សម្តេចធិបតី៖ ប្រព័ន្ធធារាសាស្ត្ររំដោះទឹក និងពង្វាងទឹកស្ទឹងព្រែកត្នោត កុំឱ្យជន់លិចរាជធានីភ្នំពេញ មានប្រវែងជាង ២៦០គីឡូម៉ែត្រ គ្រោងប្រើប្រាស់ថវិកា ៤០០លានដុល្លារ
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងបញ្ជាក់ថា ប្រព័ន្ធធារាសាស្ត្ររំដោះទឹក និងពង្វាងទឹកស្ទឹងព្រែកត្នោតដែលធ្លាក់ពីតំបន់ភ្នំឱរ៉ាល់ កុំឱ្យជន់លិចរាជធានីភ្នំពេញ និងតំបន់ជាប់ស្ទឹងព្រែកត្នោត មានប្រវែងជាង ២៦០គីឡូម៉ែត្រ គ្រោងប្រើប្រាស់ថវិកា ៤០០លានដុល្លារ។
ក្នុងឱកាសអញ្ជើញ ពិនិត្យប្រព័ន្ធធារាសាស្ត្ររំដោះ និងពង្វាងទឹកស្ទឹងព្រែកត្នោតកុំឱ្យជន់លិចរាជធានីភ្នំពេញ និងតំបន់ជាប់ ស្ទឹងព្រែកត្នោត នៅថ្ងៃទី១៤ ខែមិថុនា ឆ្នាំ២០២៤នេះ
សម្តេចធិបតី ហ៊ុន ម៉ាណែត បានថ្លែងថា «ប្រព័ន្ធប្រឡាយគោលដៅពីដើមអាណត្តិនេះខ្ញុំបានសម្រេចដាក់ធ្វើគម្រោងធំមួយ ដែលបានប្រើប្រាស់ថវិកាជាង ៤០០លានដុល្លារ បើប្រៀបធៀបធំជាងគម្រោងដែលធ្វើហេដ្ឋារចនាសម្ព័ន្ធផ្លូវ ដោយសារការចាំបាច់, គម្រោងនេះយើងបានអនុវត្តន៍ក្នុង ៦ខែមកនេះ យើងបានជោគជ័យច្រើន ៦ខែមកនេះយើងធ្វើបានលឿន»។
សម្តេចធិបតី ហ៊ុន ម៉ាណែត បានបន្ថែមថា គម្រោងធ្វើប្រឡាយរំដោះទឹកនេះគឺធ្វើឡើងដែលមានមុខព្រួញ គឺដោះស្រាយនៅក្នុងរាជធានីភ្នំពេញ ដែលធ្វើការកែសម្រួលប្រព័ន្ធរំដោះទឹក ដាក់លូធំៗបន្ថែម ប៉ុន្តែមួយផ្នែកធំគឺនៅខាងក្រៅរាជធានីភ្នំពេញ ដើម្បីបញ្ជៀសទឹកស្ទឹងព្រែកត្នោត ដែលធ្លាក់មកពីតំបន់ភ្នំឱរ៉ាល់ ដែលយើងបានកាយប្រឡាយ ១០ខ្សែ ជាង ២៦០គីឡូ ដែលមានប្រវែងវែងជាងព្រែកជីកហ្វូណនតេជោ ៨០គីឡូម៉ែត្រ។
សម្តេចធិបតី ហ៊ុន ម៉ាណែត បានបញ្ជាក់ដែរថា ប្រឡាយនេះគឺមានសារៈសំខាន់ណាស់ក្នុងការបញ្ចៀសទឹកពីរាជធានីភ្នំពេញ និងជួយស្រោចស្រង់តំបន់ដែលលិចទឹកជាង ៣០ម៉ឺនហិកតា ទាំងផលប៉ះពាល់លើស្រែចម្ការ ប៉ះពាល់ផ្ទះប្រជាពលរដ្ឋ និងប៉ះពាល់តំបន់រោងចក្រ។ ប្រឡាយនេះក៏ដើម្បីធ្វើជាប្រព័ន្ធធារាសាស្ត្រ ដែលធានាមានទឹកខួបប្រាំង ខួបវស្សាសម្រាប់ស្រោចស្រពដំណាំរបស់ប្រជាពលរដ្ឋរាប់ម៉ឺនហិកតា។
