នាយឧត្តមសេនីយ៍ ឥត សារ៉ាត់៖ សមយុទ្ធកងទ័ពកម្ពុជា-ចិន ជាស្មារតីនៃកិច្ចសហប្រតិបត្តិការ ដើម្បីប្រយុទ្ធប្រឆាំងនឹងអំពើភេរវកម្ម
ភ្នំពេញ៖ សមយុទ្ធនាគមាសឆ្នាំ២០២៤ ដែលសមយុទ្ធលើកទី៦រវាងកងទ័ពកម្ពុជា និងចិន នឹងត្រូវបិទបញ្ចប់នៅថ្ងៃទី៣០ ខែឧសភា ឆ្នាំ២០២៤ខាងមុខនេះហើយ។ សមយុទ្ធនាគមាសឆ្នាំ២០២៤នេះ ធ្វើឡើងរយៈពេលប្រមាណ១៤ថ្ងៃ ដោយចាប់ផ្តើមនៅថ្ងៃទី១៦ ខែឧសភា។
សមយុទ្ធរបស់កងទ័ពកម្ពុជា និងចិនឆ្នាំ២០២៤នេះ មានកងកម្លាំងចូលរួមសរុបជាង ២ពាន់នាក់ កងយោធពលខេមរភូមិន្ទ ១,៣១៥នាក់ កងទ័ពរំដោះប្រជាជនចិន ៧៦០នាក់ អមដោយសព្វាវុធទំនើបៗ មានរថយន្តប្រយុទ្ធ រថពាសដែកដែលបំពាក់សព្វាវុធកម្រិតធ្ងន់ផងដែរ។ បន្ថែមពីលើនោះ ការធ្វើសមយុទ្ធនៅឆ្នាំនេះ ក៏មានលាយបញ្ចូលជាមួយប្រព័ន្ធបច្ចេកវិទ្យាមានដូចជាដ្រូនបំពាក់អាវុធ និងឆ្កែរ៉ូបូតបំពាក់អាវុធ ជាជំនួយក្នុងប្រតិបត្តិការ។
សមយុទ្ធនាគមាសឆ្នាំ២០២៤នេះ ក៏ត្រូវបានពង្រីកប្រតិបត្តិការរបស់ខ្លួនលើសពីឆ្នាំកន្លងទៅ ដោយបន្ថែមការធ្វើសមយុទ្ធលើលំហសមុទ្ររវាងកងទ័ពជើងទឹករបស់កម្ពុជា និងចិនផងដែរ។
សម្រាប់ប្រធានបទនៃការធ្វើសមយុទ្ធនៅឆ្នាំនេះមានខុសពីឆ្នាំទៅនោះទេ គឺការប្រយុទ្ធប្រឆាំងនឹងអំពើភេរវកម្ម ការរំដោះចំណាប់ខ្មាំងពីការចាប់ជំរិត។ អំពើភេរវកម្ម និងការចាប់ជំរិត គឺជាក្តីបារម្ភរួមមួយរបស់ពិភពលោកនាពេលបច្ចុប្បន្ន ហើយតែងលើកយកមកជជែក និងដាក់ចេញនូវកិច្ចសហប្រតិបត្តិការទាំងឡាយ ដើម្បីរួមគ្នាប្រយុទ្ធប្រឆាំង។
ក្នុងដំណើរចុះពិនិត្យការធ្វើសមយុទ្ធនៅភ្នំជុំសែនរីករាយនាព្រឹកថ្ងៃទី២៨ ខែឧសភា ឆ្នាំ២០២៤ នាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចម្រុះនៃកងយោធពលខេមរភូមិន្ទ និងជាប្រធានគណៈប្រធានកម្មការលំហាត់ និងធ្វើសមយុទ្ធជាមួយបណ្ដាប្រទេសជាមិត្ត បានហៅលំហាត់សមយុទ្ធរវាងកងទ័ពកម្ពុជា និងចិន ជាស្មារតីនៃកិច្ចសហប្រតិបត្តិការ ដើម្បីប្រយុទ្ធប្រឆាំងនឹងអំពើភេរវកម្ម។
នាយឧត្តមសេនីយ៍ ឥត សារ៉ាត់ ក៏បានលើកឡើងផងដែរថា ជាស្មារតីរបស់រាជរដ្ឋាភិបាល ក្រសួងការពារជាតិ និងកងយោធពលខេមរភូមិន្ទ រីករាយជានិច្ចក្នុងការធ្វើលំហាត់សមយុទ្ធជាមួយប្រទេសជាមិត្ត ដោយឈរលើបុព្វហេតុប្រយុទ្ធប្រឆាំងអំពើភេរវកម្ម និងឆ្លើយតបគ្រោះមហន្តរាយ។
សមយុទ្ធនាគមាសឆ្នាំ២០២៤ រវាងកងទ័ពកម្ពុជា និងចិន ក៏ទទួលបានការវាយតម្លៃខ្ពស់ផងដែរពីសំណាក់នាយឧត្តមសេនីយ៍ ឥត សារ៉ាត់ ទាំងសមយុទ្ធលើលំហសមុទ្រ និងសមយុទ្ធជើងគោកនៅភ្នំជុំសែនរីករាយ ក្នុងទឹកដីខេត្តកំពង់ឆ្នាំង។
សូមបញ្ជាក់ថា សមយុទ្ធនាគមាសឆ្នាំ២០២៤ ក្រោមប្រធានបទរំដោះចំណាប់ខ្មាំងពីក្រុមភេរវករ កងទ័ពកម្ពុជា និងចិន បានឯកភាពរួមគ្នាតាក់តែងសាច់រឿងថា មានក្រុមភេរវករមួយក្រុម បានចាប់ជំរិតនាវាដឹកទំនិញលើដែនសមុទ្រកម្ពុជា។ បន្ទាប់ពីការប្រតិបត្តិការបង្ក្រាបការចាប់ជំរិតនាវាលើលំហសមុទ្រ និងរំដោះបានចំណាប់ខ្មាំងហើយនោះ គេក៏បន្តរកឃើញជម្រករបស់ភេរវករហើយក៏ឈានទៅបើកប្រតិបត្តិការបង្ក្រាបបន្ត។
ឈុតឆាកបង្ក្រាបជម្រករបស់ភេរវករ ដែលរៀបចំឡើងនៅឯទីលានហ្វឹកហាត់ភ្នំជុំសែនរីករាយ មានការរៀបចំឈុតឆាកជាច្រើនរួមមានការស៊ើបអង្កេតរកជម្រកភេរវករ ការចរចា ប្រតិបត្តិការប្រយុទ្ធជាមួយភេរវករ ការរំដោះ និងសង្គ្រោះចំណាប់ខ្មាំងជាដើម។ ក្នុងសមយុទ្ធបានបង្ហាញនូវការបាញ់គ្រាប់ពិតជាច្រើនគ្រាប់ផងដែរ៕
