សម្តេចធិបតី អំពាវនាវឱ្យប្រជាពលរដ្ឋរួមគ្នាទប់ស្កាត់មនោគមវិជ្ជាជ្រុលនិយម ដើម្បីថែរក្សាសុខសន្តិភាព
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងអំពាវនាវឱ្យប្រជាពលរដ្ឋរួមគ្នាទប់ស្កាត់មនោគមវិជ្ជាជ្រុលនិយម ដើម្បីថែរក្សាសុខសន្តិភាព ដែលធានាដល់ការអភិវឌ្ឍរីកចម្រើនរបស់សង្គមជាតិយើងតទៅមុខទៀត។
សម្តេចធិបតី ហ៊ុន ម៉ាណែត បានអំពាវនាវបែបនេះ ក្នុងឱកាសដែលសម្តេចអញ្ជើញសម្ពោធដាក់ឱ្យប្រើប្រាស់សមិទ្ធផលមួយចំនួននៅមជ្ឈមណ្ឌលវប្បធម៌ព្រះពុទ្ធសាសនាកម្ពុជា ស្ថិតនៅឧទ្យានជាតិព្រះសុរាម្រិត-កុសមៈ «គិរីរម្យ» នាព្រឹកថ្ងៃទី៣០ ខែឧសភា ឆ្នាំ២០២៤នេះ។
សម្តេចធិបតី ហ៊ុន ម៉ាណែត បានគូសបញ្ជាក់ថា សង្គ្រាមមិនមែនកើតមានដោយសារអាវុធនោះទេ ពោលគឺសង្គ្រាមកើតមានដោយសារផ្នត់គំនិត និងមនោគមវិជ្ជាដែលបានបំពាក់បំប៉នទៅលើមនុស្ស។ ជាក់ស្តែង កាលពីជំនាន់ខ្មែរក្រហម ដោយសារតែមនោគមវិជ្ជាជ្រុលនិយមនេះហើយ ទើបធ្វើឱ្យកូនហ៊ានរាយការណ៍ចាប់ឱពុកម្តាយខ្លួនឯង ៕
