ឯកឧត្តម អ៊ុម រម្យណី រដ្ឋលេខាធិការក្រសួងអប់រំ ជួបសម្តែងការគួរសម និងពិភាក្សាការងារជាមួយ ទីភ្នាក់ងារសហប្រតិបត្តិការអន្តរជាតិជប៉ុនប្រចាំកម្ពុជា
ភ្នំពេញ៖ នាថ្ងៃទី៣០ ខែឧសភា ឆ្នាំ២០២៤ ឯកឧត្តម អ៊ុម រម្យណី រដ្ឋលេខាធិការក្រសួងអប់រំ យុវជន និងកីឡា បានជួបសម្តែងការគួរសម និងពិភាក្សាការងារជាមួយ លោកស្រី មិយូរ៉ា យូហ្សិកូ អនុប្រធានទភ្នាក់ងារ JICA ប្រចាំប្រទេសកម្ពុជា រួមជាមួយនឹង លោក ស៊ូហ្ស៊ូគី មុដៃ អ្នកតំណាងនៃទីភ្នាក់ងារ JICA និងលោកធឿន វង់ឌី មន្ត្រីកម្មវិធីនៃទីភ្នាក់ងារJICAប្រចាំប្រទេសកម្ពុជា។
លោកស្រី មិយូរ៉ា យូហ្សិកូ បានធ្វើការវាយតម្លៃខ្ពស់លើកិច្ចសហប្រតិបត្តិការជាច្រើនឆ្នាំ រវាងក្រសួងអប់រំ យុវជន និងកីឡា និងទីភ្នាក់ងារ JICA ប្រចាំប្រទេសកម្ពុជា និងបន្តខិតខំពង្រឹងទំនាក់ទំនង និងកិច្ចសហប្រតិបត្តិការឱ្យកាន់តែល្អប្រសើរតាមរយៈការអនុវត្តគម្រោងកិច្ចសហប្រតិបត្តិការបច្ចេកទេសផ្សេងៗ ជាពិសេសគម្រោងកិច្ចសហប្រតិបត្តិការលើវិស័យបច្ចេកវិទ្យាព័ត៌មាន និងសារគមនាគមន៍ (ICT) ដើម្បីលើកកម្ពស់វិស័យអប់រំនៅប្រទេសកម្ពុជា។
ថ្លែងក្នុងឱកាសនោះដែរ ឯកឧត្ដមរដ្ឋលេខាធិការ បានលើកឡើងពីវឌ្ឍនភាពលើវិស័យអប់រំនៅប្រទេសកម្ពុជា តាមរយៈ៖(១) ការអភិវឌ្ឍកម្មវិធីអប់រំស្ទែម (STEM) ក្នុងកម្រិតវិទ្យាល័យ (២) ការពង្រឹងការកសាងសមត្ថភាពគ្រូបង្រៀនមុខវិជ្ជាស្ទែម (៣) ការលើកកម្ពស់ការអប់រំICTនៅតាមវិទ្យាល័យ និង(៤) ការបន្តពង្រឹងថ្នាលទិន្នន័យអប់រំជាដើម។
ឯកឧត្ដមរដ្ឋលេខាធិការក៏បានលើកឡើងពីការបង្កើតមជ្ឍមណ្ឌលផលិតកម្មឌីជីផលកម្ពុជា-ជប៉ុន (CJDM) និងថ្លែងអំណរគុណយ៉ាងជ្រាលជ្រៅដល់រដ្ឋាភិបាលជប៉ុន និងទីភ្នាក់ងារJICAប្រចាំប្រទេសកម្ពុជា ដែលតែងតែបានចូលរួមចំណែកយ៉ាងសកម្មជាមួយក្រសួងអប់រំ យុវជន និងកីឡា ក្នុងការអភិវឌ្ឍធនធានមនុស្សនៅកម្ពុជា ជាពិសេសគឺការផ្ដល់អាហារូបករណ៍ដល់សិស្ស-និស្សិតកម្ពុជា ក្នុងការសិក្សានូវកម្រិតចំណេះទូទៅ និងកម្រិតឧត្ដមសិក្សា លើជំនាញផ្សេងៗ ដើម្បីយកចំណេះដឹងទាំងនេះទៅកសាងគ្រួសារ និងសង្គមជាតិឱ្យមានការរីកចម្រើននាពេលអនាគត៕
