មេបញ្ជាការតំបន់ប្រតិបត្តិការសឹករងកំពង់ឆ្នាំង នាំយកអំណោយដ៏ថ្លៃថ្លារបស់សម្តេចធិបតី ហ៊ុន ម៉ាណែតឧបត្ថម្ភដល់គ្រួសារកងទ័ព និងអតីតយុទ្ធជនជួបការលំបាក

ភ្នំពេញ៖ នៅថ្ងៃទី២៩ ខែឧសភា ឆ្នាំ២០២៤ ឯកឧត្តម ឧត្តមសេនីយ៍ត្រី អ៊ុំ សុភា មេបញ្ជាការ តំបន់ប្រតិបត្តិការសឹករងកំពង់ឆ្នាំង និងជាប្រធានសមាគមអតីតយុទ្ធជនកម្ពុជាខេត្ត បានដឹកនាំនាយទាហាននាំយកអង្ករចំនួន១០០គីឡូក្រាម ស័ង្កសី ៤០សន្លឹក មី០២កេះ ត្រីខ០២យួរ ទឹកត្រី ០២យួរ ទឹកស៊ីអ៉ីវ ០២យួរ រួមនឹងថវិកាមួយចំនួន ដែលជាអំណោយដ៏ថ្លៃថ្លារបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និង លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ឧបត្ថម្ភដល់គ្រួសារលោកវរសេនីយ៍ទោ គឹម សុផាត មេបញ្ជាការរង ផ្នែកសឹករងកំពង់លែង ដែលភរិយាមានជំងឺប្រចាំកាយ កំពុងសម្រាកព្យាបាលនៅគេហដ្ឋាន ក្នុងភូមិត្រងិល ឃុំត្រងិល ស្រុកកំពង់លែងនិង ឧបត្ថម្ភដល់លោក សូ ស្រឿន អតីតយុទ្ធជនក្រីក្រ ភរិយាទើបតែទទួលមរណភាព និងកំពុងស្នាក់អាស្រ័យលើដីប្រជាពលរដ្ឋ នៅភូមិគុយ ឃុំដារ ស្រុកកំពង់លែង ខេត្តកំពង់ឆ្នាំង ។

ស្ថិតក្នុងឱកាសនេះ ឯកឧត្តម មេបញ្ជាការ បានពាំនាំប្រសាសន៍ផ្តាំផ្ញើសួរសុខទុក្ខ និង ក្តីអាណិតអាសូរ ពីសំណាក់ សម្តេចធិបតី នាយករដ្ឋមន្ត្រី និងលោកជំទាវបណ្ឌិត ចំពោះគ្រួសារទាំង០២។

ឯកឧត្តម មេបញ្ជាការបានបន្តថា សម្តេចធិបតី និងលោកជំទាវ តែងតែគិតគូរពីសុខទុក្ខរបស់បងប្អូនប្រជាពលរដ្ឋគ្រប់ទីកន្លែងទាំងអស់ ក្នុងនោះសម្តេចធិបតី តែងតែឧបត្ថម្ភសម្ភារ គ្រឿងឧបភោគបរិភោគជាប់ជាប្រចាំ។

ជាចុងក្រោយ គ្រួសារ លោក គឹម សុផាត និង លោក សូ ស្រឿន បានគោរពថ្លែងអំណរគុណយ៉ាងជ្រាលជ្រៅជូនចំពោះ សម្តេចមហាបវរធិបតី ហ៊ុន ម៉ាណែត និងលោកជំទាវ ព្រមទាំង ឯកឧត្តម មេបញ្ជាការ តំបន់ប្រតិបត្តិការសឹករងខេត្ត ដែលបានយកចិត្ដទុកដាក់គិតគូរអំពីសុខទុក្ខរបស់ពួកគាត់ ដែលជួបការលំបាក និងសូមគោរពជូនពរ សម្តេច ឯកឧត្តម លោកជំទាវ និងក្រុមការងារ សូមមានសុខភាពល្អ ប្រកបបាននូវពុទ្ធពរទាំង៤ប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