យានយន្តបើកបរលើផ្លូវល្បឿនលឿនគ្រប់ប្រភេទមិនអនុញ្ញាតឱ្យឈប់នៅគន្លងឈប់បន្ទាន់ឡើយ លើកលែងករណីយានយន្តខូច ឬមានបញ្ហាផ្សេងៗប៉ុណ្ណោះ
ភ្នំពេញ៖ ក្រសួងសាធារណការ និងដឹកជញ្ជូន បានបញ្ជាក់ថា យានយន្តបើកបរលើផ្លូវល្បឿនលឿនគ្រប់ប្រភេទមិនអនុញ្ញាតឱ្យឈប់នៅគន្លងឈប់បន្ទាន់ឡើយ លើកលែងករណីយានយន្តខូច ឬមានបញ្ហាផ្សេងៗប៉ុណ្ណោះ។
តាមរយៈបណ្ដាញសង្គមហ្វេសប៊ុក ក្រសួងសាធារណការបានបញ្ជាក់ថា “សូមបងប្អូនប្រជាពលរដ្ឋមេត្តាជ្រាបថា ការធ្វើដំណើរលើផ្លូវល្បឿនលឿនក្រៅពីកន្លែងឈប់សម្រាក និងផ្តល់សេវាកម្ម(ចំណតយានយន្ត ស្ថានីយប្រេងឥន្ធនៈ បន្ទប់ទឹក អាហារដ្ឋាន និងកន្លែងផ្តល់សេវាកម្មផ្សេងៗ) គឺមិនអនុញ្ញាតឱ្យឈប់ ឬចតយានយន្តនៅលើផ្លូវល្បឿនលឿនឡើយ លើកលែងករណីយានយន្តខូច ឬមានបញ្ហាផ្សេងៗប៉ុណ្ណោះ ដែលតម្រូវឱ្យឈប់នៅគន្លងឈប់បន្ទាន់”។
ជាមួយគ្នានេះ ក្រសួងសាធារណការសង្ឃឹមយ៉ាងមុតមាំថា បងប្អូនប្រជាពលរដ្ឋគ្រប់រូបនឹងអនុវត្តតាមសេចក្ដីណែនាំ និងច្បាប់ចរាចរណ៍បានខ្ជាប់ខ្ជួន និងបើកបរប្រកបដោយការទទួលខុសត្រូវខ្ពស់៕
