សាខាកាកបាទក្រហមកម្ពុជាខេត្តកណ្តាល រៀបចំពិធីសូត្រមន្តចម្រើនព្រះបរិត្ត ដើម្បីថ្វាយព្រះរាជកុសលចំពោះសម្តេចព្រះមហាក្សត្រី ព្រះវររាជមាតាជាតិខ្មែរ នៅក្នុងឱកាសចម្រើនព្រះជន្មគម្រប់ ៨៨ យាងចូល ៨៩ព្រះវស្សា
ភ្នំពេញ៖ នៅរសៀលថ្ងៃសៅរ៍ ៩កើត ខែជេស្ឋ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៥ ខែ មិថុនា ឆ្នាំ២០២៤ សាខាកាកបាទក្រហមកម្ពុជាខេត្តកណ្តាល បានរៀបចំពិធីសូត្រមន្តចម្រើនព្រះបរិត្ត ដើម្បីថ្វាយព្រះរាជកុសលចំពោះសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាពសេចក្តីថ្លៃថ្នូរ និងសុភមង្គល ព្រះប្រធានកិត្តិយសកាកបាទក្រហមកម្ពុជា នៅក្នុងឱកាសពីធីបុណ្យចម្រើនព្រះជន្មគម្រប់ ៨៨ យាងចូល ៨៩ព្រះវស្សា ដែលនឹងប្រព្រឹត្តទៅនៅថ្ងៃអង្គារ ១២កើត ខែជេស្ឋ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៨ ខែមិថុនា ឆ្នាំ២០២៤ខាងមុខ។ ពិធីនេះបានប្រព្រឹត្តទៅក្រោមអធិបតីភាពដ៏ខ្ពង់ខ្ពស់ឯកឧត្តម គង់ សោភ័ណ្ឌ ប្រធានគណៈកម្មាធិការសាខា និងលោកជំទាវ ,ឯកឧត្តម នូ សាខន ប្រធានក្រុមប្រឹក្សាខេត្ត និងលោកជំទាវ ព្រមទាំងមានការនិមន្តចូលរួមពីសម្តេចព្រះមង្គលទេពាចារ្យ វង្ស អានេតា សម្តេចព្រះសង្ឃនាយករងគណៈធម្មយុត្តិកនិកាយនៃព្រះរាជាណាចក្រកម្ពុជា ព្រះមេគណខេត្តកណ្តាល ព្រះសកលវិទ្យាធិការនៃសកលវិទ្យាល័យសម្តេចព្រះមហាសង្ឃរាជ បួរ គ្រី និងជាព្រះចៅអធិការវត្តព្រះឥន្ទសាមគ្គីធម៌ ព្រមទាំងមានការអញ្ជើញចូលរួមជាកិត្តិយសពីឯកឧត្តម លោកជំទាវថ្នាក់ដឹកនាំខេត្ត ក្រុមប្រឹក្សាខេត្ត លោក លោកស្រីមន្ត្រីរាជការជុំវិញខេត្ត/ស្រុក គណៈកិត្តិយសសាខា គណៈកម្មាធិការសាខា លោកប្រធានគណៈកម្មាធិការអនុសាខា ទាំង១៣ក្រុង-ស្រុក សាស្ត្រាចារ្យ លោកគ្រូ អ្នកគ្រូ និស្សិត សិស្សានុសិស្ស យុវជនកាកបាទក្រហមកម្ពុជា នៃសាលាបឋមសិក្សា, វិទ្យាល័យ និងសកលវិទ្យាល័យសម្តេចព្រះមហាសង្ឃរាជ បួរ គ្រី សរុបចំនួន ៣១០អង្គ/នាក់ នៅក្នុងវត្តព្រះឥន្ទសាមគ្គីធម៌ ឃុំក្រាំងម្កាក់ ស្រុកអង្គស្នួល ខេត្តកណ្តាល។ បន្ទាប់ពីគណៈអធិបតីឡើងថ្វាយភួងផ្កាចំពោះព្រះឆាយាល័ក្ខណ៍សម្តេចព្រះមហាក្សត្រីរួចមក ឯកឧត្តម គង់ សោភ័ណ្ឌ ប្រធានគណៈកម្មាធិការសាខា បានអានសារថ្វាយព្រះពរចំពោះសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ព្រះប្រធានកិត្តិយសកាកបាទក្រហមកម្ពុជា ជាទីសក្ការៈដ៏ខ្ពង់ខ្ពស់ ដោយមានខ្លឹមសារថា ទូលព្រះបង្គំយើងខ្ញុំទាំងគ្នាជាកូន ជាចៅ ចៅទួត សូមព្រះរាជាអនុញ្ញាតដ៏ខ្ពង់ខ្ពស់ ក្រាបបង្គំទូលថ្វាយសព្ទសាធុកាពរ សូមឱនកាយលើកហត្ថប្រណម្យបួងសួង ព្រះរតនត្រ័យកែវទាំងបី គុណបុណ្យវត្ថុស័ក្តិសិទ្ធិទាំងអស់នៅលើលោក ជាពិសេសសូមទេព្តារក្សាព្រះមហាស្វេតច្ឆត្រ បារមីព្រះវិញ្ញាណក្ខន្ធនៃអតីតព្រះមហាក្សត្រ ព្រះមហាក្សត្រិយានីខ្មែរគ្រប់ព្រះអង្គ សូមឫទី្ធតេជៈបារមីខ្លាំងក្លាទាំងអស់ សូមប្រោសព្រះរាជប្រទាន ប្រោះព្រំប្រសិទ្ធពរជ័យ សិរីសួស្តី ថ្វាយសម្តេចព្រះមហាក្សត្រី ព្រះវររាជមាតា ព្រះប្រធានកិត្តិយសកាកបាទក្រហមកម្ពុជា ជាទីគោរពសក្ការៈដ៏ខ្ពង់ខ្ពស់បំផុត សូមព្រះអង្គទ្រង់ប្រកបដោយព្រះបរមសុខគ្រប់ប្រការមានព្រះរាជសុខភាពល្អបរិបូរណ៍ ព្រះកាយពលមាំមួន និងព្រះជន្មាយុយឺនយូរជាងរយព្រះវស្សា ដើម្បីគង់ប្រថាប់ជាម្លប់ដ៏ត្រជាក់ត្រជុំនៃប្រជារាស្រ្ត ជាកូន ចៅ ចៅទួត របស់ព្រះអង្គទូទាំងប្រទេសយូរអង្វែងរៀងដរាបតទៅ។ នៅក្នុងឱកាសនោះដែរសាខាខេត្តក៏បានប្រគេនទេយ្យវត្ថុ និងបច្ច័យចំពោះព្រះសង្ឃសម្រាប់ទុកប្រើប្រាស់ក្នុងទីអារាមរួមមាន៖ អង្ករ ២តោន, ទឹកត្រី ១០យួរ, មី ១០កេស, ទឹកសុទ្ធ ១០កេស, ត្រីខកំប៉ុង ២កេស, ទឹកផ្លែឈើ ១០កេស, ទឹកក្រូច ១០កេស, ទឹកដោះគោខាប់ ២កេស, ស្ករស ២០គីឡូក្រាម និងបច្ច័យ ៤,០០០,០០០រៀល។ ដោយឡែកចំពោះព្រះសង្ឃ ៧អង្គ សាខាបានប្រគេន សាដក១ និងបច្ច័យមួយចំនួនផងដែរ ៕
