គណៈប្រតិភូគណៈកម្មការទី៨ នៃរដ្ឋសភា បានអញ្ជើញចុះពិនិត្យ និងស្វែងយល់ពីការផ្តល់សេវាសុខាភិបាលនៅមន្ទីរពេទ្យបង្អែកស្ទោង ក្នុងស្រុកស្ទោង

ភ្នំពេញ៖ នាព្រឹកថ្ងៃទី១៤ ខែមិថុនា ឆ្នាំ២០២៤ គណៈប្រតិភូគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី នៃរដ្ឋសភា (គណៈកម្មការទី៨) ដឹកនាំដោយ លោកជំទាវ ឡោក ខេង ប្រធានគណៈកម្មការ បានអញ្ជើញចុះពិនិត្យ និងស្វែងយល់ពីការផ្តល់សេវាសុខាភិបាលនៅមន្ទីរពេទ្យបង្អែកស្រុកស្ទោង ខេត្តកំពង់ធំ។

ក្នុងឱកាសនោះដែរ លោកវេជ្ជបណ្ឌិត សេង សុជា ប្រធានមន្ទីរពេទ្យ បានជម្រាបជូនគណៈប្រតិភូថា មន្ទីរពេទ្យនេះមានកម្រិតCPA2 មានបុគ្គលិកទាំងអស់ចំនួន ៧២នាក់ ក្នុងនោះមានវេជ្ជបណ្ឌិតចំនួន ២៥នាក់ វេជ្ជបណ្ឌិតជំនាញ ០១ម្នាក់ ឆ្មប ១៣នាក់ និងគិលានុបដ្ឋាក ១៦នាក់ ព្រមទាំងមានមន្ត្រីពេទ្យផ្សេងៗទៀត ដែលបានផ្តល់សេវាជូនប្រជាជនចំនួន ១៥៥,៨៦៩នាក់ មកពី១៧០ភូមិ ក្នុងឃុំ១៨ និងស្រុកចំនួន០២ គឺស្រុកស្ទោង និងស្រុកប្រាសាទបល្ល័ង្ក។

មន្ទីរពេទ្យនេះ មានបម្រើសេវាសុខភាពជាច្រើនដូចជា ពិគ្រោះជំងឺក្រៅ វះកាត់ សម្ភព និងរោគស្ត្រី ជំងឺកុមារ ជំងឺទូទៅ ជំងឺមិនឆ្លង និងជំងឺផ្សេងៗទៀត។ ប្រជាពលរដ្ឋមកទទួលសេវាសុខាភិបាលដោយប្រើប្រាស់ប័ណ្ណ ប.ស.ស មានចំនួនតិច រីឯប័ណ្ណសមធម៌វិញមានចំនួនច្រើន និងបង់លុយផ្ទាល់ខ្លួនមានចំនួនតិចតួច។ មន្ទីរពេទ្យនេះ ក៏ជួបបញ្ហាប្រឈមមួយចំនួនដូចជា ខ្វះមន្ត្រីជំនាញ ខ្វះមន្ត្រីពេទ្យតាមផ្នែក ខ្វះបទពិសោធន៍ ខ្វះសម្ភារៈ និងបរិក្ខាពេទ្យ។

ក្រោយពីបានស្តាប់របាយការណ៍របស់លោកប្រធានមន្ទីរពេទ្យរួចមក លោកជំទាវ ឡោក ខេង បានថ្លែងអំណរគុណ និងកោតសរសើរដល់ប្រធានមន្ទីរពេទ្យ ដែលបានខិតខំប្រឹងប្រែងផ្តល់សេវាជូនប្រជាពលរដ្ឋ ស្របតាមយុទ្ធសាស្ត្របញ្ចកោណដំណាក់កាលទី១ ក្នុងការអភិវឌ្ឍន៍ធនធានមនុស្ស ការបណ្តុះបណ្តាលមុខវិជ្ជាជីវៈ ការលើកកម្ពស់សុខភាព និងសុខុមាលភាពសាធារណៈ និងពង្រឹងប្រព័ន្ធគាំពារសង្គម ប្រព័ន្ធជំនួយសង្គម និងប្រព័ន្ធសន្តិសុខសង្គម។

លោកជំទាវ ក៏បានអំពាវនាវ និងស្នើសុំឱ្យធ្វើការបណ្តុះបណ្តាល ពង្រឹងសមត្ថភាពមន្ត្រីពេទ្យ ដោយចូលស្តាប់ និងរៀនពីនវានុវត្តន៍ក្នុងនាមជាអ្នកដឹកនាំ ព្រមទាំងស្នើសុំឱ្យគណៈទ្រទ្រង់សុខភាពភូមិ ត្រូវរៀបចំផ្សព្វផ្សាយពីជំងឺមិនឆ្លងមុនចាប់ផ្តើមវេទិកាសាធារណៈភូមិ-ឃុំមានសុវត្ថិភាព ព្រមទាំងជំរុញឱ្យប៉ុស្តិ៍សុខភាព មណ្ឌលសុខភាព និងមន្ទីរពេទ្យបង្អែកទាំងអស់ ត្រូវខិតខំផ្សព្វផ្សាយ តាមរយៈការលើកប៉ាណូ និងចាក់វីដេអូបង្ហាញពីផលប៉ះពាល់នៃជំងឺមិនឆ្លង (ជំងឺផ្លូវចិត្ត ជំងឺទឹកនោមផ្អែម ជំងឺលើសឈាម ជំងឺបេះដូង ជំងឺមហារីក) ផងដែរ ៕