ឧត្តមសេនីយ៍ទោ សោម ស៊ុន ដឹកនាំកិច្ចប្រជុំត្រួតពិនិត្យ និងពង្រឹងភារកិច្ចការងារប្រវត្តិសាស្ត្រយោធា

ភ្នំពេញ៖ នៅព្រឹកថ្ងៃទី៦ ខែមិថុនា ឆ្នាំ២០២៤ នៅអាគារសារមន្ទីរប្រវត្តិសាស្រ្តយោធា នៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានដំណើរការប្រជុំត្រួតពិនិត្យ និងពង្រឹងការអនុវត្តភារកិច្ចការងារប្រវត្តិសាស្ត្រយោធា ដែលកិច្ចប្រជុំនេះ ស្ថិតក្រោមអធិបតីភាព ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ យោធភូមិភាគទី៤ ។ ឧត្តមសេនីយ៍ត្រី ង៉ាង ស មេបញ្ជាការរងទទួលបន្ទុកការងារអប់រំចិត្តសាស្ត្រ និងប្រវត្តិសាស្ត្រយោធា បានឡើងរាយការណ៍ជូនអង្គប្រជុំ អំពីកិច្ចការមួយចំនួន ដែលអនុវត្តសម្រេចភារកិច្ចតាមផែនការដែលថ្នាក់លើ និងផែនការមេបញ្ជាការតំបន់ប្រតិបត្តិការសឹករងកំពង់ធំ បានប្រគល់ជូន និងបានបញ្ជាក់ជូនអំពីភារកិច្ចសំខាន់ៗមួយចំនួនទៀត ដែលត្រូវអនុវត្តបន្តនៅពេលខាងមុខ ។ ឧត្តមសេនីយ៍ទោ សោម ស៊ុន បានថ្លែងនូវការកោតសរសើរ ចំពោះក្រុមការងារប្រវត្តិសាស្ត្រយោធា នៃបញ្ជាការដ្ឋានតំបន់ប្រតិបត្តិការសឹករងកំពង់ធំ រួមជាមួយមេបញ្ជាការ គ្រប់បណ្ដាអង្គភាព នាយការិយាល័យ និងស្ថាប័នពាក់ព័ន្ធ ដែលបានរួមគ្នាបំពេញភារកិច្ច ក្នុងការងារប្រវត្តិសាស្ត្រយោធា ដែលថ្នាក់លើបានប្រគល់ជូន ទទួលបានជោគជ័យគួរជាទីមោទនៈ ។ នៅក្នុងឱកាសនេះ ឧត្តមសេនីយ៍ទោ សោម ស៊ុន ក៏បានគូសបញ្ជាក់អំពីលទ្ធផលធំៗមួយចំនួន ដែលអង្គភាពបញ្ជាការដ្ឋានតំបន់ប្រតិបត្តិការសឹករងកំពង់ធំ អនុវត្តសម្រេចបាន ក្នុងការងារប្រវត្តិសាស្រ្តយោធា ដើម្បីជាតឹកតាងប្រវត្តិសាស្ត្រ សម្រាប់អ្នកជំនាន់ក្រោយ មានជាអាទិ៍ បានកសាងសារមន្ទីរប្រវត្តិសាស្ត្រយោធា ចំនួនមួយខ្នងតាមរចនាបទខ្មែរ សម្រាប់តម្កល់ឯកសារ និងសម្ភារៈផ្សេងៗ ដែលបន្សល់ទុកពីសម័យសង្គ្រាម និងបានកសាងវិមានរំលឹកគុណយុទ្ធជនពលី ព្រមទាំងបានរៀបចំសោភ័ណភាពផ្នូរសពកម្មាភិបាលយុទ្ធជន យុទ្ធនារី ដែលបានពលីជីវិតក្នុងសម័យសង្គ្រាម ដែលជាការដឹងគុណ ដើម្បីគោរពបូជាផងដែរ។ ឧត្តមសេនីយ៍ទោ សោម ស៊ុន ក៏បានប្រគល់ភារកិច្ចមួយចំនួន ក្នុងការរៀបចំឯកសាររូបភាពតឹកតាងការងារប្រវត្តិសាស្ត្រយោធា ដើម្បីទុកជាប្រវត្តិសាស្ត្រនៅស្ដូបអនុស្សាវរីយ៍ឈ្នះឈ្នះ ទិសអន្លង់វែង ខេត្តឧត្តរមានជ័យ និងការសហការជាមួយរដ្ឋបាលខេត្ត ក្នុងការកសាងសួនតេជោសន្តិភាព ដោយមានការរៀបចំចម្លាក់ជាប្រវត្តិសាស្រ្ត ក្នងការងារយោធា នាសម័យសង្គ្រាម និងការអភិវឌ្ឍន៍រីកចម្រើនក្រោយការអនុវត្តនយោបាយឈ្នះឈ្នះ របស់សម្ដេចតេជោហ៊ុនសែនផងដែរ៕