ឯកឧត្តមសាស្ត្រាចារ្យ ឈាង រ៉ា ទទួលជួបពិភាក្សាការងារទ្វេភាគី ជាមួយនាយិកាប្រតិបត្តិ City Cancer Challenge Foundation (C/Can)

ភ្នំពេញ៖ នៅទីក្រុងហ្សឺណែវ ប្រទេសស្វីស កាលពីថ្ងៃទី២៩ ខែឧសភា ឆ្នាំ២០២៤ តបតាមការអញ្ជើញមូលនិធិប្រឈមជំងឺមហារីកសម្រាប់ទីក្រុង (City Cancer Challenge Foundation, C/Can) ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានទទួលជួបពិភាក្សាការងារ ជាមួយលោកស្រី Isabel Mestres ដែលជានាយិកាប្រតិបត្តិ របស់មូលនិធិ C/Can និងក្រុមការងារបច្ចេកទេស។

មូលនិធិ C/Can ត្រូវបានបង្កើតឡើងដោយសហជីព គ្រប់គ្រងជំងឺមហារីកអន្តរជាតិ (Union for International Cancer Control) និងបានចុះបញ្ជីនៅក្នុងទីក្រុងហ្សឺណែវនៃប្រទេសស្វីស ជាមូលនិធិឯករាជ្យ។ មូលនិធិនេះ បាននឹងកំពុងដំណើរការ បង្កើតជាសកម្មភាពរួមគ្នានៃបណ្តាទីក្រុងនានាដោយទទួលការគាំទ្រ លក្ខណៈបណ្តាញភាពជាដៃគូសកល និងភាពជាដៃគូក្នុងស្រុក ចូលរួមចំណែកផ្តល់នូវដំណោះស្រាយ ក្នុងការព្យាបាលជំងឺមហារីកប្រកបដោយសមធម៌ និងនិរន្តរភាព ក្នុងគោលបំណងធ្វើឱ្យ ប្រសើរឡើងនូវលទ្ធភាពទទួលបានការថែទាំជំងឺមហារីកនៅក្នុងបណ្តាប្រទេសនានាជុំវិញពិភពលោក។

លោកស្រី Isabel Mestres នាយិកាប្រតិបត្តិ មូលនិធិបានជម្រាបជូនថា នាខែធ្នូ ឆ្នាំ២០២០ ក្រសួងសុខាភិបាលកម្ពុជា បានដាក់ពាក្យស្នើសុំបញ្ចូលរាជធានីភ្នំពេញ ក្នុងគម្រោង City Cancer Challenge (C/Can) និងបន្ទាប់ពីដំណើរទស្សនកិច្ចស្វែងយល់ និងផ្តល់ការវាយតម្លៃប្រកបដោយការយកចិត្តទុកដាក់ នាខែឧសភា ឆ្នាំ២០២២ រាជធានីភ្នំពេញត្រូវបានជ្រើសរើសជាផ្លូវការក្នុងការទទួលបានគម្រោងគាំទ្រការព្យាបាលជំងឺមហារីកនៅកម្ពុជា ឆ្នាំ២០២៣-២០២៥ និងត្រូវបានប្រកាសជាផ្លូវការនៅសន្និបាតប្រចាំឆ្នាំរបស់អង្គការសុខភាពពិភពលោកលើកទី៧៥ កាលពីថ្ងៃទី១៦-១៨ ខែតុលា ឆ្នាំ២០២២ នៅទីក្រុងហ្សឺណែវនៃប្រទេសស្វីស៕