ឧបនាយករដ្ឋមន្រ្តី ហ៊ុន ម៉ានី រំឭកដល់ ក្រសួង -ស្ថាប័នទាំងអស់ ត្រូវពង្រឹងរចនាសម្ព័ន្ធឱ្យបានល្អ ជាជាងពង្រីកថែមឱ្យកាន់តែធំ
ភ្នំពេញ៖ ឯកឧត្ដមឧបនាយករដ្ឋមន្រ្តី ហ៊ុន ម៉ានី រដ្ឋមន្រ្តីក្រសួងមុខងារសាធារណៈ បានថ្លែងថា ក្រសួង ស្ថាប័នទាំងអស់ ត្រូវពង្រឹងរចនាសម្ព័ន្ធឱ្យបានល្អ ជាងការពង្រីកថែមឱ្យកាន់តែធំ។
ក្នុងវគ្គបណ្ដុះបណ្ដាល ស្តីពីការពិនិត្យឡើងវិញ ការវិភាគមុខងារ និងរចនាសម្ព័ន្ធក្រសួង-ស្ថាប័ន និងការធ្វើបច្ចុប្បន្នភាពរចនាសម្ព័ន្ធ ទិន្នន័យមន្រ្តីរាជការស៊ីវិលក្រសួង-ស្ថាប័ន នៅព្រឹកថ្ងៃទី៤ មិថុនា ឯកឧត្ដម ហ៊ុន ម៉ានី បានប្រាប់ដល់ថ្នាក់ដឹកនាំក្រសួង-ស្ថាប័ន ត្រូវរៀបចំពិនិត្យឡើងវិញ ដោយវិភាគមុខងារ និងរចនាសម្ព័ន្ធជាពិសេសការធ្វើបច្ចុប្បន្នភាពរចនាសម្ព័ន្ធ ទិន្នន័យមន្ត្រីរាជការស៊ីវិល ដើម្បីឆ្លើយតបឱ្យទាន់ពេលវេលាកំណត់។
ឯកឧត្ដម ហ៊ុន ម៉ានី បានបញ្ជាក់ថា ការពិនិត្យឡើងវិញ ការវិភាគមុខងារ និងរចនាសម្ព័ន្ធក្រសួង-ស្ថាប័ន ត្រូវអនុវត្តដោយឈរលើអភិក្រម ផ្តោតលើការរៀបចំផ្ទះរបស់យើង ដោយត្រូវពង្រឹងរចនាសម្ព័ន្ធ ជាជាងការពង្រីករចនាសម្ព័ន្ធ។
ឯកឧត្ដមរដ្ឋមន្រ្តី ក្រសួង មុខងារ សាធារណៈ បានបន្ត ថា ការវិភាគមុខងារ ត្រូវឈរលើភាពជាម្ចាស់ការ និងការទទួលខុសត្រូវតាមបន្ទាត់ គណនេយ្យភាព និងរក្សាផលប្រយោជន៍របស់មន្ត្រី។ លើសពី នេះ ត្រូវគិតគូរដល់ប្រសិទ្ធភាព និងសមិទ្ធកម្មការងារ តាមរយៈការប្រើប្រាស់ធនធានថវិកា ធនធានមនុស្សឱ្យកាន់តែមានប្រសិទ្ធភាព ចំគោលដៅ និងទីកន្លែង ស្របតាមតួនាទីភារកិច្ចរបស់ក្រសួង ស្ថាប័ននីមួយៗ។
បើតាម ឯកឧត្ដម ហ៊ុន ម៉ានី ក្រសួងមុខងារសាធារណៈ បានរៀបចំក្រុមការងារបច្ចេកទេសគាំទ្រតាមវិស័យ ដើម្បីសម្របសម្រួល និងផ្តល់ការគាំទ្រផ្នែកបច្ចេកទេសលើការពិនិត្យឡើងវិញ ការវិភាគមុខងារ និងរចនាសម្ព័ន្ធក្រសួង-ស្ថាប័ន។
ក្នុងពិធីបើកវគ្គបណ្តុះបណ្តាលនេះ ឯកឧត្ដម ហ៊ុន ម៉ានី បានស្នើ ឱ្យ ក្រសួង-ស្ថាប័ន ត្រូវរៀបចំរបាយការណ៍វឌ្ឍនភាពជាប្រចាំ ផ្ញើមកក្រសួង ពាក់ព័ន្ធការងារពិនិត្យឡើងវិញ ការវិភាគមុខងារ និងរចនាសម្ព័ន្ធ និងការធ្វើបច្ចុប្បន្នភាពរចនាសម្ព័ន្ធ ទិន្នន័យមន្ត្រីរាជការស៊ីវិល ។ ការផ្ដល់របាយការណ៍នេះ ដើម្បីឱ្យក្រសួង អាចមានលទ្ធភាពជួយផ្តល់ការសម្របសម្រួល និងគាំទ្រផ្នែកបច្ចេកទេសបន្ថែមឱ្យបានទាន់ពេលវេលា៕
