ក្រុមហ៊ុនចំនួន ៣ របស់តួកគី មានបំណងចង់ពង្រីកការវិនិយោគទៅកម្ពុជា ក្នុងវិស័យទេសចរសុខភាព ការគ្រប់គ្រងសណ្ឋាគារប្រណិត ប្រព័ន្ធបច្ចេកវិទ្យាសម្រាប់ការទំនាក់ទំនងក្នុងវិស័យអប់រំ និងវិស័យហិរញ្ញវត្ថុ

ភ្នំពេញ៖ នៅថ្ងៃទី២៧ ខែឧសភា ឆ្នាំ២០២៤ ក្នុងឱកាសបំពេញទស្សនកិច្ចផ្លូវការនៅប្រទេសតួកគី ឯកឧត្តមឧបនាយករដ្ឋមន្រ្តូី សុខ ចិន្ដាសោភា រដ្ឋមន្ត្រីការបរទេស និងសហប្រតិបត្តិការ អន្តរជាតិ បានទទួលជួបដោយឡែកពីគ្នាជាមួយក្រុមហ៊ុនចំនួន ០៣  គឺក្រុមហ៊ុនមន្ទីរពេទ្យ Koru Ankara Hospital ក្រុមហ៊ុន Dedeman Hotel & Resort International និង ក្រុមហ៊ុន Kiddy ដែលមានបំណងចង់ពង្រីកការវិនិយោគទៅប្រទេសកម្ពុជា ក្នុងវិស័យទេសចរសុខភាព ការគ្រប់គ្រងសណ្ឋាគារប្រណិត ប្រព័ន្ធបច្ចេកវិទ្យាសម្រាប់ការទំនាក់ទំនងក្នុងវិស័យអប់រំ និងវិស័យហិរញ្ញវត្ថុ ជាដើម។

ក្រុមហ៊ុនទាំងអស់បានថ្លែងអំណរគុណ យ៉ាងជ្រាលជ្រៅ ដល់ឯកឧត្តមឧបនាយករដ្ឋមន្រ្តី ដែលបានពន្យល់យ៉ាងក្បោះក្បាយអំពីគោលនយោបាយរបស់កម្ពុជា ដើម្បីធ្វើឲ្យប្រសើរបរិយាកាសធុរកិច្ចនៅកម្ពុជា និងការលើកទឹកចិត្តឱ្យវិនិយោគិនទៅបណ្ដាក់ទុនលើវិស័យដែលមានសក្តានុពល។

ក្រុមហ៊ុនទាំង បីបានបង្ហាញពីចំណាប់អារម្មណ៍ និងទំនុកចិត្តខ្ពស់ ក្នុងការស្វែងរកឱកាសបណ្តាក់ទុន វិនិយោគនៅកម្ពុជា៕