សូមបញ្ជាក់ថា ក្នុងរយៈពេលប៉ុន្មានឆ្នាំចុងក្រោយភូមិសាស្ត្ររាជធានីភ្នំពេញ ជាពិសេសទឹកដីខណ្ឌដង្ហោ និងតំបន់ខ្លះទៀតក្នុងខេត្តកណ្តាល កំពង់ស្ពឺ ជាប់នឹងស្ទឹងព្រែកត្នោត តែងរងការជន់លិចយ៉ាងធ្ងន់ធ្ងរ។ ការជន់លិចដោយសារទឹកហូរធ្លាក់ពីជួរភ្នំឱរ៉ាល់ ជួរភ្នំក្រវាញ និងដោយសារផ្ទៃរងទឹកភ្លៀងក្នុងភូមិសាស្ត្ររាជធានីភ្នំពេញ ខេត្តកណ្តាល កំពង់ស្ពឺ កាន់តែរួមតូច ដោយសារកំណើននៃសំណង់លំនៅឋាន និងតំបន់ពាណិជ្ជកម្មផ្សេងៗ។
ដើម្បីដោះស្រាយការជន់លិច ដែលជាបញ្ហាប្រឈមដ៏ធ្ងន់ធ្ងររបស់ប្រជាពលរដ្ឋ និងសកម្មភាពសេដ្ឋកិច្ចផ្សេងៗ សម្តេចមហាបវរធិបតី ហ៊ុន ម៉ាណែត បានសម្រេចបញ្ចេញកញ្ចប់ថវិកាកសាងប្រព័ន្ធធារាសាស្ត្ររំដោះ និងពង្វាងការជន់លិចនេះ។
គម្រោងធំៗចំនួន៩ កំពុងតែអនុវត្តន៍នាពេលបច្ចុប្បន្ន ដើម្បីដោះស្រាយការជន់លិចនេះ រួមមាន៖
១៖ គម្រោងស្ទឹងតូច ជាគម្រោងបង្វែរទឹកមួយចំនួនធំចេញពីស្ទឹងព្រែកត្នោត ចូលទន្លេបាទី មានបណ្តោយ ៥១គីឡូម៉ែត្រ និងមុខកាត់ទទឹង ១០០ម៉ែត្រ រួមទាំងខ្នងសងខាងផងដែរ។ គម្រោងនេះ មានការសាងសង់សំណង់ស្ទាក់ទឹកស្ទឹងតូច ស្ថិតក្នុងស្រុកសំរោងទង ក្នុងខេត្តកំពង់ស្ពឺ ដែលមានកម្ពស់ ៨ម៉ែត្រ ទទឹងខាង ៥១ម៉ែត្រ និងមានទ្វារទឹកចំនួន៥ ទ្វារនីមួយៗមានទទឹង ៨.៥ម៉ែត្រ និងមានកម្ពស់ ៧.៥ម៉ែត្រ។
២៖ គម្រោងស្ទឹងក្រោមបាតី ជាគម្រោងបង្វែរទឹកមួយចំនួនចេញពីទន្លេបាទី ចូលទៅបឹងជើងលង ក្បែរព្រលានយន្តហោះថ្មី មានបណ្តោយប្រមាណ ៧គីឡូម៉ែត្រ និងមុខកាត់ទទឹង១០០ម៉ែត្រ រួមនឹងខ្នងសងខាងផងដែរ។
៣៖ ប្រព័ន្ធប្រឡាយជើងឯង គម្រោងនេះមានប្រឡាយ៥ខ្សែ (ប្រឡាយមេ៣ខ្សែ និងប្រឡាយតភ្ជាប់២ខ្សែ) និងស្ថានីយបូមទឹក២កន្លែង។ មានមុខងាររំដោះទឹកផ្នែងខាងលិច-ត្បូងរាជធានីភ្នំពេញ (ភូមិសាស្ត្រខណ្ឌកំបូលខ្លះ ខណ្ឌដង្កោ និងផ្នែកខ្លះនៃខណ្ឌមានជ័យ) មានបណ្តោយសរុប ២៦.៥គីឡូម៉ែត្រ និងមុខកាត់ទទឹង៣៥-៥០ម៉ែត្រ រួមនឹងខ្នងសងខាងផងដែរ។
៤៖ ប្រឡាយ៩៦ គម្រោងនេះមានមុខងាររំដោះទឹកផ្នែកខាងលើព្រលានយន្តហោះថ្មីផង នាំទឹកចេញពីស្ទឹងព្រែកត្នោតត្រង់ម្តុំព្រែកហូរ ទទួលទឹកពីព្រែកកំពឹស ប្រឡាយ៦២ និងតំបន់ x1 វាងព្រលានចូលទៅដល់ព្រែគង់ និងចូលទៅបឹងជើងលោង តំបន់ក្រាំងយ៉ូវ មានបណ្តោយសរុប ១៤គីឡូម៉ែត្រ និងមុខកាត់ទទឹង ៨០ម៉ែត្រ រួមនឹងខ្នងសងខាង។ គម្រោងនេះ រំលែកទឹកជំនន់មួយភាគធំចេញព្រែកហូរ និងភ្ជាប់បណ្តាញគមនាគមន៍តាមរយៈខ្នងសងខាង។
