ថៃ កំពុងរៀបចំបែបបទដើម្បីក្លាយជាសមាជិក BRICS ដែលមកពីតំបន់អាស៊ីអាគ្នេយ៍ដំបូងគេ
បាងកក៖ រាជរដ្ឋាភិបាលថៃបានប្រកាសថៃនឹងដាក់ពាក្យស្នើសុំឱ្យបានក្នុងខែនេះ ដើម្បីចូលរួមជាមួយប្លុក BRICS នៃបណ្តាប្រទេសកំពុងរីកចម្រើន ដោយមានបំណងសហការជាមួយបណ្តាប្រទេសខាងត្បូងសកលលោកផ្សេងទៀតក្នុងការជំរុញវត្តមានរបស់ខ្លួននៅលើឆាកពិភពលោក។
នៅក្នុងកិច្ចប្រជុំគណៈរដ្ឋមន្ត្រីមួយកាលពីថ្ងៃទី ២៨ ខែឧសភា រាជរដ្ឋាភិបាលថៃបានបញ្ចប់គម្រោងដាក់ពាក្យស្នើសុំនេះ។ ប្រសិនបើមានការយល់ព្រម ប្រទេសថៃនឹងក្លាយជាសមាជិកដំបូងរបស់ក្រុមនេះ មកពីតំបន់អាស៊ីអាគ្នេយ៍។ អ្នកនាំពាក្យរាជរដ្ឋាភិបាលថៃ លោក ឆៃ វ៉ាចារ៉ុង (Chai Wacharonke) បាននិយាយថាគណៈរដ្ឋមន្ត្រីបានអនុម័តសេចក្តីព្រាងនៃលិខិតផ្លូវការដែលបង្ហាញពីចេតនារបស់ប្រទេសថៃក្នុងការក្លាយជាសមាជិកនៃក្រុមនេះ។ លិខិតនោះចែងថា ប្រទេសថៃបានដឹងពីសារសំខាន់នៃពហុភាគីនិយម និងការកើនឡើងនូវតួនាទីរបស់ប្រទេសកំពុងអភិវឌ្ឍនៅក្នុងឆាកអន្តរជាតិ។ ចក្ខុវិស័យរបស់ប្រទេសថៃគឺស្របតាមគោលការណ៍របស់ BRICS ដែរ។
ការក្លាយជាសមាជិក BRICS វានឹងផ្តល់អត្ថប្រយោជន៍ដល់ប្រទេសថៃក្នុងទិដ្ឋភាពជាច្រើន រួមទាំងការពង្រឹងតួនាទីរបស់ប្រទេសនៅក្នុងឆាកអន្តរជាតិ និងការបង្កើនឱកាសរបស់ខ្លួនក្នុងការសហការបង្កើតសណ្តាប់ធ្នាប់ពិភពលោកថ្មីមួយ។ អ្នកនាំពាក្យរាជរដ្ឋាភិបាលថៃដដែលបន្ថែមថា BRICS បានអញ្ជើញប្រទេសដែលមិនមែនជាសមាជិកដែលមានបំណងចង់ចូលរួមនៅក្នុងកិច្ចប្រជុំកំពូលលើកទី ១៦ នៅទីក្រុង Kazan ប្រទេសរុស្ស៊ីចាប់ពីថ្ងៃទី ២២ ដល់ថ្ងៃទី ២៤ ខែតុលា។ លោកបានបន្ថែមថា ការចូលរួមព្រឹត្តិការណ៍នេះនឹងជាឱកាសមួយសម្រាប់ប្រទេសថៃក្នុងការពន្លឿនដំណើរការសមាជិកភាព និងលើកកម្ពស់តួនាទីរបស់ខ្លួនជាតួអង្គឈានមុខគេក្នុងចំណោមប្រទេសកំពុងអភិវឌ្ឍ។ ថៃក៏បានទទួលការជូនដំណឹងផងដែរថាខ្លួនចង់ដាក់ពាក្យចូលរួមជាមួយអង្គការសម្រាប់កិច្ចសហប្រតិបត្តិការនិងការអភិវឌ្ឍសេដ្ឋកិច្ចដែលជាក្រុមចំនួន៣៨ នៃប្រទេសដែលមានសេដ្ឋកិច្ចអភិវឌ្ឍន៍ខ្លាំងបំផុតរបស់ពិភពលោក។
អ្នកខ្លះចាត់ទុក BRICS ជាក្របខ័ណ្ឌប្រកួតប្រជែងក្នុងលំដាប់អន្តរជាតិ ដែលដឹកនាំដោយប្រទេសដែលមានសេដ្ឋកិច្ចអភិវឌ្ឍន៍ ដូចជាសហរដ្ឋអាម៉េរិក និងអឺរ៉ុប។ ប្រទេសចិន និងរុស្ស៊ីបាននិងកំពុងនាំមុខគេក្នុងការពង្រីកប្លុកនេះ ដោយប្រទេសអេមីរ៉ាតអារ៉ាប់រួម អ៊ីរ៉ង់ អេត្យូពី និងអេហ្ស៊ីប បានចូលរួមនៅក្នុងខែមករា។ ប្រទេសថៃកំពុងស្ថិតក្នុងជួរបន្ទាប់នៃ ១៥ ប្រទេសដែលកំពុងត្រូវបានពិចារណាសម្រាប់ការចូល។ ការពង្រីកប្លុក BRICS ដែលរួមមាន៖ ប្រេស៊ីល រុស្ស៊ី ឥណ្ឌា ចិន និងអាហ្រ្វិកខាងត្បូង ត្រូវបានសហរដ្ឋអាម៉េរិកមើលឃើញថា ជាការពង្រីកឥទ្ធិពល នឹងជាការគំរាមកំហែងឥទ្ធិពលសេដ្ឋកិច្ច ខណៈបណ្តាប្រទេស BRICS ជាសមូហភាពតំណាងឱ្យផ្នែកដ៏សំខាន់នៃសេដ្ឋកិច្ចពិភពលោក ហើយសេដ្ឋកិច្ចពួកគេបាននិងកំពុងកើនឡើងយ៉ាងឆាប់រហ័សនៅប៉ុន្មានឆ្នាំចុងក្រោយនេះ៕
