ឯកឧត្តម ឈឹម សៅគី ដឹកនាំកិច្ចប្រជុំពិនិត្យឡើងវិញ និងវិភាគមុខងារ និងរចនាសម្ព័ន្ធ នៃក្រសួងអភិវឌ្ឍន៍ជនបទ ជាមួយក្រុមការងារបច្ចេកទេសគាំទ្ររបស់ក្រសួងមុខងារសាធារណៈ
ភ្នំពេញ៖ នាព្រឹកថ្ងៃទី១២ ខែមិថុនា ឆ្នាំ២០២៤ នៅទីស្ដីការក្រសួង ឯកឧត្តម ឈឹម សៅគី រដ្ឋលេខាធិការប្រចាំការ និងជាប្រធានក្រុមការងារកែទម្រង់រដ្ឋបាលសាធារណៈក្រសួងអភិវឌ្ឍន៍ជនបទ តំណាងដ៏ខ្ពស់ខ្ពស់ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញដឹកនាំកិច្ចប្រជុំស្ដីពី ការពិនិត្យឡើងវិញ និងវិភាគមុខងារ និងរចនាសម្ព័ន្ធ នៃក្រសួងអភិវឌ្ឍន៍ជនបទ ជាមួយក្រុមការងារបច្ចេកទេសគាំទ្ររបស់ក្រសួងមុខងារសាធារណៈ ដឹកនាំដោយ ឯកឧត្តម សួន រស្មី អគ្គលេខាធិការរង នៃអគ្គលេខាធិការដ្ឋាន គណៈកម្មាធិការកែទម្រង់រដ្ឋបាលសាធារណៈ ក្រសួងមុខងារសាធារណៈ និងជាប្រធានក្រុមការងារបច្ចេកទេសគាំទ្រ វិស័យសេដ្ឋកិច្ច។
កិច្ចប្រជុំនេះ មានការអញ្ជើញចូលរួមពីសំណាក់ ឯកឧត្ដម រដ្ឋលេខាធិការ អនុរដ្ឋលេខាធិការ អគ្គនាយក អគ្គនាយករង ប្រធាននាយកដ្ឋាន និងថ្នាក់ដឹកនាំពាក់ព័ន្ធ នៃក្រសួងអភិវឌ្ឍន៍ជនបទ និងប្រតិភូក្រុមការងារបច្ចេកទេសគាំទ្រ របស់ក្រសួងមុខងារសាធារណៈ ព្រមទាំងមានការចូលរួមពីមន្ទីរអភិវឌ្ឍន៍ជនបទទាំង ២៥ រាជធានី-ខេត្ត តាមតាមរយៈប្រព័ន្ធនិម្មិត (Zoom Meeting) ផងដែរ។
ក្នុងឱកាសនោះ ឯកឧត្ដមរដ្ឋលេខាធិការប្រចាំការ បានជម្រាបជូនប្រតិភូបច្ចេកទេសគាំទ្រ របស់ក្រសួងមុខងារសាធារណៈ អំពីកម្មវិធីអាទិភាពសំខាន់ៗ ទាំង៤ របស់ក្រសួង គឺ៖ ទី១) ការអភិវឌ្ឍហេដ្ឋារចនាសម្ព័ន្ធរូបវន្ត និងគមនាគមន៍ជនបទប្រទាក់ក្រឡា ទី២) ការកែលម្អលក្ខខណ្ឌនៃការរស់នៅរបស់សហគមន៍ជនបទ ទី៣) ការធ្វើពិពិធកម្មសកម្មភាពសេដ្ឋកិច្ចជនបទ និងទី៤) ការពង្រឹងស្ថាប័ន ការគ្រប់គ្រង និងអភិបាលកិច្ច ដោយមានការជ្រើសរើសមន្ដ្រី និងការបណ្ដុះបណ្ដាលមន្ដ្រីឱ្យមានសមត្ថភាព ដើម្បីបំពេញការងារប្រកបដោយប្រសិទ្ធភាព។
