ឯកឧត្ដម លន់ លឹមថៃ អញ្ជើញបញ្ចុះបឋមសិលាកសាងខ្លោងទ្វារ វិទ្យាល័យ ហ៊ុន សែន សំពងជ័យ

ភ្នំពេញ៖ នៅថ្ងៃទី១ ខែមិថុនា ឆ្នាំ២០២៤ ឯកឧត្តម លន់ លឹមថៃ លេខាធិការគណៈកម្មការទី៣ នៃរដ្ឋសភា និងជាតំណាងរាស្ត្រមណ្ឌលខេត្តកំពង់ចាម បានអញ្ជើញជួបសំណេះសំណាលជាមួយលោកគ្រូ អ្នកគ្រូ សិស្សានុសិស្ស និងជាអធិបតីក្នុងពិធីបញ្ចុះបឋមសិលាកសាងខ្លោងទ្វារ វិទ្យាល័យ ហ៊ុន សែន សំពងជ័យ ស្រុកជើងព្រៃ ខេត្តកំពង់ចាម។

ក្នុងឱកាសនោះ ឯកឧត្តម បានថ្លែងនូវការកោតសរសើរ និងអរគុណយ៉ាងជ្រាលជ្រៅបំផុតជូនចំពោះ លោកគ្រូ អ្នកគ្រូ នៅវិទ្យាល័យ ហ៊ុន សែន សំពងជ័យ ដែលបានយកអស់កម្លាំងកាយចិត្ត ក្នុងការបង្ហាត់បង្រៀនដល់សិស្សានុសិស្សឱ្យទទួលបាននូវចំណេះដឹងល្អៗ ក៏ដូចជាការប្រៀនប្រដៅឱ្យសិស្សានុសិស្សរបស់យើងឱ្យក្លាយជាយុវជនដែលជាទំពាំស្នងឬស្សីដ៏ល្អ និងប្រកបដោយគុណភាពសម្រាប់ប្រទេសជាតិ។

ឯកឧត្តម បានផ្តាំផ្ញើឱ្យសិស្សានុសិស្សទាំងអស់ត្រូវបង្កើននូវការខិតខំរៀនសូត្រឱ្យក្លាយទៅជាសិស្សល្អ កូនល្អ និងត្រូវជៀសវាងនូវរាល់អំពើអបាយមុខទាំងឡាយណាដែលសង្គមស្អប់ខ្ពើម ត្រូវធ្វើខ្លួនឱ្យក្លាយជាយុវជនដែលមានឧត្តមភាពសម្រាប់សង្គមជាតិរបស់យើង។

ឯកឧត្តម បានជម្រាបជូនអំពីសភាពការណ៍ថ្មីៗដែលកើតមាន ក៏ដូចជាលើកឡើងអំពីវឌ្ឍនភាព និងការរីកចម្រើនឥតឈប់ឈរលើគ្រប់វិស័យក្រោមការដឹកនាំដ៏ល្អ និងឈ្លាសវៃរបស់ប្រមុខរដ្ឋាភិបាលដែលដឹកនាំដោយ សម្តេចបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានធ្វើឱ្យប្រទេសមួយនេះកាន់តែមានការរីកចម្រើនខ្លាំងខ្លា និងខ្ពស់មុខខ្ពស់មាត់ក្នុងឆាកអន្តជាតិ។

ឯកឧត្តម ក៏បានសំណូមពរឱ្យលោកគ្រូ អ្នកគ្រូ សិស្សានុសិស្ស ក៏ដូចជាប្រជាពលរដ្ឋទាំងអស់ ត្រូវរួមគ្នាបន្តនូវការគាំទ្រដល់ការដឹកនាំដ៏ល្អរបស់រដ្ឋាភិបាល ដើម្បីដឹកនាំនាវាកម្ពុជាឱ្យរក្សាបាននូវសុខសន្តិភាព និងការអភិវឌ្ឍរីកចម្រើនឱ្យបានគង់វង្សយូរអង្វែងជានិរន្តរ៍។

ក្នុងឱកាសនោះ ឯកឧត្តម លន់ លឹមថៃ បានចូលរួមថវិកាសាងសង់ខ្លោងទ្វារចំនួន ២លានរៀល ជូនលោកគ្រូ អ្នកគ្រូចំនួន៧៤នាក់ ក្នុងម្នាក់ៗថវិកា ២ម៉ឺនរៀល ជូនលោកតា លោកយាយ ចំនួន២០នាក់ក្នុងម្នាក់ៗ ក្រណាត់ស ១ដុំ ថវិកា ១ម៉ឺនរៀល និងជូនប្រជាការពារចំនួន៧នាក់ ក្នុងម្នាក់ៗ២ម៉ឺនរៀល ផងដែរ ៕