ឯកឧត្តមរដ្ឋមន្ត្រី ប៊ិន ត្រឈៃ ដឹកនាំកិច្ចប្រជុំដំបូង ដើម្បីប្រកាសសមាសភាពរបស់ គណៈកម្មការទ្រទ្រង់មូលនិធិគន្ធបុប្ផាកម្ពុជា ប្រចាំក្រសួងផែនការ
ភ្នំពេញ៖ ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ និងជាប្រធានគណៈកម្មការទ្រទ្រង់មូលនិធិគន្ធបុប្ផាកម្ពុជា ប្រចាំក្រសួងផែនការ នាព្រឹកថ្ងៃទី១១ ខែមិថុនា ឆ្នាំ២០២៤ បានអញ្ជើញដឹកនាំកិច្ចប្រជុំដំបូង ដើម្បីប្រកាសសមាសភាពរបស់គណៈកម្មការទ្រទ្រង់មូលនិធិគន្ធបុប្ផាកម្ពុជា ប្រចាំក្រសួងផែនការ។
គួរបញ្ជាក់ថា គណៈកម្មការទ្រទ្រង់មូលនិធិគន្ធបុប្ផាកម្ពុជា ប្រចាំក្រសួងផែនការ ត្រូវបានបង្កើតឡើងកាលពីខែមេសាកន្លងទៅ ដែលមាននាយកដ្ឋានផែនការសង្គមកិច្ច ជាលេខាធិការដ្ឋាន នៅក្នុងកិច្ចដំណើរការការងាររបស់ខ្លួន។
គណៈកម្មការទ្រទ្រង់មូលនិធិគន្ធបុប្ផា ប្រចាំក្រសួងផែនការ មានតួនាទីស្នូលក្នុងការផ្សព្វផ្សាយ អំពាវនាវ និងបំផុសចលនាកៀរគរការបរិច្ចាគពីមន្ត្រីគ្រប់ជាន់ថ្នាក់ក្រោមឱវាទក្រសួងផែនការ ដើម្បីចូលរួមគាំទ្រកិច្ចដំណើរការរបស់មន្ទីរពេទ្យគន្ធបុប្ផា ៕
