមបណ្តាខេត្តចំនួន ៨ទៀតបន្ទាប់ពីរាជធានីភ្នំពេញ ក៏មានខេត្តសៀមរាប ជាគោលដៅទី២ ផងដែរ ដោយក្នុងនោះលោកគ្រូអ្នកគ្រូ សាស្ត្រាចារ្យគឺជា វិស្វករ កែច្នៃព្រលឹង ក្នុងការបណ្តុះបណ្តានធនធានមនុស្ស ហើយក៏ជាកម្លាំងចលករដ៏សំខាន់ក្នុងចលនាគាំទ្រសាលារៀន ដើមី្បអនុវត្តវិធានការគន្លឹះក្នុង វិស័យអប់រំរបស់រាជរដ្ឋាភិបាលកម្ពុជា នីតិកាលទី៧ នៃរដ្ឋសភានេះ ។
ឯកឧត្តមបណ្ឌិតទេសរដ្ឋមន្ត្រី ក៏បានបញ្ជាក់ផងដែរថា នៅក្នុងការអនុវត្តការងារ លេខាធិការដ្ឋាននេះ ដើរតួនាទីជាសេនាធិការរបស់ គ.រ.អ. ក្នុងគោលបំណងជួយគាំទ្រដល់ការ លើកកម្ពស់ការអប់រំតាមរយៈ ការពង្រឹងអភិបាលកិច្ចសាលារៀន, ការពិនិត្យកែលម្អកម្មវិធីសិក្សា និងរៀបចំកម្មវិធីសិក្សា និងសកម្មភាពក្រៅម៉ោងសិក្សាឲ្យស្របតាមតម្រូវការក្នុងពង្រឹងចំណេះដឹង វិន័យ សីលធម៌ និងឥរិយាបថសិស្ស, ការយកចិត្តទុកដាក់លើសុខភាពសិស្សតាមរយៈកម្មវិធីអាហារូបត្ថម្ភ ដល់កុមារ និងការត្រួតពិនិត្យគុណភាពចំណីអាហារនៅតាមសាលារៀន និង ការជំរុញនិងលើកទឹកចិត្ត ការចូលរួមរបស់មាតាបិតា អាណាព្យាបាល និងសហគមន៍ក្នុងការអប់រំ ។ រចនាសម្ព័ន្ធលេខាធិការដ្ឋាន គ.វ.អ រួមមានផ្នែកចំណុះចំនួន ០៤ ៖ ផ្នែកគោលនយោបាយ, ផ្នែកគាំទ្រសាលារៀន, ផ្នែកតាមដាន ត្រួតពិនិត្យ និង វាយតម្លៃ, និង ផ្នែករដ្ឋបាល ហិរញ្ញវត្ថុ និងទំនាក់ទំនងសាធារណៈ ។
សូមជម្រាបជូនដែរថា ក្រោយធ្វើការវាយតម្លៃសាលារៀន ចំនួន ៧ ក្នុងខេត្តតាកែវ ត្រូវបាន គ.វ.អ ជ្រើសរើសមកអនុវត្តក្នុងចំណោមសាលារៀនទាំង ៥០កន្លែង នៅទូទាំងប្រទេស រួមមាន៖ ១- សាលាបឋមសិក្សាស្រែជើងរាស្រ្ត ស្ថិតនៅឃុំត្រពាំងក្រញូង, ២- សាលាបឋមសិក្សាព្រៃក្ដួច ស្ថិតនៅឃុំត្រពាំងក្រញូង, ៣- សាលាបឋមសិក្សាអង្គសង្កែ ស្ថិតនៅឃុំអូរសារាយ, ៤- សាលាបឋមសិក្សាត្នោតជុំ ស្ថិតនៅឃុំអូរសារាយ, ៥- សាលាបឋមសិក្សាត្រពាំងអណ្ដើក ស្ថិតនៅឃុំអូរសារាយ, ៦- សាលាបឋមសិក្សាអង្គធ្លករង្សី ស្ថិតនៅឃុំអូរសារាយ, ៧- សាលាបឋមសិក្សាត្រពាំងដងទឹក ស្ថិតនៅឃុំអូរសារាយ ស្រុកត្រាំកក់ ដោយសរុបមាន ៤៨ថ្នាក់ គ្រូសរុប ៨៨នាក់ និងមានសិស្សសរុប ៣៤៥៦នាក់ ស្រី ១៦៦៩នាក់៕
