សម្ដេចធិបតី ហ៊ុន ម៉ាណែត ប្រកាសថាគម្រោងកដែលជាព្រែកជីកដ៏ធំរបស់កម្ពុជាមានភាគហ៊ុនពីអ្នកវិនិយោគកម្ពុជាចំនួន៥១%

ភ្នំពេញ៖ ក្នុងឱកាសអញ្ជើញជាអធិបតីសម្ពោធបើកឲ្យប្រើប្រាស់ជាផ្លូវការ «កំពង់ផែពហុបំណងកំពត» នៅព្រឹកថ្ងៃទី៦ ខែមិថុនា ឆ្នាំ២០២៤ សម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានប្រកាសថាគម្រោងព្រែកជីកហ្វូណនតេជោ ដែលជាព្រែកជីកដ៏ធំរបស់កម្ពុជានឹងមានភាគហ៊ុនពីអ្នកវិនិយោគកម្ពុជាចំនួន៥១%។

សម្ដេចធិបតីថា គម្រោងព្រែកជីកហ្វូណនតេជោនឹងមានក្រុមហ៊ុនរដ្ឋចំនួន២ គឺកំពង់ផែស្វយ័តរាជធានីភ្នំពេញនិងកំពង់ផែខេត្តព្រះសីហនុចូលរួមជាម្ចាស់ភាគហ៊ុនធំនៅក្នុងគម្រោងនេះ ហើយគម្រោងព្រែកជីកដ៏ធំនេះនឹងចាប់ផ្ដើមនៅថ្ងៃទី៥ ខែសីហា ឆ្នាំ២០២៤ខាងមុខ។

សម្ដេចថា សូមបងប្អូនបន្តជឿជាក់ចុះថាគម្រោងនេះមិនមែនជាផលប្រយោជន៍របស់ប្រទេសណានោះទេ គឺជាផលប្រយោជន៍របស់ជាតិកម្ពុជាប្រជាជនកម្ពុជាពីបច្ចុប្បន្នទៅអនាគត ព្រោះគម្រោងនេះមិនមែនធ្វើប្រាំឆ្នាំហើយកប់វិញទេគឺសម្រាប់រាប់រយឆ្នាំទៅមុខទៀត។

សូមបញ្ជាក់ថា គម្រោងព្រែកជីក ហ្វូណនតេជោ គឺជាគម្រោងព្រែកជីកដ៏ធំរបស់កម្ពុជាចាក់ទម្លុះទៅកាន់សមុទ្ររបស់កម្ពុជាដោយផ្ទាល់ ឈប់រំពឹងលើសមុទ្ររបស់វៀតណាមនឹងផ្ដល់អត្ថប្រយោជន៍ជាច្រើនដល់ប្រទេសកម្ពុជា ជាពិសេសវិស័យដឹកជញ្ជូន អចលនទ្រព្យ និងការវិនិយោគផ្សេងៗ ខណៈដែលគម្រោងមួយនេះ គ្រោងនឹងចំណាយទឹក ប្រាក់រហូតដល់ប្រមាណ ១,៧ ពាន់លានដុល្លារអាមេរិក ដោយត្រូវប្រើពេលវេលា៤ឆ្នាំ ដើម្បីសាងសង់បញ្ចប់គម្រោង៕