គណៈប្រតិភូគណៈកម្មការទី៨ នៃរដ្ឋសភា ចុះពិនិត្យការផ្តល់សេវាសុខាភិបាល និងផ្តល់យុទ្ធសាស្ត្រថ្មីៗសម្រាប់ទប់ស្កាត់ជំងឺមិនឆ្លងនៅមណ្ឌលសុខភាពបុស្បូវ នៅស្រុកព្រះនេត្រព្រះ

ភ្នំពេញ៖ នៅព្រឹកថ្ងៃទី១២ ខែមិថុនា ឆ្នាំ២០២៤ គណៈប្រតិភូគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី នៃរដ្ឋសភា ដឹកនាំដោយ លោកជំទាវ ឡោក ខេង ប្រធានគណៈកម្មការ បានអញ្ជើញចុះពិនិត្យ និងស្វែងយល់ពីសេវាសុខាភិបាល និងផ្តល់យុទ្ធសាស្ត្រថ្មីៗសម្រាប់ទប់ស្កាត់ជំងឺមិនឆ្លងដល់មណ្ឌលសុខភាពបុស្បូវ នៅស្រុកព្រះនេត្រព្រះ ខេត្តបន្ទាយមានជ័យ។

មណ្ឌលសុខភាពបុស្បូវគឺជាទីតាំងផ្តល់សេវាសុខាភិបាលថ្នាក់មូលដ្ឋានដែលនៅកៀកជិតប្រជាពលរដ្ឋ ដោយមានផ្តល់សេវាកម្មចាក់វ៉ាក់សាំងការពារជំងឺ ការពិនិត្យជំងឺក្មេង ពិនិត្យផ្ទៃពោះ ពន្យារកំនើត ការពិនិត្យសុខភាព ការពិគ្រោះជំងឺក្រៅ និងព្យាបាលជំងឺផ្សេងៗ ក្នុងនោះមានជំងឺមិនឆ្លង ដូចជា ជំងឺមហារីក មហារីកមាត់ស្បូន ជំងឺទឹកនោមផ្អែម ជំងឺលើសសម្ពាធឈាម ជំងឺខ្សោយបេះដូង ផងដែរ។ ជាមួយនឹងមន្ត្រីបំរើការងារ ០៩រូប ក្នុងនោះមានវេជ្ជបណ្ឌិតចំនួន ០១រូប ឆ្មបចំនួន ០៥រូប និងគិលានុបដ្ឋាយិកាចំនួន ០៣រូប គ្របដណ្តប់លើប៉ុស្តិ៍សុខភាពចំនួន០២ ឃុំចំនួន០១ មាន ១៧ភូមិ និងមានប្រជាជនចំនួនជាង១ម៉ឺន៤ពាន់នាក់ មណ្ឌលសុខភាពខាងលើក៏ប្រឈមនឹងបញ្ហាមួយចំនួនដូចជា ខ្វះធនធានមនុស្ស និងកន្លែងសម្រាកព្យាបាលជំងឺជាដើម។ ដោយឡែកពាក់ព័ន្ធនឹងការប្រើប្រាស់សេវា ប.ស.ស និងមូលនិធិសមធម៌ ថ្នាក់ដឹកនាំមណ្ឌលសុខភាពក៏លើកឡើងដែរថា នឹងមានស្ថានភាពរឹតតែល្អជាងពេលបច្ចុប្បន្នក្នុងករណីប្រជាពលរដ្ឋយកប័ណ្ណ និងបំពេញឯកសារបានត្រឹមត្រូវ គឺមានលក្ខណៈងាយស្រួល ឆាប់រហ័សក្នុងការទទួលសេវាព្យាបាលជំងឺផងដែរ។

លោកជំទាវ ឡោក ខេង បានថ្លែងនូវការកោតសរសើរដល់មន្ត្រីពេទ្យក្នុងមណ្ឌលសុខភាព ដែលបានខិតខំបម្រើសេវាសុខភាពជាសកលជូនប្រជាពលរដ្ឋឱ្យទាន់ពេលវេលា និងជួយផ្សព្វផ្សាយពីផលលំបាកនៃជំងឺមិនឆ្លង ជូនដល់ប្រជាពលរដ្ឋឱ្យបានយល់ដឹងកាន់តែច្បាស់ តាមគ្រប់រូបភាព ដើម្បីចូលរួមក្នុងការកាត់បន្ថយភាពក្រីក្រ ព្រមទាំងដាក់ប៉ាណូផ្សព្វផ្សាយពីជំងឺមិនឆ្លងតាមមណ្ឌលសុខភាព។

លោកជំទាវ បានជំរុញលើកទឹកចិត្តឱ្យមន្ត្រីពេទ្យទាំងអស់ និងមន្ត្រីប.ស.ស ត្រូវចូលរួមសហការផ្សព្វផ្សាយពីសារៈសំខាន់នៃប.ស.ស បន្ថែមទៀត និងត្រូវជំរុញឱ្យមន្ត្រីទាំងអស់ពង្រឹងសមត្ថភាពរបស់ខ្លួនបន្ថែមទៀត។

ជាមួយគ្នានោះ លោកជំទាវក៏បានទទួលយកសំណើទាំងអស់របស់មណ្ឌលសុខភាពយកទៅពិភាក្សាជាមួយក្រសួង និងជំរុញពន្លឿនការដោះស្រាយជូនមណ្ឌលសុខភាពឱ្យបានឆាប់រហ័ស និងជួយផ្សព្វផ្សាយអំពីហានិភ័យ នៃជំងឺមិនឆ្លង ជូនដល់ប្រជាពលរដ្ឋឱ្យបានយល់ដឹងកាន់តែច្បាស់ ដើម្បីចូលរួមក្នុងការកាត់បន្ថយភាពក្រីក្រ ដេីម្បីឈានទៅសម្រេចបានគោលដៅឆ្នាំ២០៣០ ជាប្រទេសដែលមានចំណូលមធ្យមកម្រិតខ្ពស់ និងជាប្រទេសមានចំណូលខ្ពស់នៅឆ្នាំ២០៥០ ផងដែរ ៕