៥៖ ព្រែកគង់ គម្រោងនេះ មានមុខងាររំដោះទឹកភ្នែកខាងក្រោមព្រលានយន្តហោះថ្មីផង នាំទឹកចេញពីប្រឡាយ៩៦ ម្តុំស្អាងភ្នំ តំបន់ស្អាង តំបន់កោះខែល ហូរចូលទៅដល់ព្រែកអំបិល និងទៅវៀតណាម មានបណ្តោយសរុប ២០គីឡូម៉ែត្រ និងមុខកាត់ទទឹង ១០០ម៉ែត្រ រួមទាំងខ្នងសងខាងផងដែរ។ គម្រោងនេះ ទទួលទឹកបន្តពីប្រឡាយ៩៦ និងតំបន់ជុំវិញរហូតព្រែកអំបិល និងចូលទៅសមុទ្រ ហើយភ្ជាប់បណ្តាញគមនាគមន៍តាមរយៈខ្នងសងខាងរបស់វា។
៦៖ ព្រែកពាមសត្ថា គម្រោងនេះ មានព្រែកពាមសត្ថា និងប្រឡាយបឹងតាមោកពីរខ្សែ មានមុខងារនាំទឹកចេញពីបឹងតាមោក ចូលទៅទន្លេសាប ត្រង់ស្ពានពាមសត្ថាក្នុងស្រុកពញាឭ មានបណ្តោយសរុប ១៨.៧គីឡូម៉ែត្រ និងមុខកាត់ទទឹង ១០០ម៉ែត្រ រួមទាំងខ្នងសងខាងផងដែរ។ គម្រោងនេះប្រមូលទឹកចេញពីបុរីនៅតាមបណ្តោយមហាវិថីសំរោង ហើយភ្ជាប់បណ្តាញគមនាគមន៍តាមរយៈខ្នងសងខាង។
៧៖ ប្រឡាយរលាំងជ្រៃ-ស្លាគូ គម្រោងនេះបង្វែរទឹកមួយផ្នែកចេញពីស្ទឹងព្រែកត្នោតដោះស្រាយក្នុងគោលដៅកាត់បន្ថយការជន់លិចរាជធានីភ្នំពេញ ផ្ទៃរងទឹកភ្លៀងស្របប្រឡាយ។ ជាពិសេសសង្គ្រោះផ្លូវជាតិលេខ៣ រហូតដល់ស្ទឹងស្លាគូ ព្រមទាំងអាចស្រោចស្រពប្រមាណ ៧,៥០០ហិកតា និងអាចផ្គត់ផ្គង់ទឹកដល់ការផលិតទឹកសុវត្ថិភាពសម្រាប់ប្រើប្រាស់ និងភ្ជាប់បណ្តាញគមនាគមន៍ក្នុងតំបន់គម្រោងតាមរយៈខ្នងសងខាង។
៨៖ ប្រឡាយ៥៩ និង៩០ គម្រោងនេះ មានមុខងាររំដោះទឹក ផ្នែកខាងលើព្រលានយន្តហោះថ្មី និងរំដោះទឹកមួយផ្នែកចេញពីផ្លូវជាតិលេខ២ មានបណ្តោយសរុប ១៨.៨គីឡូម៉ែត្រ និងមុខកាត់ទទឹង ៣២ម៉ែត្រ ទៅ៤០ម៉ែត្រ រួមទាំងខ្នងប្រឡាយសងខាង។
៩៖ អូរខ្សាច់ ជាគម្រោងភ្ជាប់ពីរលាំងជ្រៃខាងជើង ទៅដល់បឹងតាមោកតាមរយៈអូរខ្សាច់ ដើម្បីបង្វែរទឹកមួយផ្នែកចេញពីស្ទឹងព្រែកត្នោតដោះស្រាយក្នុងគោលដៅកាត់បន្ថយការជន់លិចរាជធានីភ្នំពេញ តាមបណ្តោយផ្លូវជាតិលេខ៤ និងផ្ទៃរងទឹកភ្លៀងស្របប្រឡាយផង។ ជាពិសេសគម្រោងនេះភ្ជាប់បណ្តាញគមនាគមន៍ក្នុងតំបន់គម្រោងតាមរយៈខ្នងសងខាង៕
