ឯកឧត្ដម សួស ប្រាថ្នា៖ ការវាយតម្លៃលើការបំពេញការងារ របស់មន្ត្រីក្នុងការផ្តល់សេវា របស់រដ្ឋបាលថ្នាក់ក្រោមជាតិ ពីសំណាក់ពលរដ្ឋ នឹងមានភាពខុសគ្នាពីកន្លែងមួយ ទៅកន្លែងមួយ

ភ្នំពេញ៖ សន្និសីទសារព័ត៌មាន លើប្រធានបទប្រធានបទ «ការផ្តល់សេវាតាមយន្តការច្រកចេញចូលតែមួយ» ដែលរៀបចំដោយក្រុមអ្នកនាំពាក្យក្រសួងមហាផ្ទៃ កាលពីថ្ងៃទី១៤ ខែមិថុនា ឆ្នាំ២០២៤ ឯកឧត្តម សួស ប្រាថ្នា អគ្គនាយក នៃអគ្គនាយកដ្ឋានរដ្ឋបាល ក្រសួងមហាផ្ទៃ បានលើកឡើងថា ការវាយតម្លៃលើការបំពេញការងាររបស់មន្ត្រីក្នុងការផ្តល់សេវា របស់រដ្ឋបាលថ្នាក់ក្រោមជាតិពីសំណាក់ប្រជាពលរដ្ឋ នឹងមានភាពខុសគ្នាពីកន្លែងមួយ ទៅកន្លែងមួយ ។

ឯកឧត្ដមបានប្រសាសន៍ថា ជារួម ការផ្តល់សេវារដ្ឋបាលតាមរយៈអង្គភាពច្រកចេញចូលតែមួយនៃរដ្ឋបាលរាជធានី ខេត្ត និងការិយាល័យច្រកចេញចូលតែមួយនៃរដ្ឋបាលក្រុង ស្រុក ខណ្ឌត្រូវអនុវត្តទៅតាម បែបបទ និងនីតិវិធីរួមដែលបានកំណត់ដោយក្រសួងមហាផ្ទៃ និងនីតិវិធីបច្ចេកទេសកំណត់ ដោយក្រសួង ស្ថាប័នពាក់ព័ន្ធ។

ឯកឧត្ដមបន្តថា ក្រសួងមហាផ្ទៃបានកំណត់ជាស្តង់ដាអប្បបរមាលើការរៀបចំទីកន្លែង ការបំពាក់ ឧបករណ៍ សម្ភារ បរិក្ខារ និងបានផ្តល់ការបណ្តុះបណ្តាលលើបែបបទ និងនីតិវិធីនៃការផ្តល់ សេវារដ្ឋបាលតាមយន្តការច្រកចេញចូលតែមួយ ជាពិសេសគឺការបណ្តុះបណ្តាលអំពីការធ្វើ បដិសណ្ឋារកិច្ចល្អក្នុងការផ្តល់សេវាជូនប្រជាពលរដ្ឋ។

ឯកឧត្ដម សួស ប្រាថ្នា បានបញ្ជាក់ថា «ក្រោយទទួលបានការណែនាំ និង ការបណ្តុះបណ្តាលនេះ រដ្ឋបាលថ្នាក់ក្រោមជាតិសាមីនីមួយៗ បានរៀបចំទីកន្លែងផ្តល់សេវា និងរៀបចំបុគ្គលិកផ្តល់សេវារបស់ខ្លួនទៅតាមលទ្ធភាពធនធានថវិកា និងតម្រូវការជាក់- ស្តែងក្នុងមូលដ្ឋាន។ ដូច្នេះ ការវាយតម្លៃលើការបំពេញការងាររបស់មន្ត្រីក្នុងការផ្តល់សេវា របស់រដ្ឋបាលថ្នាក់ក្រោមជាតិពីសំណាក់ប្រជាពលរដ្ឋ នឹងមានភាពខុសគ្នាពីកន្លែងមួយ ទៅកន្លែងមួយ ដែលអាចផ្តោតលើការរៀបចំទីកន្លែង ការធ្វើបដិសណ្ឋារកិច្ចចំពោះប្រជាពលរដ្ឋមកស្នើសុំសេវា ការយកចិត្តទុកដាក់លើអ្នកស្នើសុំសេវា ឬការផ្តល់លទ្ធផលប្រកបដោយគុណភាព ឬឆាប់រហ័សជូនប្រជាពលរដ្ឋវិញ គឺអាស្រ័យលើភាពច្នៃប្រឌិត និងភាពប៉ិនប្រសប់របស់ថ្នាក់ដឹកនាំនៅមូលដ្ឋានក្នុងការកៀរគរមន្ត្រីឱ្យមកបំពេញការងារ និងការធ្វើបដិសណ្ឋារកិច្ច ចំពោះអ្នកស្នើសុំសេវាបានល្អប្រសើរ» ។

