បេឡារុស បញ្ជាក់ពីការចូលរួមធ្វើសមយុទ្ធនុយក្លេអ៊ែរតាក់ទិកជុំទី២ ជាមួយរុស្ស៉ី

បរទេស៖ ប្រទេសបេឡារុស បានឱ្យដឹងកាលពីថ្ងៃចន្ទថា កងទ័ពរបស់ខ្លួនបានចូលរួមក្នុងសមយុទ្ធជុំទី២ របស់រុស្ស៉ី ដែលចេញបញ្ជាដោយប្រធានាធិបតីរុស្ស៊ី លោក វ្ល៉ាឌីមៀ ពូទីន ដើម្បីអនុវត្តការដាក់ពង្រាយអាវុធនុយក្លេអ៊ែរតាក់ទិក។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអង្គារ ទី១១ ខែមិថុនា ឆ្នាំ២០២៤។

រដ្ឋមន្ត្រីការពារជាតិបេឡារុស លោក Viktor Khrenin បានឲ្យដឹងថា សមយុទ្ធនេះគឺជាវិធានការសកម្មភាពមួយ ដើម្បីបង្កើនការត្រៀមខ្លួន ប្រើប្រាស់អាវុធសម្រាប់ សងសឹកឆ្លើយតបទៅនឹងការគំរាមកំហែងណាមួយ បង្កឡើងចំពោះប្រទេសរបស់យើង ក៏ដូចជារុស្ស៉ី និងបេឡារុស។

លោក Viktor Khrenin បានបន្ថែមថា យើងគ្មាន គោលដៅបង្កើតភាពតានតឹងណាមួយក្នុងតំបន់ទេ ហើយក៏មិនបានគិតទុកជាមុនអំពីការគំរាមកំហែងផ្នែកយោធាលើប្រទេសទី៣ ឬប្រទេសណាមួយ នោះដែរ។ ប៉ុន្តែយើងនឹងកម្តៅសាច់ដុំយោធាជានិច្ច។

សមយុទ្ធនុយក្លេអ៊ែរតាកទិកជុំទី១ បានធ្វើឡើងនៅភាគខាងត្បូងនៃប្រទេសរុស្ស៊ីកាលពីខែមុន ដោយក្រុមអ្នកវិភាគនិយាយថា វាជាសារព្រមានរបស់ លោក ពូទីន ដើម្បីរារាំងលោកខាងលិច កុំឱ្យហក់ចូលកាន់តែជ្រៅទៅក្នុងសង្រ្គាមអ៊ុយក្រែន។ ដោយឡែក ជុំទី២នេះ គេមិនបានដឹងឡើយថា សមយុទ្ធនោះប្រព្រឹត្តទៅនៅទីណា ឬប្រើអាវុធប្រភេទណាខ្លះទេ ហើយភ្លាមៗ ក៏នៅមិនមានព័ត៌មានពីសំណាក់ភាគីរុស្ស៉ីទេ ជុំវិញការធ្វើសមយុទ្ធនេះដែរ។