រដ្ឋមន្ត្រីក្រសួងអប់រំ ចុះពិនិត្យវឌ្ឍនភាពការរៀន និងបង្រៀន និងការអនុវត្តស្តង់ដាសាលារៀនគំរូ នៅវិទ្យាល័យហ៊ុន សែនចំការដូង ខេត្តកែប

ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នាថ្ងៃទី១១ ខែមិថុនា ឆ្នាំ២០២៤ បានដឹកនាំប្រតិភូ ដើម្បីចុះពិនិត្យវឌ្ឍនភាពការរៀន និងបង្រៀន និងការអនុវត្តស្តង់ដាសាលារៀនគំរូ នៅវិទ្យាល័យហ៊ុន សែនចំការដូង ខេត្តកែប ដោយមានការចូលរួមពីសំណាក់ ឯកឧត្តម លោកជំទាវ ថ្នាក់ដឹកនាំក្រសួង ឯកឧត្តមអភិបាលនៃគណៈអភិបាលខេត្តកែប ថ្នាក់ដឹកនាំមន្ទីរ លោកគ្រូ អ្នកគ្រូ សរុបប្រមាណ ៥០នាក់។

ក្នុងឱកាសនេះ ឯកឧត្តមបណ្ឌិតសភាចារ្យ ឧបនាយករដ្ឋមន្រ្តី បានផ្តល់អនុសាសន៍មួយចំនួនដើម្បីជួយគាំទ្រ លើកទឹកចិត្តដល់វិទ្យាល័យហ៊ុន សែនចំការដូង អាចឆ្ពោះទៅជាសាលារៀនគំរូ និងស្តង់ដានាពេលខាងមុខ ដូចខាងក្រោម៖

(១). សូមក្រុមការងារជំនាញរបស់ក្រសួង ដោយសហការណ៍ជាមួយមន្ទីរអប់រំ យុវជន និងកីឡាខេត្ត ចុះពិនិត្យមើលរាល់កង្វះខាត និងបំពេញបន្ថែមជាក់ស្តែងដើម្បីជួយគាំទ្រទៅសាលាដោយផ្ទាល់។
(២). ពិនិត្យមើលតាមទិន្នន័យដើមឆ្នាំ រៀបចំប្រព័ន្ធឌីជីថលក្នុងការចុះឈ្មោះ ដើម្បីងាយស្រួលមើលទិន្នន័យសិស្សច្បាស់លាស់ ក៏ដូចជាបានលើកទឹកចិត្តឱ្យអនុវត្តតាមគម្រោង (SEIP)។

បន្ថែមពីនេះឯកឧត្តមបណ្ឌិតសភាចារ្យ ឧបនាយករដ្ឋមន្រ្តី ក៏បានលើកឡើងផងដែរថាប្រសិនបើមានការប្តេជ្ញាចិត្ត និងខិតខំប្រឹងប្រែងពី គណគ្រប់គ្រង លោកនាយក លោកគ្រូ អ្នកគ្រូ ក៏ដូចជាអ្នកពាក់ព័ន្ធទាំងអស់ នោះគម្រោងដែលចង់ប្រែក្លាយសាលាទៅជាសាលាគំរូគឺនឹងអាចសម្រេចបានជាក់ជាមិនខាន។

ហេដ្ឋារចនាសម្ព័ន្ធទំនើប បរិស្ថានសិក្សាល្អប្រសើរ សមត្ថភាពគ្រូបង្រៀនប្រកបដោយឧត្តមភាព ជំរុញការចូលរួមរបស់សហគមន៍ ក្នុងន័យឈានទៅផ្តល់ការអប់រំសតវត្សទី២១ ផ្សារភ្ជាប់នឹងភាសាបរទេស បំណិនឌីជីថល ដល់សិស្សានុសិស្ស ដែលជាចលករជំរុញនិងលើកកម្ពស់លទ្ធផលសិក្សារបស់សិស្ស ឱ្យកាន់តែប្រសើរឡើងថែមទៀត។

ព្រោះចំពោះបរិស្ថាន អគារសិក្សា សម្ភារៈសិក្សា គឺមានលក្ខណៈល្អគ្រប់គ្រាន់សមស្របទៅតាមស្តង់ដាដែលកំណត់រួចហើយ។ដូចនេះត្រូវជួយបំប៉នសិស្សបន្ថែមដោយចាប់ផ្តើមពីថ្នាក់ទី ១២ ដូចជាការផ្តល់សៀវភៅនិងមេរៀនសង្ខេបដល់សិស្សរៀនអនុវត្តដោយខ្លួនឯង សិក្សាតាមប្រព័ន្ធឌីជីថល ដើម្បីឱ្យសិស្សត្រៀមខ្លួនរួចរាល់សម្រាប់ការប្រឡងសញ្ញាបត្រមធ្យមសិក្សាទុតិយភូមិ គោលដៅបង្កើននូវអត្រាសិស្សជាប់ឱ្យកាន់ប្រសើរកើនឡើង និងសិស្សទទួលបាននិទ្ទេសល្អជាដើម។

សារជាថ្មីម្តងទៀតឯកឧត្តមបណ្ឌិតសភាចារ្យ ឧបនាយករដ្ឋមន្រ្តី បានថ្លែងអំណរគុណ និងលើកទឹកចិត្ត ដល់គណគ្រប់គ្រងសាលា លោកនាយក លោកគ្រូ អ្នកគ្រូ និងអ្នកពាក់ព័ន្ធទាំងអស់ ឱ្យបន្តខិតខំព្យាយាមបន្ថែមទៀត ដើម្បីសម្រេចបាននូវគម្រោងប្រែក្លាយសាលាឱ្យទៅជាសាលារៀនគំរូនាពេលអនាគត៕