ពិធីផ្ទេរប្រគល់ធ្វើមាតុភូមិនិវត្តន៍អដ្ឋិធាតុកងទ័ពស្ម័គ្រចិត្ត និងជំនាញការវៀតណាម ដែលបានពលីជីវិតនាសម័យសង្គ្រាម ក្នុងភូមិសាស្ត្រខេត្តបាត់ដំបង
ភ្នំពេញ៖ នៅរសៀលថ្ងៃទី១៣ ខែមិថុនា ឆ្នាំ២០២៤ លោកឧត្តមសេនីយ៍ត្រី ភើយ លំអង មេបញ្ជាការ តំបន់ប្រតិបត្តិការសឹករង បាត់ដំបង យោធភូមិភាគទី៥ នៃព្រះរាជាណាចក្រកម្ពុជា និងលោកវរសេនីយ៍ឯក បំរ៉ុង ត្រឹង ជីកុង ប្រធានក្រុមការងាររុករក ជីកគាស់ K73 ខេត្តឡុងអាន នៃសាធារណរដ្ឋសង្គមនិយមវៀតណាម បានអញ្ជើញជាអធិបតីក្នុងពិធីបង្សុកូល ផ្ទេរ ប្រគល់ ធ្វើមាតុភូមិនិវត្តន៍អដ្ឋិធាតុកងទ័ពស្ម័គ្រចិត្ត និងជំនាញការវៀតណាម ដែលបានពលីជីវិត នាសម័យសង្រ្គាម ក្នុងភូមិសាស្រ្តខេត្តបាត់ដំបង នៅបរិវេណវត្តភ្នំចំបាំង ស្ថិតនៅឃុំផ្លូវមាស ស្រុករតនមណ្ឌល ខេត្តបាត់ដំបង។
លោកឧត្តមសេនីយ៍ត្រី ភើយ លំអង មេបញ្ជាការ បានថ្លែងថាចាប់ពីឆ្នាំ២០០៣រហូតមកដល់ជំហាន១ ដំណាក់កាលទី២៣ ឆ្នាំ២០២៤ ក្រុមការងាររុករក ជីកគាស់អដ្ឋិធាតុកងទ័ពស្ម័គ្រចិត្ត និងជំនាញការវៀតណាម ក្នុងភូមិសាស្រ្តខេត្តបាត់ដំបង ទទួលបានលទ្ធផលចំនួន ៤៨៧អដ្ឋិធាតុ ព្រមទាំងបានធ្វើពិធីផ្ទេរប្រគល់ ធ្វើមាតុភូមិនិវត្តន៍យ៉ាងសមរម្យ ហើយ រយៈពេលកន្លងមកថ្មីៗនេះ កិច្ចសហប្រតិបត្តិការរុករក ជីកគាស់ ជំហាន១ និងជំហាន២ ដំណាក់កាលទី២៣ រវាងក្រុមការងារ K73 និងតំបន់ប្រតិបត្តិការសឹករងបាត់ដំបង ចាប់ពីថ្ងៃទី១៤ ខែវិច្ឆិកា ឆ្នាំ២០២៣ រហូតដល់ថ្ងៃទី១៣ ខែមិថុនា ឆ្នាំ២០២៤ ក្រុមការងារ K73 បានបន្តការងាររុករកយ៉ាងសកម្មច្រើនកន្លែង ទទួលបានលទ្ធផលចំនួន ៤៨អដ្ឋិធាតុ។
លោកវរសេនីយ៍ឯក បំរ៉ុង ត្រឹង ជីកុង ប្រធានក្រុមការងារK73 បានថ្លែងអំណរគុណចំពោះរាជរដ្ឋាភិបាលកម្ពុជា អាជ្ញាធរដែនដីគ្រប់លំដាប់ថ្នាក់ កងកម្លាំងប្រដាប់អាវុធគ្រប់ប្រភេទ និងប្រជាពលរដ្ឋ ដែលបានសហការល្អក្នុងការជីករុករកអដ្ឋិធាតុកងទ័ពស្ម័គ្រចិត្តវៀតណាម ដើម្បីធ្វើមាតុភូមិនិវត្តន៍ទៅកាន់មាតុប្រទេសវិញ និងអរគុណដល់ក្រុមការងារ តំបន់ប្រតិបត្តិការសឹករងបាត់ដំបង ដែលបានជួយបង្កលក្ខណៈងាយស្រួលគ្រប់បែបយ៉ាងដល់ក្រុមការងាររុករកអដ្ឋិធាតុកងទ័ពស្ម័គ្រចិត្តវៀតណាមលើទឹកដីខេត្តបាត់ដំបង។
នៅក្នុងឱកាសនេះដែរ ភាគីទាំងពីរបានប្រគល់ជូននូវវត្ថុអនុស្សាវរីយ៍ ជូនគ្នាទៅវិញទៅមក និងបានជូនពរឱ្យចំណងសាមគ្គីភាព មិត្តភាពសហប្រតិបត្តិការរវាងកងទ័ពប្រជាជនទាំងពីរ កម្ពុជា-វៀតណាម ស្ថិតស្ថេរជានិច្ចនិរន្ត៕