ក្នុងឱកាសនោះដែរឯកឧត្ដម ក៏បានទទួលយកសំណូមពររបស់ប្រជាពករដ្ឋ ដែលស្នើឱ្យច្រកចេញចូលតែមួយ ដាក់ម៉ាស៊ីនព្រីនឯកសារ ដោយ ពួកគាត់សុខចិត្តបង់កម្រៃសេវាតាមច្បាប់កំណត់ ពីព្រោះពួកគាត់យល់ថាជារឿងលំបាក ដែលពេលខ្លះ មកដល់ច្រកហើយ ទើបដឹងថាត្រូវព្រីនឯកសារ ហើយពេលខ្លះទៅព្រីនឯសារ ចំណាយពេលយូរជាងទទួលបានឯកសារពីច្រកទៀត ។

ជុំវិញបញ្ហានេះដែរ ឯកឧត្ដមក៏បានសន្យាថា នឹងគោរពរាយការណ៍ និងស្នើសុំគោលការណ៍សម្រេចពីឯកឧត្តម អភិសន្តិបណ្ឌិត ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដើម្បីធ្វើការណែនាំឱ្យរដ្ឋបាលថ្នាក់ក្រោមជាតិសាមីនីមួយៗពិនិត្យលទ្ធភាពក្នុងការរៀបចំឱ្យមានម៉ាស៊ីនថតចម្លង ឬម៉ាស៊ីនព្រីនឯកសារនៅក្នុងបរិវេណអង្គភាពឬការិយាល័យច្រកចេញចូលតែមួយ អាស្រ័យទៅតាមធនធានថវិការបស់រដ្ឋបាលនីមួយៗ ដែលខ្លួនរៀបចំបាន ដោយសារសម្ភារទាំងនេះត្រូវប្រើប្រាស់ថវិការបស់រដ្ឋបាលថ្នាក់ក្រោមជាតិនីមួយៗផ្ទាល់។

ឯកឧត្ដមអគ្គនាយក បានលើកឡើងថា បច្ចុប្បន្ន អគ្គនាយកដ្ឋានរដ្ឋបាល កំពុងរៀបចំរបាយការណ៍ជាក់លាក់អំពីប្រភេទសេវា ដែលកំពុងអនុវត្តតាមយន្តការច្រកចេញចូលតែមួយ ថាតើមានប្រភេទសេវាណាខ្លះដែល មានដំណើរការល្អ ប្រភេទសេវាណាខ្លះដែលដំណើរការតិចតួច និងប្រភេទសេវាណាខ្លះ ដែលមិនដំណើរការសោះ។ លើមូលដ្ឋាននេះ អគ្គនាយកដ្ឋានរដ្ឋបាល នឹងគោរពស្នើសុំ គោលការណ៍អនុញ្ញាតដ៏ខ្ពង់ខ្ពស់ពី ឯកឧត្តមអភិសន្តិបណ្ឌិត ឧបនាយករដ្ឋមន្ត្រី រដ្ឋមន្ត្រី ក្រសួងមហាផ្ទៃ ដើម្បីជជែកពិភាក្សាជាមួយក្រសួង ស្ថាប័នពាក់ព័ន្ធ ដើម្បីរួមគ្នាពិនិត្យមើល ឡើងវិញលើប្រភេទ និងទំហំមុខងារដែលបានផ្ទេរជូនរដ្ឋបាលថ្នាក់ក្រោមជាតិ និងពិនិត្យ លទ្ធភាពក្នុងការជំរុញមុខងារដែលដំណើរការតិចតួចបំផុត និងមុខងារមិនដំណើរការសោះ បន្ថែមទៀតជូនរដ្ឋបាលថ្នាក់ក្រោមជាតិ ស្របទៅតាមការវិវត្តន៍ និងតម្រូវការជាក់ស្តែងក្នុង មូលដ្ឋាន ដែលមាននិន្នាការកាន់តែច្រើនឡើងពីមួយឆ្នាំទៅមួយឆ្នាំ ៕