ក្រសួង ស្ថាប័ន ចំនួន៣២ ទទួលបានការបណ្តុះបណ្តាល រយៈពេល ២ថ្ងៃ ស្តីពី «ការពិនិត្យឡើងវិញ ការវិភាគមុខងារ និងរចនាសម្ព័ន្ធក្រសួង ស្ថាប័ន និងការធ្វើបច្ចុប្បន្នភាពទិន្នន័យមន្ត្រីរាជការស៊ីវិលក្រសួង ស្ថាប័ន»

ភ្នំពេញ៖ វគ្គបណ្តុះបណ្តាល ស្តីពី«ការពិនិត្យឡើងវិញ ការវិភាគមុខងារ និងរចនាសម្ព័ន្ធក្រសួង ស្ថាប័ន និងការធ្វើបច្ចុប្បន្នភាពទិន្នន័យមន្ត្រីរាជការស៊ីវិលក្រសួង ស្ថាប័ន» រយៈពេល ២ថ្ងៃ បានបញ្ចប់ជាស្ថាពរ នារសៀលថ្ងៃទី០៥ ខែមិថុនា ឆ្នាំ២០២៤ ក្រោមអធិបតីភាពឯកឧត្តមយក់ ប៊ុនណា រដ្ឋលេខាធិការប្រចាំការ ក្រសួងមុខងារសាធារណៈ ដោយមានសិក្ខាកាមដែលជាថ្នាក់ដឹកនាំ តំណាងក្រសួង ស្ថាប័ន ចំនួន ២៥៩នាក់(ស្រី ២៩នាក់) អញ្ជើញចូលរួមពីក្រសួង ស្ថាប័ន ចំនួន៣២។

ថ្លែងជារបាយការណ៍នៅក្នុងពិធីបិទវគ្គបណ្តុះបណ្តាល លោកជំទាវ ឈី វិជ្ជរ៉ា រដ្ឋលេខាធិការក្រសួងមុខងារសាធារណៈ និងជាប្រធានក្រុមការងារបច្ចេកទេសលើកកម្ពស់ប្រសិទ្ធភាពការងារ វគ្គបណ្តុះបណ្តាលបានរៀបចំវាគ្មិនដែលជាថ្នាក់ដឹកនាំជាន់ខ្ពស់របស់ក្រសួងមុខងារសាធារណៈ ធ្វើបទបង្ហាញចំនួន៥ រួមមាន៖ (១).ការពិនិត្យឡើងវិញ និងការវិភាគមុខងារនិងរចនាសម្ព័ន្ធក្រសួង-ស្ថាប័ន (២).ការធ្វើបច្ចុប្បន្នភាពទិន្នន័យមន្ត្រីរាជការស៊ីវិលក្រសួង-ស្ថាប័ន (៣).ការធ្វើបច្ចុប្បន្នភាពរចនាសម្ព័ន្ធ និងទិន្នន័យមន្ត្រីរាជការស៊ីវិលក្រសួង-ស្ថាប័ន និង (៤).ការរៀបចំរបាយការណ៍ និង(៥).យន្តការគាំទ្រក្រសួង-ស្ថាប័ន ហើយវគ្គបណ្តុះបណ្តាលបានរៀបចំវេទិកាពិភាក្សា សំណួរចម្លើយ ពាក់ព័ន្ធបទបង្ហាញខាងលើ ព្រមទាំងរៀបចំក្រុមការងារពិភាក្សាផងដែរ។

បន្ទាប់ពីស្តាប់របាយការណ៍បូកសរុបរួចមក ឯកឧត្តម យក់ ប៊ុនណា រដ្ឋលេខាធិការប្រចាំការ ក្រសួងមុខងារសាធារណៈ បានលើកឡើងថាក្នុងនាមឯកឧត្តម ជាតំណាងឯកឧត្តមឧបនាយករដ្ឋមន្ត្រី ហ៊ុន ម៉ានី ឯកឧត្តមសូមបញ្ជាក់ថា កិច្ចការពិនិត្យឡើងវិញ ការវិភាគមុខងារ និងរចនាសម្ព័ន្ធក្រសួង ស្ថាប័ន និងការធ្វើបច្ចុប្បន្នភាពទិន្នន័យមន្ត្រីរាជការស៊ីវិលក្រសួង ស្ថាប័ន គឺជាកិច្ចការអាទិភាពរបស់យើងទាំងអស់គ្នា នៅក្នុងអាណត្តិនីតិកាលទី៧ នៃរដ្ឋសភា របស់រាជរដ្ឋាភិបាល។ នេះជាកិច្ចការដ៏មានសារៈសំខាន់ ដែលសម្តេចធិបតីនាយករដ្ឋមន្ត្រី បានគូសបញ្ជាក់នូវអភិក្រម ២យ៉ាង សម្រាប់បន្តកិច្ចការទៅមុខ ពិសេសការងារកែទម្រង់របស់រាជរដ្ឋាភិបាល គឺអភិក្រមនៃការពង្រឹង និងអភិក្រមនៃការរៀបចំផ្ទះរបស់ខ្លួនឱ្យបានរៀបរយ។ ឯកឧត្តមរដ្ឋលេខាធិការប្រចាំការ ក៏បានបន្ថែមថា អភិក្រមទាំង ២យ៉ាងនេះ បង្ហាញពីភាពរៀបរយនៃក្រសួង ស្ថាប័ន ដែលអាចនាំឱ្យយើងចាក់គ្រឹះយ៉ាងរឹងមាំ និងជាវប្បធម៌នៃការគ្រប់គ្រងការបំពេញការងាររបស់យើង ដែលយើងរាល់គ្នាកំពុងកសាងប្រវត្តិសាស្ត្រថ្មីនៅក្នុងក្របខណ្ឌនៃការរៀបចំរបៀបរៀបរយរបស់ក្រសួង ស្ថាប័ន សម្រាប់ដំណើរទៅមុខ និងជាសមត្ថភាពដែលអាចបត់បែនតាមការផ្លាស់ប្តូរថ្មីៗនោះបាន។ ការវិភាគមុខងារ គឺការរៀបចំឱ្យក្រសួង ស្ថាប័ន មិនមានតួនាទីជាន់គ្នា តែអភិក្រមការងារត្រូវមានភាពប្រទាក់ក្រឡាគ្នារវាងស្ថាប័នមួយ ទៅស្ថាប័នមួយទៀត។

បន្ថែមក្នុងប្រសាសន៍បិទវគ្គបណ្តុះបណ្តាល ឯកឧត្តមរដ្ឋលេខាធិការប្រចាំការ បានលើកទឹកចិត្តឱ្យក្រសួង ស្ថាប័ន ទាំងអស់ចូលរួមសហការការងារដោយការយោគយល់គ្នា គាំទ្រគ្នា ដើម្បីសម្រេចបាននូវកិច្ចការងារនេះ ស្របតាមគោលដៅដែលបានដាក់ចេញដោយរាជរដ្ឋាភិបាល។ ការសម្រេចបាននូវលទ្ធផលទាំងអស់នេះហើយ គឺជាការកសាងខឿននៃប្រព័ន្ធរដ្ឋបាលសាធារណៈកាន់តែរឹងមាំ ៕