ទារកមានកាយសប្បទាខុសប្រក្រតី និងមានជីវភាពក្រីក្រនៅស្រុកឯកភ្នំ បានទទួលអំណោយមនុស្សធម៌ ពីក្រុមការងារឥស្សរជនឆ្នើមថ្នាក់ជាតិ នៃសាខាកាកបាទក្រហមកម្ពុជាខេត្តបាត់ដំបង
ភ្នំពេញ៖ បន្ទាប់ពីទទួលបានពត៌មានស្តីពីទារកមានកាយសប្បទាខុសប្រក្រតី និងមានជីវភាពក្រីក្រ នៅរសៀលថ្ងៃទី៤ ខែមិថុនា ឆ្នាំ ២០២៤ ឯកឧត្តម សុខ លូ ប្រធានគណៈកម្មាធិការសាខា និងជាប្រធានក្រុមការងារឥស្សរជនឆ្នើមថ្នាក់ជាតិ នៃសាខាខេត្តបានចាត់ឱ្យ លោក ផេង សិទ្ធី សមាជិកគណៈកម្មាធិការសាខា និងសហការី រួមជាមួយ លោក ម៉ិល សុផល ប្រធានគណៈកម្មាធិាករអនុសាខាស្រុកឯកភ្នំ ព្រមទាំងក្រុមកាកបាទក្រហមឃុំ អ្នកស្ម័គ្រចិត្តភូមិ ចុះសួរសុខទុក្ខ និងនាំយកអំណោយ មនុស្សធម៌របស់កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុនសែន ជាប្រធាន និងជាឥស្សរជនឆ្នើមថ្នាក់ជាតិ នៃផែនការសកម្មភាពរួមអគ្គលេខាធិការអង្គការសហ ប្រជាជាតិ ដើម្បីសុខភាពស្ត្រី និងកុមារ ផ្តល់ជូន លោកស្រី លួម សារិន្ធ (ចំប៉ី) អាយុ៣០ឆ្នាំ មាន ប្តីឈ្មោះ ហេង ទិត្យ អាយុ៣៥ឆ្នាំ ដែលមានជីវភាពក្រីក្រ និងមានកូនតូចដែលមានទារកមានកាយសប្បទាខុសប្រក្រតី (ម្រាមដៃ ម្រាមជើង តែ១ស្ថិតនៅភូមិព្រែកនរិន្ទ ឃុំព្រែកនរិន្ទ ស្រុកឯកភ្នំ ខេត្តបាត់ដំបង។
នាឱកាសនោះ លោក ផេង សិទ្ធី បានពាំនាំមកនូវប្រសាសន៍ផ្តាំផ្ញើសួរសុខទុក្ខ ពីសំណាក់ឯកឧត្តមសន្តិបណ្ឌិត សុខ ផល ប្រធានកិត្តិយសសាខាខេត្ត និងឯកឧត្តម សុខ លូ ប្រធានគណៈកម្មាធិការសាខាខេត្ត ពិសេសពីសម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិ នៃផែនការសកម្មភាពរួមអគ្គលេខាធិការអង្គការសហប្រជាជាតិ ដើម្បីសុខភាពស្រ្តីនិងកុមារ ដែលជានិច្ចកាលសម្តេចតែងតែគិតគូរពីសុខទុក្ខរបស់បងប្អូនប្រជាពលរដ្ឋជួបការលំបាក អ្នកមានជំងឺ ជនងាយរងគ្រោះ និងជនរងគ្រោះ ដោយគ្រោះមហន្តរាយផ្សេងៗ ជាពិសេសស្រ្តីទើបសម្រាលកូនដែលមានជីវភាពខ្វះខាត និងសូមខិតខំថែរក្សាសុខភាពឱ្យបានល្អប្រសើរ ដោយប្រកាន់យកនូវអនាម័យល្អ រស់នៅស្អាត បរិភោគស្អាត ផឹកស្អាត និងយកកូនទៅចាក់ថ្នាំបង្ការឱ្យបានទៀងទាត់តាមការណាត់របស់គ្រូពេទ្យ និងសូមបំបៅកូនដោយទឹកដោះ ពិសេសត្រូវបរិភោគអាហារដែលមានជីវជាតិ ឱ្យបានច្រើន។
សម្ភារៈផ្តល់ជូនក្នុង ១គ្រួសារ ទទួលបាន៖ អង្ករ ៧៥គីឡូក្រាម, ទឹកត្រី ២យួរ, ទឹកស៊ីអ៉ីវ ២យួរ, ត្រីខ ១យួរ, មី ២កេស, ទឹកសុទ្ធ ២កេស ឃីត១កញ្ចប់ (មុង ភួយ ក្រមា សារុង)និងថវិកាចំនួន ៤០ម៉ឺនរៀលផងដែរ៕
