«ភ្នំសំពៅ» ជារមណីយដ្ឋានទេសចរណ៍ធម្មជាតិមួយ មានទេសភាពស្រស់ត្រកាល ដែលអ្នកទេសចរមិនគួររំលង

បាត់ដំបង៖ «ភ្នំសំពៅ» ជារមណីយដ្ឋានទេសចរណ៍ធម្មជាតិមួយ ដែលមានទេសភាពស្រស់ត្រកាល ហើយអ្វីដែលពិសេសអាចទាក់ទាញទេសច ឱ្យមកទស្សនានោះគឺហ្វូងសត្វប្រចៀវជាច្រើនលានក្បាលហើរចេញពីល្អាងភ្នំរៀងរាល់ល្ងាច ។ ដូច្នេះបើសិនជាបានទៅលេងខេត្តបាត់ដំបង សូមកុំរំលងឱ្យសោះ រមណីយដ្ឋាន «ភ្នំសំពៅ» ។

បើតាមក្រសួងទេសចរណ៍ បានឲ្យដឹងថា ភ្នំសំពៅស្ថិតតាមដងផ្លូវជាតិលេខ៥៧ ស្ថិតក្នុងឃុំភ្នំសំពៅ ស្រុកបាណន់​ នៅខាងលិចទីរួមខេត្តបាត់ដំបង។ ភ្នំនេះមានកំពស់ប្រមាណ១០០ម៉ែត្រកាំជណ្តើរឡើងចំនួន១០៣០កាំ។ នៅលើកំពូលភ្នំមានវត្តមួយឈ្មោះថា វត្តគិរីរម្យ និងមានល្អាង រូងភ្នំសរុបទាំងអស់ចំនួន១២រួមមាន ល្អាងផ្កាស្លា ល្អាងគក់ទ្រូង ល្អាងខ្យល់ ល្អាង តែងខ្លួន ល្អាងល្ខោន ល្អាងជ្រៃ ល្អាងពេជ្រ ល្អាងខ្វែង ល្អាងប្រេង ល្អាងស្ថានីយ ឬល្អាងធំ ល្អាងក្បាលខ្មោច និងល្អាងប្រចៀវ។ ប៉ុន្តែល្អាងដែលភ្ញៀវនិយមចូលទស្សនាមានតែល្អាងផ្កាស្លា និងល្អាងល្ខោន។ នៅក្បែរភ្នំសំពៅមានចម្កោមភ្នំសំខាន់ៗមួយចំនួនទៀតដែលមានជាប់ទាក់ទងនឹងរឿងព្រេងនិទានខ្មែរគឺ រឿងព្រះបាទរាជកុល នាងរំសាយសក់។ ភ្នំទាំងនោះមានភ្នំក្តោង ភ្នំក្រពើ ភ្នំអណ្តើក ភ្នំទ្រុងមាន់ ទ្រុងទា ភ្នំនាងរំសាយសក់ ភ្នំតាគ្រាម និងភ្នំសងក្បាល់។

ក្រ​សួងបន្ថែមថា​ ទស្សនីយភាពហ្វូងសត្វប្រជៀវរាប់លានក្បាល ដែលហោះ ចេញពីល្អាង អ្នកស្រុកតែងតែហៅហ្វូងប្រជៀវទាំងនោះថា «កងទ័ពប្រជៀវដ៏ក្លាហាន» ពីព្រោះការហោះហើររបស់ហ្វូងសត្វប្រជៀវទាំងនោះប្រៀបបានទៅនឹងចរន្តទឹកហូរលើផ្ទៃអាកាស។  ជារៀងរាល់ថ្ងៃនៅមុនពេលសូរិយារៀបអស្តង្គត់ នៅចន្លោះម៉ោង៥និង៣០នាទី ដល់ម៉ោង៦និង១៥នាទីល្ងាចគឺជាពេលវេលាជាក់លាក់ដែលហ្វូងសត្វប្រជៀវចាប់ផ្តើមហោះហើរបណ្តែតខ្លួនចេញពីរូង មានពណ៌ខ្មៅដាស់ពេញមេឃ និងតម្រង់ជួរគ្នាចេញពីរូងធ្វើឱ្យមានការចាប់អារម្មណ៍យ៉ាងខ្លាំងពីភ្ញៀវជាតិ និងអន្តរជាតិមកពីគ្រប់ទិសទីមកទស្សនាកម្សាន្តអារម្មណ៍នៅរមណីយដ្ឋានភ្នំសំពៅ។

ភ្ញៀវទេសចរជាតិ និងអន្តរជាតិរាប់រយនាក់ក្នុងមួយថ្ងៃៗដែលនាំគ្នាអង្គុយរង់ចាំទស្សនាហ្វូងសត្វប្រជៀវរាប់លានក្បាលហើរចេញពីល្អាង សុទ្ធតែបានបង្ហាញពីទឹកមុខរីករាយចំពោះទិដ្ឋភាពដ៏អស្ចារ្យនេះ។ ក្នុងនោះផងដែរហ្វូងសត្វប្រជៀវទាំងអស់នោះត្រូវបានការពារ និងអភិរក្សយ៉ាងតឹងរឹងដោយអាជ្ញាធរមូលដ្ឋាន។