ប្រមុខរាជរដ្ឋាភិបាល អំពាវនាវកុំឲ្យមានចលនាទិញដី តាមតម្រាយគម្រោងព្រែកជីកហ្វូណនតេជោ ដើម្បីទារសំណងពីរដ្ឋ

ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអំពាវនាវកុំឱ្យមានចលនាទិញដី ស្ថិតនៅតាមតម្រាយគម្រោងព្រែកជីកហ្វូណនតេជោ ដើម្បីទារសំណងពីរដ្ឋ។

ក្នុងឱកាសអញ្ជើញសម្ពោធដាក់ឱ្យប្រើប្រាស់​កំពង់ផែពហុបំណងកំពត តម្លៃ១៤០លានដុល្លារ នាថ្ងៃទី៦ ខែមិថុនា ឆ្នាំ២០២៤ សម្តេចធិបតី ក៏បានអំពាវនាវប្រជាពលរដ្ឋចូលរួមទាំងអស់គ្នា ព្រោះបើគ្មានការចូលរួម គម្រោងរបស់ជាតិ មានតែនៅលើក្រដាសដដែល។ សម្តេចធិបតី បានបន្តថា បើស្រលាញ់ជាតិពិតប្រាកដ ចង់ឱ្យកម្ពុជាមានឯករាជ្យភាពក្នុងដឹកជញ្ជូន ចង់ឃើញទិសនិរតី មានការអភិវឌ្ឍសេដ្ឋកិច្ច ចង់ឱ្យទូទាំងប្រទេសរបស់យើងបានផលពីព្រែកជីកប្រវត្តិសាស្ត្រនេះ ត្រូវតែរួមគ្នាធ្វើ។

សម្តេចធិបតី ហ៊ុន ម៉ាណែត បានបញ្ជាក់យ៉ាងដូច្នេះថា «ចុងក្រោយខ្ញុំសុំបងប្អូន ដែលមិនរស់នៅតំបន់ ជាពិសេសអ្នកវិនិយោគ អ្នកដែលចាប់ឱកាសលឿន ខ្ញុំសុំ ព្រោះឥលូវខ្ញុំឮល្ហៀងៗថាប្រមូលគ្នាទិញដី។ កុំ! សូមកុំប៉ះអាកន្លែង ដែលយើងធ្វើ បើយើងធ្វើព្រែកជីកមិនកើត ឬយឺត ក៏យើងខាតដែរ។ កុំ! ពេលរដ្ឋដាក់គោលនយោបាយ ស្រាប់តែឃើញដីស្រែបោះទង់ ១ការ៉េ ១ពាន់ដុល្លារ ចប់ហើយ។ កន្លែងហ្នឹងទុកទៅ។ ខ្ញុំសូមអំពាវនាវទុកមុនឱ្យហើយ ដើម្បីរួមគ្នា ជាពិសេសបងប្អូនរស់នៅតាមបណ្តោយសណ្តរព្រែក»។

សម្តេចធិបតី ហ៊ុន ម៉ាណែត បានបញ្ជាក់ជាថ្មីថា គម្រោងព្រែកជីកហ្វូណនតេជោ មិនមែនវិនិយោគដោយក្រុមហ៊ុនបរទេស ១០០ភាគរយទៀតហើយ គឺក្រុមហ៊ុនខ្មែរជាអ្នកកាន់ទុនភាគច្រើន គឺចាប់ពី៥១ភាគរយឡើងទៅ។ សម្តេចបញ្ជាក់ថា ក្រុមហ៊ុនខ្មែរដែលចូលរួមវិនិយោគព្រែកជីកហ្វូណនតេជោ រួមមានកំពង់ផែស្វយ័តព្រះសីហនុ កំពង់ផែស្វយ័តភ្នំពេញ និងក្រុមហ៊ុនឯកជនមួយទៀត។

សម្តេចធិបតី ហ៊ុន ម៉ាណែត បានបន្ថែមថា គម្រោងព្រែកជីកហ្វូណនតេជោ ដើម្បីផលប្រយោជន៍ជាតិ និងពលរដ្ឋខ្មែរពីបច្ចុប្បន្នទៅអនាគត មិនមែនដើម្បីប្រយោជន៍បរទេសនោះឡើយ៕