សម្តេចធិបតី ហ៊ុន ម៉ាណែត៖ មូលដ្ឋានធំរបស់រាជរដ្ឋាភិបាល គឺការធ្វើបុណ្យ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងថា មូលដ្ឋានធំរបស់រាជរដ្ឋាភិបាល គឺការធ្វើបុណ្យ។ ធ្វើបុណ្យធំបំផុតដំបូងគេ គឺការរំដោះប្រជាពលរដ្ឋចេញពីរបបប្រល័យពូជសាសន៍ និងការជួយដល់ប្រជាពលរដ្ឋ។

ក្នុងពិធីសម្ពោធដាក់ឱ្យប្រើប្រាស់សមិទ្ធផលមួយចំនួននៅមជ្ឈមណ្ឌលវប្បធម៌ព្រះពុទ្ធសាសនាកម្ពុជា ស្ថិតនៅឧទ្យានជាតិព្រះសុរាម្រិត-កុសមៈ «គិរីរម្យ» នាព្រឹកថ្ងៃទី៣០ ខែឧសភា ឆ្នាំ២០២៤នេះ សម្តេចធិបតី ហ៊ុន ម៉ាណែត បានមានប្រសាសន៍ថា ការអនុវត្តនយោបាយឈ្នះ ឈ្នះ គឺជាការធ្វើបុណ្យដ៏ធំ។ នយោបាយឈ្នះ ឈ្នះ ជានយោបាយផ្តល់ក្តីអនុគ្រោះធំឱ្យគ្នា។

សម្តេចធិបតី ហ៊ុន ម៉ាណែត បានមានប្រសាសន៍បន្តថា បើគ្មានការធ្វើបុណ្យដោយការយោគយល់គ្នា តាមរយៈនយោបាយឈ្នះ ឈ្នះទេនោះ គឺគ្មានសុខសន្តិភាពដូចពេលបច្ចុប្បន្ននោះឡើយ។

សម្តេចធិបតី ហ៊ុន ម៉ាណែត បានគូសបញ្ជាក់ថា ការធ្វើបុណ្យនេះ បាននាំមកនូវសុខសន្តិភាព ហើយក៏ជាមូលដ្ឋាននៃការការពារសុខសន្តិភាពផងដែរ ៕