ឯកឧត្តម ស្វាយ សំអ៊ាង ថ្លែងអំណរគុណ ក្រុមប្រឹក្សាខេត្តអាណត្តិទី៣ ដែលបំពេញតួនាទី ភារកិច្ចក្នុងការរួមចំណែកយ៉ាងសកម្មជាមួយគណៈអភិបាលខេត្ត មន្ត្រីរាជការ គ្រប់ថ្នាក់ ដើម្បីបន្តជំរុញលើកកម្ពស់ប្រជាធិបតេយ្យ អភិបាលកិច្ចមូលដ្ឋាន និងដឹកនាំការអភិវឌ្ឍសេដ្ឋកិច្ចសង្គមឱ្យមានវឌ្ឍនភាព

ភ្នំពេញ៖ ឯកឧត្តម ស្វាយ សំអ៊ាង អភិបាលខេត្តស្ទឹងត្រែង បានថ្លែងអំណរគុណយ៉ាងជ្រាលជ្រៅបំផុតជូនចំពោះក្រុមប្រឹក្សា ខេត្តអាណត្តិទី៣ ដែលបានបំពេញតួនាទី ភារកិច្ចតាមច្បាប់ លិខិតបទដ្ឋាន និងគោល ការណ៍កំណត់ ក្នុងការរួមចំណែកយ៉ាងសកម្មជាមួយគណៈអភិបាលខេត្ត មន្ត្រីរាជការ គ្រប់ថ្នាក់ ដើម្បីបន្តជំរុញលើកកម្ពស់ប្រជាធិបតេយ្យ អភិបាលកិច្ចមូលដ្ឋាន និងដឹកនាំការអភិវឌ្ឍសេដ្ឋកិច្ចសង្គមឲ្យមានវឌ្ឍនភាព ។

ក្នុងឱកាសអញ្ជើញចូលរួមក្នុងពិធីប្រកាសចូលកាន់តំណែងក្រុមប្រឹក្សាខេត្តស្ទឹងត្រែង អាណត្តិទី៤ ចំនួន ១៧រូប ក្រោមអធិបតីភាពឯកឧត្តម ផៃ ប៊ុនឈឿន រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តស្ទឹងត្រែង នាថ្ងៃទី១៤ មិថុនានេះ ឯកឧត្តម ស្វាយ សំអ៊ាង បានថ្លែងថា ក្នុងនាមថ្នាក់ដឹកនាំខេត្ត និងខ្លួនឯកឧត្ដមផ្ទាល់ ឯកឧត្ដមមានកិត្តិយសដោយបានរៀបចំ ពិធីប្រកាសចូលកាន់តំណែង ក្រុមប្រឹក្សាខេត្តស្ទឹងត្រែង អាណត្តិទី៤ ក្នុងឱកាសដ៏មាន អត្ថន័យជ្រាលជ្រៅ និងក្តីអំណរសាទរក្រៃលែងនាពេលនេះ ។

ឯកឧត្តម ស្វាយ សំអ៊ាង បានសម្តែងនូវក្តីគោរព អំណរគុណដ៏ថ្លៃថ្លា បំផុតនិងសូមស្វាគមន៍យ៉ាងកក់ក្តៅចំពោះវត្តមានដ៏ថ្លៃថ្លារបស់ឯកឧត្តម ផៃ ប៊ុនឈឿន រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តស្ទឹងត្រែង និងលោកជំទាវអនុរដ្ឋលេខាធិការក្រសួងមហាផ្ទៃ ព្រមទាំងឯកឧត្តម លោកជំទាវ លោក លោកស្រី តំណាងអង្គការសង្គមស៊ីវិល ដៃគូអភិវឌ្ឍន៍ និងតំណាងគណបក្សនយោបាយ ដែលមានអាសនៈក្នុងក្រុមប្រឹក្សាខេត្ត ដែលបានផ្តល់កិត្តិយសដ៏វិសេសវិសាល អញ្ជើញចូលរួមក្នុងពិធីនេះ។

ឯកឧត្តមអភិបាលខេត្ត បញ្ជាក់ថា «ក្នុងនាមគណៈអភិបាលខេត្ត និងមន្ត្រីរាជការ គ្រប់លំដាប់ថ្នាក់ ឯកឧត្តមសូមគោរពថ្លែងអំណរគុណយ៉ាងជ្រាលជ្រៅបំផុតជូនចំពោះក្រុមប្រឹក្សា ខេត្តអាណត្តិទី៣ ដែលបានបំពេញតួនាទី ភារកិច្ចតាមច្បាប់ លិខិតបទដ្ឋាន និងគោល ការណ៍កំណត់ ក្នុងការរួមចំណែកយ៉ាងសកម្មជាមួយគណៈអភិបាលខេត្ត មន្ត្រីរាជការ គ្រប់ថ្នាក់ ដើម្បីបន្តជំរុញលើកកម្ពស់ប្រជាធិបតេយ្យ អភិបាលកិច្ចមូលដ្ឋាន និងដឹកនាំការអភិវឌ្ឍសេដ្ឋកិច្ចសង្គមឱ្យមានវឌ្ឍនភាពស្របតាមកម្មវិធីនយោបាយនិងយុទ្ធសាស្ត្រ ចតុកោណដំណាក់កាលទី៤ និងដើមដំបូងនៃយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលកម្ពុជា ក្រោមការដឹកនាំដ៏ត្រឹមត្រូវ ឈ្លាសវៃ ប៉ិនប្រសប់ និងប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភា នៃព្រះរាជាណាចក្រកម្ពុជា និងការដឹកនាំប្រកបដោយថាមពល ស្វាហាប់ ឈ្លាសវៃ ហ្មត់ចត់ ម៉ឺងម៉ាត់ និងគតិបណ្ឌិតដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា» ៕