ឯកឧត្តម ខូយ រីដា អំពាវនាវដល់សិស្ស និស្សិត ដែលចង់សិក្សាបន្ត ហើយពុំមានលទ្ធភាពរៀន សូមរួសរាន់មកចាប់យកជំនាញបច្ចេកទេស ដើម្បីអនាគតរបស់ខ្លួន នៅវិទ្យាស្ថានពហុបច្ចេកទេសខេត្តពោធិ៍សាត់

ភ្នំពេញ៖ ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ និងជាប្រធានគណៈកម្មាធិការបណ្ដុះបណ្ដាលវិជ្ជាជីវៈខេត្ត បានអំពាវនាវដល់សិស្ស និស្សិត ដែលចង់សិក្សាបន្ត ហើយពុំមានលទ្ធភាពរៀន នៅថ្នាក់ឧត្តមសិក្សា ឬក៏សិស្ស យុវជន ដែលបោះបង់ការសិក្សា គ្មានគោលដៅជីវិតច្បាស់លាស់ សូមរួសរាន់មកចាប់យកជំនាញបច្ចេកទេស ដើម្បីអនាគតរបស់ខ្លួន នៅវិទ្យាស្ថានពហុបច្ចេកទេសខេត្តពោធិ៍សាត់។ ឯកឧត្តមអភិបាលខេត្ត បានអំពាវនាវបែបនេះ នៅវិទ្យាល័យពោធិ៍សាត់ ក្នុងទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈ លើកទី៧ ឆ្នាំ២០២៤ ក្រោមប្រធានបទ «TVET រៀនឱ្យចប់ ឱ្យចេះ ឱ្យមានការងារ» នាថ្ងៃទី១៥ ខែមិថុនា ឆ្នាំ២០២៤ ដោយបានការចូលរួមពី ឯកឧត្តម ពុំ ចន្ថា ទីប្រឹក្សាក្រសួងការងារ លោកអភិបាលរងខេត្ត ថ្នាក់ដឹកនាំមន្ទីរអង្គភាពនានាជុំវិញខេត្ត កងកម្លាំងប្រដាប់អាវុធទាំង៣ សាស្ត្រាចារ្យ លោកគ្រូ និងសិស្សនិស្សិតយ៉ាងច្រើនកុះករ។ ក្នុងថ្ងៃដដែលនោះ ឯកឧត្តមអភិបាលខេត្ត ក៏បានអញ្ជើញទស្សនាការតាំងពីពណ៌ ដែលរៀបំដោយវិទ្យាស្ថានពហុបច្ចេកទេសខេត្ត និងបន្តពិនិត្យមើលអគារស្តង់ដា «មរតកតេជោឌីជីថល» នៃវិទ្យាស្ថានពហុបច្ចេកទេសខេត្តពោធិ៍សាត់ ដែលមានកម្ពស់៥ជាន់ ស្មើនឹង៧៦បន្ទប់ បច្ចុប្បន្នកំពុងនឹងស្ថាបនាសាងសង់ សម្រេចបានប្រមាណ៧០%ហើយ ៕