ឯកឧត្តមកិត្តិសេដ្ឋាបណ្ឌិត ជាម យៀប អញ្ជើញចុះពិនិត្យការដាក់លូ ៤កន្លែង លើការសាងសង់ផ្លូវបេតុងអាមេប្រវែងជាងពីពាន់ម៉ែត្រ នៅស្រុកពាមរក៍
ភ្នំពេញ៖ នៅក្នុងឱកាសអញ្ជើញពិនិត្យមើលវឌ្ឍនភាពការសាងសង់ផ្លូវបេតុងអាមេ១ខ្សែប្រវែងជាងពីរពាន់ម៉ែត្រ ស្ថិតនៅភូមិព្រែកចាម ឃុំបន្លិចប្រាសាទ ស្រុកពាមរក៍ ខេត្តព្រៃវែង នាព្រឹកថ្ងៃទី៣១ ខែឧសភា ឆ្នាំ២០២៤ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភា និងលោកជំទាវសិរីចរណវិសុទ្ធិអគ្គមហាឧបាសិកាពុទ្ធសាសនូបត្ថម្ភក៍ ហាក់ ជូ បានអញ្ជើញចុះពិនិត្យការដាក់លូចំនួន៤កន្លែងដែលមានមុខកាត់១ម៉ែត្រ និងបណ្តោយប្រវែង១២ម៉ែត្រ ដោយពីរកន្លែងចំនួនពីរកង់ និងពីរកន្លែងទៀតដាក់ចំនួនបីកង់។
ឯកឧត្តមកិត្តិសេដ្ឋាបណ្ឌិត ជាម យៀប ក៏បានជំរុញឱ្យក្រុមជាង ក៏ដូចជាកម្មករធ្វើផ្លូវទាំងអស់ ត្រូវខិតខំធ្វើយ៉ាងណាពន្លឿនការងារក្នុងការធ្វើផ្លូវ និងដាក់លូនេះឱ្យបានចប់សព្វគ្រប់ជាស្ថាពរ នៅមុនពេលរដូវវស្សាចូលមកដល់ ឆាប់ៗនេះ។
សូមជម្រាបថា ផ្លូវបេតុងអាមេដែលមានប្រវែង២,១០០ម៉ែត្រ ចាប់ពីខ្លោងទ្វារវត្តព្រែកខ្សាយរហូតដល់វត្តពោសិរីអណ្តែត ហៅវត្តព្រែកចាម បានប្រារព្ធពិធីបើកការដ្ឋានសាងសង់កាលពីថ្ងៃទី៨ ខែមីនា ឆ្នាំ២០២៤ រហូតមកទល់ពេលនេះកសាងបានប្រមាណ៥០%ហើយ។
ផ្លូវបេតុងអាមេនេះ ជាគំនិតផ្តួចផ្តើមសាងសង់ដោយ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភា និងលោកជំទាវសិរីចរណវិសុទ្ធិអគ្គមហាឧបាសិកាពុទ្ធសាសនូបត្ថម្ភក៍ ហាក់ ជូ រួមជាមួយសប្បុរសជននានា សម្រាប់បម្រើប្រយោជន៍សាធារណៈ ពិសេសជូនដល់ប្រជាពលរដ្ឋនៅភូមិព្រែកចាម ឃុំបន្លិចប្រាសាទ ស្រុកពាមរក៍ ខេត្តព្រៃវែង ដើម្បីមានភាពងាយស្រួលក្នុងការធ្វើដំណើរ ក៏ដូចជាការដឹកជញ្ជូនកសិផល និងទំនិញផ្សេងៗ ៕