ឯកឧត្ដមរដ្ឋលេខាធិការប្រចាំការ បានបន្ដថា ក្រុមការងាររបស់ក្រសួងអភិវឌ្ឍន៍ជនបទ បានបុរេសកម្មចាប់ផ្ដើមការងារនេះចាប់តាំងពី ខែមករា ឆ្នាំ ២០២៤ ក្រោមការដឹកនាំ និងចង្អុលបង្ហាញ យ៉ាងយកចិត្តទុកដាក់របស់ឯកឧត្តមរដ្ឋមន្ត្រី ក្រុមការងារបានធ្វើការពិនិត្យ និងពិគ្រោះយោបល់យ៉ាងល្អិតល្អន់ និងគ្រប់ជ្រុងជ្រោយ។ ការធ្វើវិភាគ ដោយផ្អែកលេីវិធីសាស្ត្រ និងគោលការណ៍ ស្របទៅនឹងសេចក្ដីណែនាំរបស់រាជរដ្ឋាភិបាល លេខ ០១ សណន. ស្ដីពីការពិនិត្យឡើងវិញ និងការវិភាគមុខងារ និងរចនាសម្ព័ន្ធក្រសួងស្ថាប័ន ដោយផ្អែកលើយុទ្ធសាស្រ្តបញ្ចកោណ ដំណាក់កាលទី ១ និងកម្មវិធីគោលនយោបាយអាទិភាពទាំង ៦ សម្រាប់ចាប់ផ្តើមអនុវត្តភ្លាមក្នុងឆ្នាំ ២០២៣ កម្មវិធីនយោបាយរបស់រាជរដ្ឋាភិបាលនីតិកាលទី៧ ដូចជាគោលនយោបាយអភិវឌ្ឍន៍តាមវិស័យ កម្មវិធីកែទម្រង់រដ្ឋបាលសាធារណៈ កម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ កម្មវិធីកែទម្រង់វិមជ្ឈការ និងវិសហមជ្ឈការ ផែនការយុទ្ធសាស្រ្តអភិវឌ្ឍន៍ជនបទ ២០២៤-២០២៨ និងលទ្ធផលនៃការវិភាគមុខងារនិងធនធានរបស់ក្រសួងអភិវឌ្ឍន៍ជនបទ ជាដើម។
ជាមួយគ្នានេះ ឯកឧត្តម សួន រស្មី បានកោតសរសើរ និងវាយតម្លៃខ្ពស់ ចំពោះក្រុមការងាររបស់ក្រសួងអភិវឌ្ឍន៍ជនបទ ព្រមទាំងបានជម្រាបជូនថា សេចក្តីណែនាំស្តីពីការពិនិត្យឡើងវិញ និងការវិភាគមុខងារ និងរចនាសម្ព័ន្ធក្រសួង ស្ថាប័ន មានលើកកម្ពស់ប្រសិទ្ធភាពនិងស័ក្តិសិទ្ធិភាពនៃការបំពេញមុខងារ និងបេសកកម្មរបស់ក្រសួង ឆ្លើយតបទៅនឹងយុទ្ធសាស្ត្របញ្ចកោណដំណាក់កាលទី១ ព្រមទាំងបានផ្តល់ធាតុចូលបន្ថែមផងដំណេីការវិភាគមុខងាររបស់ក្រសួងអភិវឌ្ឍន៍ជនបទផងដែ។
ឯកឧត្តម ឈឹម សៅគី បានថ្លែងអំណរគុណដល់ ក្រុមការងារបច្ចេកទេសគាំទ្ររបស់ក្រសួងមុខងារសាធារណៈ ដែលបានជួយផ្ដល់ការណែនាំ និងតម្រង់ទិស ចំពោះក្រុមការងាររបស់ក្រសួងអភិវឌ្ឍន៍ជនបទ លើការងារវិភាគមុខងាររបស់ក្រសួងបានចំគោលដៅ និងបានឆាប់រហ័ស៕
