ឧបនាយករដ្ឋមន្ត្រី ហ៊ុន ម៉ានី ណែនាំនិងជំរុញការងារវិភាគមុខងារ និងរចនាសម្ព័ន្ធក្រសួង ស្ថាប័ន និងចាត់ទុកជាកិច្ចការអាទិភាព

ភ្នំពេញ៖ ថ្លែងក្នុងកិច្ចប្រជុំពិនិត្យវឌ្ឍនភាពការងារប្រចាំខែឧសភា និងទិសដៅការងារបន្ត របស់ក្រសួងមុខងារសាធារណៈ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ បានណែនាំក្រុមការងារទាំងកម្រិតនយោបា យ និងកម្រិតបច្ចេកទេស និងក្រុមការងារបច្ចេកទេសលើកកម្ពស់ប្រសិទ្ធភាពការងាររដ្ឋបាល នៃគ.វ.រ. ត្រូវតាមដាន និងជំរុញការរៀបចំឱ្យបានជោគជ័យនូវការរៀបចំការពិនិត្យឡើងវិញ និងការវិភាគមុខងារនិងរចនាសម្ព័ន្ធក្រសួង ស្ថាប័ន ដែលជាកិច្ចការអាទិភាព ឱ្យស្របតាមការណែនាំ និងចង្អុលបង្ហាញរបស់សម្តេចធិបតី នាយករដ្ឋមន្ត្រី។

ក្នុងកិច្ចប្រជុំប្រចាំខែឧសភានេះ អង្គប្រជុំក៏បានស្តាប់នូវវឌ្ឍនភាពការងារមួយចំនួនក្រៅពីការងារស្នូលប្រចាំថ្ងៃ គឺការធ្វើការកែទម្រង់រដ្ឋបាលសាធារណៈ ពិសេសក្នុងខែឧសភានេះ ក្រសួងមុខងារសាធារណៈ សម្រេចបានការប្រឡងប្រជែងជ្រើសរើសគ្រូបង្រៀនអនុវិទ្យាល័យ។

ក្នុងកិច្ចប្រជុំ ឯកឧត្តមឧបនាយករដ្ឋមន្ត្រី បានកោតសរសើរ និងវាយតម្លៃខ្ពស់ដល់ថ្នាក់ដឹកនាំ និងមន្ត្រីរាជការថ្នាក់កណ្តាល និងមន្ទីរមុខងារសាធារណៈទាំងអស់ ដែលបានចូលរួមគ្នាក្នុងការបំពេញតួនាទីភារកិច្ចរបស់ខ្លួន និងការងារស្នូលយ៉ាងសកម្ម ក្នុងការចូលរួមដំណើការការកែទម្រង់របស់ក្រសួងមុខងារសាធារណៈ នាពេលកន្លងមក ជាពិសេសសម្របសម្រួលការផ្ទេរបុគ្គលិកអប់រំទៅរដ្ឋបាលថ្នាក់ក្រោមជាតិ ព្រមទាំងចូលរួមរៀបចំការប្រឡងប្រជែងជ្រើសរើសគ្រូអនុវិទ្យាល័យដោយជោគជ័យ ទាំងពីរដំណាក់កាល, ការទទួលពាក្យការប្រឡងប្រជែងជ្រើសរើសគ្រូបង្រៀនបឋមសិក្សា, ការរៀបចំសិក្ខាសាលាស្តីពីការផ្សព្វផ្សាយនិងវិធីសាស្ត្រការវាយតម្លៃអង្គភាពផ្តល់សេវាគំរូក្នុងវិស័យអប់រំ និងសុខាភិបាលទាំងបួនតំបន់, ការចុះអនុស្សរណៈយោគយល់គ្នារវាងក្រសួងអធិការកិច្ច និងសាលាភូមិន្ទរដ្ឋបាល និងត្រៀមខ្លួនក្នុងការពិនិត្យឡើងវិញ និងវិភាគមុខងារនិងរចនាសម្ព័ន្ធក្រសួង ស្ថាប័ន ក៏ដូចជាការធ្វើបច្ចុប្បន្នភាពទិន្នន័យមន្ត្រីរាជការក្នុងវិស័យអប់រំ និងសុខាភិបាល និងការងារជាច្រើនទៀតដែលសម្រេចបាន។

សូមជម្រាបដែរថា កិច្ចប្រជុំប្រចាំខែឧសភា របស់ក្រសួងមុខងារសាធារណៈមានការអញ្ជើញចូលរួមដោយថ្នាក់ដឹកនាំក្រសួង និងមន្ទីរមុខងារសាធារណៈ រាជធានីខេត្ត ទូទាំងប្រទេស៕