ឧត្តមសេនីយ៍ទោ សោម ស៊ុន ដាក់បទបញ្ជាដល់កងកម្លាំងអន្តរាគមន៍ ប្រតិបត្តិការ ការពារ គ្រប់គ្រង និងបង្ក្រាបបទល្មើសធនធានធម្មជាតិ ក្នុងភូមិសាស្ត្រ ខេត្តកំពង់ធំ

ភ្នំពេញ៖ នៅព្រឹកថ្ងៃទី៣១ ខែឧសភា ឆ្នាំ២០២៤ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង អនុប្រធានអចិន្ត្រៃយ៍នៃគណៈកម្មការការពារ គ្រប់គ្រង និងបង្ក្រាបបទល្មើសធនធានធម្មជាតិ ក្នុងភូមិសាស្ត្រខេត្តកំពង់ធំ បានសំណេះសំណាល និងប្រគល់ភារកិច្ចមួយចំនួន ជូនដល់កងកម្លាំងអន្តរាគមន៍ នៃបញ្ជាការដ្ឋានតំបន់ប្រតិបត្តិការសឹករងកំពង់ធំ ដែលត្រូវបន្តចេញដំណើរក្នុងបេសកកម្ម ការពារ គ្រប់គ្រង និងបង្ក្រាបបទល្មើសធនធានធម្មជាតិ ក្នុងភូមិសាស្ត្រ ខេត្តកំពង់ធំ តាមបទបញ្ជារបស់ឯកឧត្តមមេបញ្ជាការយោធភូមិភាគទី៤ និងបទបញ្ជារបស់ឯកឧត្តមប្រធានគណៈបញ្ជាការឯកភាពរដ្ឋបាលខេត្តកំពង់ធំ ។

ឧត្តមសេនីយ៍ទោ សោម ស៊ុន បានបញ្ជាក់ថា យោងតាមបទបញ្ជារបស់សម្ដេចប្រមុខរាជរដ្ឋាភិបាលកម្ពុជា បទបញ្ជារបស់ថ្នាក់ដឹកនាំគ្រប់លំដាប់ថ្នាក់នៃកងយោធពលខេមរភូមិន្ទ និងបទបញ្ជារបស់គណៈបញ្ជាការឯកភាពរដ្ឋបាលខេត្ត ។ កងកម្លាំងទាំងបី រួម ជាមួយ អាជ្ញាធរដែនដី និងសមត្ថកិច្ចជំនាញដែលមានការពាក់ព័ន្ធ ត្រូវចូលរួមការពារ គ្រប់គ្រង និងបង្ក្រាបឲ្យបាននូវរាល់បទល្មើសធនធានធម្មជាតិ ដែលកើតមានឡើងនៅក្នុងភូមិសាស្ត្រ ដែលខ្លួនទទួលខុសត្រូវ ដោយមិនទុកឲ្យជនខិលខូចមួយចំនួនបន្តលបលួចទន្ទ្រានកាប់បំផ្លាញព្រៃឈើ និងទន្ទ្រានយកដីរបស់រដ្ឋ ធ្វើជាកម្មសិទ្ធិបានជាដាច់ខាត។

ក្នុងឱកាសនេះដែរ ឧត្តមសេនីយ៍ទោ សោម ស៊ុន ក៏បានគូសបញ្ជាក់អំពីលទ្ធផលសំខាន់ៗមួយចំនួនដែលកងកម្លាំងចម្រុះបំពេញភារកិច្ចរយៈពេល៣០ថ្ងៃកន្លងមក ទទួលបានលទ្ធផលល្អ គួរជាទីមោទនៈ ដោយមិនមានជនល្មើសណាម្នាក់ហ៊ានចូលលួចកាប់ទន្ទ្រានព្រៃឈើជាថ្មីទៀតឡើយ ដោយ ឡែក ចំពោះអ្នកដែលបានកាប់ទន្ទ្រានយកដីរដ្ឋកន្លងមកកំពុងប្រឈមមុខចំពោះផ្លូវច្បាប់ ជាធរមាន និង បាន សំណូមពរ ដល់ ប្រជាពលរដ្ឋ ទាំង អស់ ត្រូវ ជៀសវាង ឲ្យ ឆ្ងាយ ពី ការ ប្រព្រឹត្តិ បទ ល្មើស ដោយ ត្រូវ រួម គ្នា ចូលរួម ក្នុង ការ ការ ពារ គ្រប់ គ្រង ធនធាន ធម្មជាតិ សម្រាប់កូនចៅ យេីង ទាំងអស់ គ្នា ។

ឧត្តមសេនីយ៍ទោ សោម ស៊ុន បានប្រគល់ភារកិច្ចសំខាន់ៗមួយចំនួន ជូនដល់កងកម្លាំងអន្តរាគមន៍ ដើម្បីជួយអន្តរាគមន៍ដល់បណ្ដាគោលដៅមួយចំនួនដែលមានបញ្ហាស្មុកស្មាញ ហើយកងកម្លាំងទាំងអស់ត្រូវប្ដេជ្ញាចិត្តដាច់ខាត ក្នុងការអនុវត្តភារកិច្ចការពារ គ្រប់គ្រង នឹងបង្ក្រាបបទល្មើសធនធានធម្មជាតិ តាមបទបញ្ជារបស់សម្តេចប្រមុខរាជរដ្ឋាភិបាលនៃព្រះរាជាណាចក្រកម្ពុជា ឲ្យទទួលបានជោគជ័យ ។

នៅក្នុងពិធីសំណេះសំណាល និងប្រគល់ភារកិច្ចនេះ ឧត្តមសេនីយ៍ទោ សោម ស៊ុន បានប្រគល់នូវគ្រឿងឧបភោគបរិភោគ សម្ភារៈប្រើប្រាស់ និងថវិកាមួយចំនួន ដែល ជាជំនួយឧបត្ថម្ភ របស់ ឯកឧត្ដម ងួន រតនៈ ជូនដល់កងកម្លាំងអន្តរាគមន៍នៃបញ្ជាការដ្ឋានតំបន់ប្រតិបត្តិការសឹករងកំពង់ធំ ដែលត្រូវបន្តចេញទៅបំពេញបេសកកម្ម នៅពេលនេះផងដែរ៕